Biz Ermənistanla həm də informasiya cəbhəsində aktiv mübarizə aparırıq. Etiraf edək ki, bu o qədər də asan deyil. Çünki erməni yalanlarının dünyada yayılmasında onlara dünyanın müxtəlif ölkələrində oturuşmuş erməni diasporu da yaxından dəstək olur.
Ermənistan bizə qarşı hibrid müharibənin bütün komponentlərindən istifadə edir. Təbiidir ki, artıq sistemli şəkildə fəaliyyət göstərən Azərbaycan diplomatiyası erməni yalanlarının ifşa olunması istiqamətində ciddi nəticələrə imza atıb. Bizim təbliğat vasitələrimiz də Ermənistanın yaydığı dezinformasiyaların neytrallaşmasına nail ola bilir. Bu istiqamətdə bizim vətəndaşlarımızın da aktivliyini müşahidə edirik. Bu özünü, xüsusilə də erməni saytlarının etdiyi paylaşımlarda göstərir. Həmin ölkənin bir çox saytlarının yaydığı xəbərlərin altında şərh yazmaq kimi imkan tanınır. Şərhlər ətrafında apardığımız araşdırmalardan görürük ki, sözügedən şərh bölümlərində ermənilərdən daha çox bizim vətəndaşlarımızın və soydaşlarımızın yazılarına rast gəlinir. Bizimkilər, sanki doğma divarlar arasında futbol oynayanlar kimi arxayın görsənir və özlərini əsl ev sahibləri kimi aparırlar. Eyni aktivliyi biz Facebook-da Nikol Paşinyanın və Arayik Arutunyanın səhifələrində edilən paylaşımların aşağısında görürük. Maraqlıdır ki, erməni əsilli vətəndaşların isə analoji təbliğatına rast gəlmirik. Ermənilərin bu davranışları çox maraq doğurur. Bizimkilərin şərhlərlə bağlı ciddi fəallığı, onların isə passivliyi nə ilə izah oluna bilər?
Media eksperti Azər Həsərət “Bakı-Xəbər”ə açıqlamasında bildirdi ki, bu məsələ ilə bağlı bir neçə dəfə münasibətini açıqlayıb: “Bir daha həmin mövqeyimdə qalıram ki, ümumiyyətlə kimə gəldi, harda gəldi şərh yazmaq faydalı deyil. Niyəsini izah edim. Biz onlara çox şərh yazırıq, ancaq onlarda bu fəallıq yoxdur. Mən əminəm ki, vətəndaşlarımız bunu saf niyyətlə edir. Milli təəssübkeşlik çəkən həmin adamlar müasir informasiya vasitələrinin iş prinsipindən o qədər də məlumatlı deyillər. Çünki istənilən paylaşıma reaksiya çox olanda o populyarlaşır. Dəxli yoxdu ki, o hansı məzmunda yazılıb. Ermənilər bizim əleyhimizə mənfi nəsə paylaşır, bizimkilər də təəssübkeşlik edərək onlara cavab yazır, mübahisəyə girir. Bunun da nəticəsində biz özümüz də hiss etmədən həmin postu populyarlaşdırırıq. Ermənilərin hansısa paylaşımına rəy bildirməmək daha yaxşı olar. Mənim qarşıma hər gün çoxlu sayda elə paylaşımlar çıxır. Şəxsən mən heç bir reaksiya vermirəm. Bilirəm ki, bunun nəticəsində erməni fikirini dəyişən deyil. Bunun əvəzində başqa fəaliyyəti təklif edərdim. Çalışmalıyıq ki, müstəqil kontent yaradıcılığına üstünlük verək. Media fəallarımız, adi təəssübkeş vətəndaşlarımız həmin paylaşımlara rast gələndə, cavabı onların paylaşımının altına yazmasın. Başqa bir tərəfdə ona şərh yazırıq. Görürük ki, onu yazanı heç Ermənistanın özündə yaxşı tanımırlar, ancaq bizim yazdığımız minlərlə şərh həmin adamı sosial şəbəkə fenomeninə çevirmiş olur. Bunun da nəticəsində onların fikri populyarlaşır. O cür paylaşımlara ciddi reaksiya verməyib keçəndə görəcəyik ki, onların yazdıqlarını yalnız özləri oxuyur. Əvəzində biz öz enerjimizi müstəqil məzmunların yaradılmasına yönətməliyik. Bununla daha çox qazana bilərik”.
Məhəmmədəli QƏRİBLİ
