Türkiyə və Ermənistan arasında əlaqələrin bərpası üzrə xüsusi elçilər artıq təyin olunub. İrəvanı bu missiyada Ermənistan parlamenti sədrinin müavini Ruben Rubinyan, Ankaranı isə ABŞ-dakı sabiq səfiri Serdar Kılıç təmsil edəcək.
Məlumat üçün qeyd edək ki, Serdar Kılıç 28 mart 1958-ci ildə anadan olub. 1980-ci ildə TED Ankara Kollecini və Ankara Universitetinin Siyasi elmlər fakültəsini bitirən Kılıç 1984-cü ildə Xarici İşlər Nazirliyində işə başlayıb. O, 2006-2008-ci illərdə NATO baş direktorunun müavini, daha sonra Beyrut səfiri vəzifəsində çalışıb. 2010-2012-ci illərdə MGK-nın baş katibi vəzifəsində işləyib. 2012-2014-cü illərdə Tokio elçisi, 2014-2021-ci illərdə isə Vaşinqton səfiri vəzifələrində çalışıb.
Ruben Rubinyan isə 1990-cı il martın 8-də İrəvanda anadan olub. 2010-cu ildə İrəvan Dövlət Universitetinin beynəlxalq münasibətlər fakültəsini bitirib. 2011-də London Universitet Kollecində (UCL), Siyasət və Təhlükəsizlik üzrə magistr, 2012-ci ildə Polşanın Yagellon Universiteti, Avropaşünaslıq üzrə magistr dərəcəsi alıb. 2018-ci ilin may ayından 2019-cu ilin yanvar ayına kimi o, xarici işlər nazirinin müavini vəzifəsində çalışıb. 2021-ci il avqustun 3-də Ermənistan Milli Assambleyasının sədr müavini seçilib. R.Rubinyan inqilaba qoşulmaq üçün Ermənistana gəlməzdən öncə - 2017-2018-ci illərdə Türkiyədə fəaliyyət göstərib. Hrant Dink Fondunda işləyib. Hətta müharibədən sonra vitse-spiker seçiləndə erməni müxalif mediası ona qarşı “türk agenti” ittihamları da irəli sürürdü.
Maraqlıdır, bu iki diplomatdan hansı qalib gələcək?
“Paşinyanın komandasında Türkiyə ilə bağlı işi bilən ciddi bir diplomat yoxdur”
Məsələyə münasibət bildirən AMİP funksioneri Əli Orucovun fikrincə, Serdar Kılıç Ruben Rubinyandan daha təcrübəli və peşəkardır: “Əvvəla, Ermənistanla Türkiyə arasında sərhəd 1993-cü ildə bağlanıb. Azǝrbaycan ǝrazilǝrinin Ermǝnistan tǝrǝfindǝn işgalına etiraz olaraq Türkiyə sərhədi bağlayıb. Münasibətlərin normallaşması prosesi 2008-ci ilin payızında Ermənistanın o zamankı prezidenti Serj Sarkisyan dövründə başlayıb. 2009-cu il oktyabrın 10-da Ermənistan və Türkiyənin xarici işlər nazirləri Sürixdə iki ölkənin parlamentləri tərəfindən ratifikasiya edilməli olan protokollar imzalayıb. Lakin 2010-cu il aprelin 22-də Sarkisyan öz fərmanı ilə Ermənistan-Türkiyə protokollarının ratifikasiyası prosesini dayandırıb. İndi, məlum olduğu kimi, tamamilə yeni situasiya yaranıb. Azərbaycan öz ərazilərini işğaldan azad edəndən sonra Türkiyə-Ermənistan sərhədlərinin açılması, münasibətlərin qurulması gündəmə gəlib. Düzdür, münasibətlərin qurulması o qədər də sadə məsələ deyil. Ona görə ki, Ermənistan Türkiyəyə qarşı qondarma “soyqırım” və ərazi iddiaları ilə çıxış edir. O üzdən çətin danışıqlar gözlənilir. S.Kılıç ABŞ-da səfir işləyib və son dərəcə təcrübəli diplomatdır. R.Rubinyan isə Türkiyəyə bələd olan şəxs olsa da təcrübəli deyil. Üstəlik, onun barəsində Ermənistanda birmənalı fikir yoxdur, bir sıra qalmaqallı məsələlərdə adı hallanır. Ancaq problem ondadır ki, Paşinyanın komandasında Türkiyə ilə bağlı işi bilən ciddi bir diplomat yoxdur. Bu səbəbdən naəlac qaldıqları üçün R.Rubinyanı irəli çəkiblər”.
Bu baxımdan partiya funksioneri hesab edir ki, Türkiyədən olan diplomat üstünlük əldə edəcək.
Vidadi ORDAHALLI
