Ermənistandakı revanşist qüvvələr Paşinyanı satqın çıxarmaq üçün yeni bir kampaniyaya start veriblər. Paşinyan hakimiyyətinə qarşı antitəbliğat kampaniyasına ilk olaraq Azərbaycanın nəzarəti altına keçmiş Gorus-Qafan yolu ətrafında mövcud olan qalmaqallı situasiyadan başlayıblar. Böyük ehtimalla, bu məsələnin Ermənistan cəmiyyətində xüsusi həssaslıqla qarşılandığı nəzərə alınıb. Və hazırda ölkədaxili siyasi gərginliyi məhz bu mövzu üzərindən artırmağa çalışırlar.
Daha dəqiq ifadə etsək, erməni müxalifəti Paşinyan hakimiyyətinə qarşı ittihamların məzmununu nisbətən dəyişməyə başlayıb. Hazırda Ermənistanın hakim dairələri təslimçilik siyasəti yürüdülməsi ilə bağlı ittihamlarla yanaşı, həm də gizli anlaşmalara imza atmaqda suçlanır.
Onu da qeyd edək ki, radikal revanşist siyasi qüvvələr belə ittihamlarla hakimiyyət uğrunda mübarizəni daha da intensivləşdirə biləcəklərinə ümid bəsləyirlər. Hesab olunur ki, Paşinyan hakimiyyətinə qarşı nə qədər məxfi anlaşmalarla bağlı suallar yönədilərsə, Ermənistan cəmiyyətinin diqqətini bir o qədər cəlb etmək olar. Nəticədə, Paşinyan hakimiyyəti çıxılmaz vəziyyətə düşər və müqavimət gücü daha da zəifləyər.
Məsələ ondadır ki, Paşinyan hakimiyyəti revanşist qüvvələrin ittiham məzmunlu suallarının bir çoxuna cavab verməkdə çətinlik çəkir. Maraqlıdır, Paşinyan doğrudanmı hansısa gizli razılaşmaya qol çəkib, yoxsa bunlar uydurmadır?
Politoloq Qabil Hüseynli “Bakı-Xəbər”ə açıqlamasında bildirdi ki, bu, siyasi spekulyasiyadan başqa nəsə deyil: “Bu cür piarın arxasında daşnaklar və şərti adı “Qarabağ klanı” olan bir müxalifət qrupu dayanır. Sırf daxili auditoriyaya hesablanan və hakimiyyəti daha da nüfuzdan salmağa yönəlik bir təbliğatdır. Barmaqdan sorma ehtimaldan başqa nəsə deyil. Hansı gizli sövdələşmədən danışmaq olar ki, hələ də sülhyaratma prosesində heç bir ciddi sənədə imza atılmayıb? Paşinyan Azərbaycanla hər hansı razılaşmaya gedərsə belə, ilk növbədə öz ölkəsinin milli maraqlarını güdür. Anlayır ki, yaranmış yeni reallıqlar konstruktivlik tələb edir. Onlar masada olan razılaşmalara gedərlərsə, kifayət qədər ciddi siyasi və iqtisadi dividendlər əldə etmiş olarlar. Ermənistan müxalifətinin boşboğazları bilir ki, bütün bunlar Paşinyanın nüfuzunun artması ilə nəticələnəcək. Bu səbəbdən də indidən Paşinyanı satqılıqda, gizli sövdələşməyə getməkdə günahlandırırlar. Hazırda Ermənistan hakimiyyəti həm də Türkiyə ilə münasibətlərin yaxşılaşdırılmasını istəyir. Müxalifəti narahat edən həm də bu məqamdır. Daşnaklara bu qətiyyən sərf etmir. Hesab edirəm ki, Ermənistan müxalifətinin bu yöndə olan cəhdləri heç bir səmərə verməyəcək. Aydındır ki, bu istiqamətdə olan danışıqların məzmununu və nəticəsini xalqdan gizlətmək mümkün deyil”.
Məhəmmədəli QƏRİBLİ
