İstər Ermənistan hakimiyyəti, istərsə də müxalifəti absurd iddialarla, həqiqətə uyğun olmayan fikirlərlə gündəmi məşğul etməkdə davam edir. Onlar, əsasən də erməni cəmiyyətini bu yalanlara inandırmağa çalışırlar.
Bu günlərdə dumanlı havada azaraq Ermənistan tərəfə keçən iki hərbiçimizin qısa müddət ərzində geri qaytarılmasını Ermənistan müxalifəti həzm edə bilmir və bu səbəbdən də yalan iddialar ortaya qoyurlar.
Erməni mətbuatının yazdığına görə, müxalif Hayastan fraksiyasının deputatı Aram Vardevanyan deyib ki, Azərbaycan hərbçiləri qaytarılmazdan əvvəl Azərbaycan tərəfin qarşısına iki Azərbaycan hərbçisinə qarşılıq bütün erməni əsirlərin qaytarılması şərti qoyulmalı idi.
Bu arada Ermənistanda geniş yayılan uydurmalara və bəzi erməni müxaliflərinin versiyalarına görə, guya Ermənistan hakimiyyəti rəsmi olaraq Azərbaycan tərəfdə 50 “hərbi əsir”in olduğunu deyir. Onlar deyirlər ki, guya qeyri-rəsmi məlumatlara görə, hazırda Azərbaycanda “100 erməni hərbi əsir” var.
Bilirik ki, Azərbaycan dövləti rəsmən bəyan edib ki, Ermənistanın Azərbaycanda hərbi əsiri yoxdur və bütün hərbi əsirlər 10 noyabr razılaşmasından sonra Ermənistana verilib. Amma Ermənistan müxalifəti absurd versiya və bəyanatlarla həm erməni cəmiyyətinin başını qatmaq istəyir, həm də Paşinyan hökümətini bacarıqsızlıqda ittiham edir.
“Bu iddia tamamilə absurddur”
Qarabağ Azadlıq Təşkilatının (QAT) sədri Akif Nağı bildirdi ki, ermənilər “əsir” məsələsindən müxtəlif məqsədlər üçün istifadə etməyə çalışırlar. Burada bir neçə məqamın olduğunu deyən A.Nağının sözlərinə görə, bu dırnaqarası məsələdən Azərbaycana qarşı təzyiq vasitəsi kimi istifadə edirlər, beynəlxalq təşkilatların diqqətini bu absurd iddiaya yönəldib, heç bir əsas olmadan Azərbaycanı “hərbi əsir” saxlamaqda ittiham edirlər. “Bu iddia tamamilə absurddur və ermənilər say məsələsini ortaya atmaqla, uydurma rəqəmlər söyləməklə öz çirkin niyyətlərini göstərirlər. Ermənistanın məqsədi “hərbi əsirlər” uydurması ilə Azərbaycana təzyiq göstərilməsinə və beynəlxalq təşkilatların diqqətini cəlb etməyə nail olmaq idi və buna da müəyyən qədər nail oldular”.
A.Nağı deyir ki, bu, Ermənistan tərəfin müxtəlif adamların dili ilə şişirtmə rəqəmləri ortaya qoymaqla öz daimi ənənəsinə sadiq qaldığını göstərir: “Ermənilərin say məsələsini qabartmaqda bir neçə məqsədləri var. Birincisi, say məsələsini süni şəkildə artırmaqla ənənəvi şişirtmə taktikasından istifadə edirlər. Tarix boyu onlar saxtakarlığı, yalan kampaniyasını bu cür şişirtmələrlə həyata keçiriblər. Yəni 1915-ci il qondarma hadisələri ilə bağlı 100 ildır ki, dünyanı yanlış istiqamətə yönəldirlər və bundan Türkiyəyə qarşı təzyiq vasitəsi kimi istifadə edirlər. Eyni zamanda Birinci Qarabağ müharibəsinin gedişində də müəyyən məsələləri yalandan ortaya qoyaraq şişirtdilər. Birinci Qarabağ müharibəsinin gedişində ermənilərin azərbaycanlılara qarşı kütləvi qırğınlar törətməsi, soyqrımı siyasəti ilə bağlı faktların hamısı ortadadır. Xocalı, Meşəli, Qaradağlı, Ağdaban faciələri, soyqırımları dünyanın gözləri qarşısında baş verib, bizim insanlarımıza qarşı ermənilər kütləvi qırğınlar törədiblər. Amma müharibənin gedişində azərbaycanlıların hansısa kütləvi qırğın törətməkləri ilə bağlı heç bir fakt yoxdur. Onlar da azərbaycanlılara qarşı törətdikləri soyqırıma qarşı qoymaq üçün bir şey fikirləşdilər və qondarma “Marağa qətliamı” deyilən bir tezis ortaya atdılar. Guya 1992-ci ilin aprel ayında azərbaycanlılar Ağdərənin Marağa kəndini azad edərkən “kütləvi qırğın” olub. Hamısı da, təbii ki, yalan idi...”
A.Nağı xatırlatdı ki, İkinci Qarabağ müharibəsində ermənilər çoxlu itkilər verib və bunu ört-basdır etmək istəyirlər, cəmiyyəti aldadırlar. “Ermənistan qondarma “hərbi əsir”lər məsələsi ilə manipulyasiya edir. Müharibədə ölənlərin yaxınları tələb edir ki, övladları barədə onlara düzgün məlumat verilsin. Hökumət də onalrın ölümünü gizlətmək məqsədilə yalan məlumatlar yayır ki, guya onların övladları “əsirlikdədir”, itkin düşüblər və sair. Həqiqət ortadadır, ermənilər bu şişirtmə rəqəmlərlə və yalanlarla özlərini rüsvay edirlər. Əgər öz dediklərinə özləri inanırlarsa, siyahını ortaya çıxarsınlar ki, görək doğrudanmı bu qədər “əsir” var Azərbaycanda? Təbii ki, bu yalandır və şişirtmədir. Ümumiyyətlə, Azərbaycanda erməni əsiri yoxdur” - deyə A.Nağı vurğuladı.
İradə SARIYEVA
