Ermənistanın Baş naziri Nikol Paşinyan Milli Təhlükəsizlik Xidmətinin əməkdaşları ilə görüşü zamanı bir sıra məsələlərə toxunub.
Paşinyan çıxışında Qarabağ məsələsinə də toxunub və deyib ki, bu sahədə uzun illər ərzində danışıqlar masasında danışılanlarla Ermənistan cəmiyyətinə verilən məlumatlar arasında böyük uçurum olub: “Biz eyni yolla getmək istəmirik. Biz qapalı məsləhətləşmələrdə, açıq çıxışlarda və danışıqlar masasında eyni məzmunun çərçivəsindən danışmaq istəyirik. Biz daxildə bir, xaricdə başqa şey demək, sonra bu fərq nəticəsində yaranmış tələyə düşmək istəmirik”.
Paşinyan öz çıxışında, habelə, 44 günlük müharibədən sonra işinin səmərəliliyini artırmış Milli Təhükəsizlik Xidmətinə təşəkkürünü bildirib. O deyib ki, məhz bu fəaliyyət nəticəsində Ermənistan dərin siyasi, psixoloji və etimad böhranını keçə bilib. Daha sonra Paşinyan Qarabağla bağlı sərsəmləyərək bunları deyib: “Bizim vəzifəmiz “Artsaxın” mövcudluğunu və “Artsax” xalqının hüquqlarının tam şəkildə qorunmasını təmin etmək, Qarabağ münaqişəsinin həlli, “Artsax”ın beynəlxalq səviyyədə tanınmasını həyata keçirməkdir. Və bu sahələrdə görəcəyimiz işlər bizdən çox fədakarlıq, ardıcıllıq, balans tələb edəcək”.
Maraqlıdır, bir ara müsbət yönümlü mesajlar verən Paşinyanın yenidən sərsəmləməsi nə məqsəd güdür? Bütün bunlar nə deməkdir?
“Paşinyan geriyə doğru addım atarsa, bütün bunlar onun əleyhinə işləyəcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “Problem ondadır ki, Brüssel görüşündən sonra Paşinyan müsbət yönümlü açıqlamalar versə də, səmimi deyil. Zatən, Paşinyanın bu oyunbazlığı yeni deyil. Nikol dəfələrlə Qarabağla bağlı təxribatçı məzmunlu açıqlamalarla çıxış edib. Onun MTX əməkdaşları ilə görüşdə Qarabağla bağlı sərsəmləməsi daha çox daxili auditoriyaya hesablanıb. Məsələ ondadır ki, revanşistlər nə qədər olmasa da parlamentdə təmsil olunurlar. Onlar hələ ki, Qarabağla bağlı müəyyən manipulyasiyalar aparıb ictimai rəyə təsir edirlər. Bu səbəbdən Paşinyan revanşistlərin əlində olan təzyiq vasitəsini zəiflətməkdən ötrü belə açıqlamalar verir. Əslində o özü də yaxşı bilir ki, Qarabağ məsələsini beynəlxalq gündəliyə gətirmək Ermənistan və Azərbaycan arasında olan normallaşma prosesinə zərbə vuracaq. Çünki biz Soçi və Brüssel görüşlərində Paşinyanın bu məsələni qabartmamasının şahidi olduq. Bu baxımdan hesab edirəm ki, Nikolun “Artsax” açıqlaması növbəti manipulyasiyadır. Çünki Qarabağla bağlı əvvəlki status-kvo darmadağın edilib. Proses artıq yeni bir mərhələyə daxil olub. Ona görə də Paşinyan geriyə doğru addım atarsa, bütün bunlar onun əleyhinə işləyəcək. Müharibədən sonra Qarabağla bağlı yaranan yeni reallıqları dəyişmək mümkün deyil. Bu səbəbdən Paşinyanın yeni sərsəmləməsi reallığa uyğun deyil. Ən azından ona görə ki, indiyə qədər 3 bəyannamə imzalanıb. Sözügedən bəyannamələrə uyğun olaraq da görüşlər keçirilir”.
Bir sözlə, politoloq hesab edir ki, Ermənistan Qarabağ məsələsini unutmalı, delimitasiya və kommunikasiyaların açılması məsələlərinə köklənməlidir.
Vidadi ORDAHALLI
