“Ölkəmizin indiki acı reallığını qələmə almalıyıq. Reallıq budur ki, bu gün hər beş sərnişindən biri Ermənistanı tərk edir və geri qayıtmır, bu, mənfi mənada rekord göstəricidir. Biz ölkəmizin üzləşdiyi çətinliklərdən danışarkən, Zvartnots hava limanında bir çox ailələr göz yaşları içində öz qohumları ilə vidalaşır, yad ölkədə məskunlaşmaq ümidi ilə yola düşürlər”. Bunu Ermənistan Respublika Partiyasının sədri, Ermənistanın üçüncü prezidenti Serj Sarkisyan partiyasının 17-ci qurultayında çıxışı zamanı deyib.
Ekspertlərin fikrincə, Ermənistanın boşalmasının günahkarlarından biri də Serj Sarkisyandır ki, məhz onun prezidentliyi dövdürdə həyata keçirilən yanlış siyasət nəticəsində Ermənistan hərtərəfli böhrana yuvarlanıb, bundan isə ən çox sadə camaat əziyyət çəkir. Ekspertlərin dediyinə görə, yürütdüyü işğaçılıq və revanşizm siyasəti ilə Ermənistanı min il geri salan Sarkisyanın erməni xalqı qarşısında günahı böyükdür və bu ölkəni tərk edənlər də Sarkisyan rejiminin əziyyətini çəkdikləri üçün bir parça çörək tapmaq ümidilə başqa ölkələrə gedirlər.
“Sarkisyan öz günahlarını etiraf etmək əvəzinə, ölkəni birdəfəlik tərk edənlərə görə Paşinyan hökumətini ittiham edir”
“Müasir İnkişaf” Birliyinin sədri, siyasi şərhçi Mübariz Göyüşlü hesab edir ki, Sarkisyan “Hər beş təyyarə sərnişinindən biri Ermənistanı tərk edir və geri qayıtmır” deməklə Paşinyan hökumətini ittiham edir. M.Göyüşlünün sözlərinə görə, Sarkiyan belə rəy yaratmaq istəyir ki, guya camaat Paşinyanın apardığı yanlış siyasətə etiraz olaraq ölkəni tərk edir. Ekspertin bildirdiyinə görə, Ermənistanın ac-yalavac vəziyyətə düşməsində Sarkisyan klanının rolu böyükdür və o indi öz günahını indiki hakimiyyətin üzərinə atmaq istəyir. “Ermənistan əhalisinin ölkəni kütləvi şəkildə tərk etməsi faktları Köçəryanın da, Sarkisyanın da vaxtında vardı. Yəni bu hal Ermənistana yad deyil. Sarkisyanın, ondan əvvəl Köçəryanın apardığı yanlış, zərərli siyasətin acısını erməni xalqı bu gün də çəkir. Amma bu gün Sarkisyan, öz günahlarını etiraf etmək əvəzinə, ölkəni birdəfəlik tərk edənlərə görə Paşinyan hökumətini ittiham edir. Bu da absurddur və illərdir ki, Ermənistanda vəziyyət bu cürdür. Əslində, ermənilərin ölkəni birdəfəlik tərk etməsi məsələsinin əsası Köçəryan və Sarkisyanın hakimiyyət illərində qoyulub. Bir xunta rejimi vardı və onlar əhalini istismar edirdi. Xaricdəki erməni lobbisi, daxildəki revanşist qüvvələr, “Daşnaksütyun” partiyası, Köçəryan, Sarkisyan və kilsə birləşmişdi, erməni toplumunun sadəlövhlüyündən və imkanlarından öz xeyirlərinə istifadə edirdilər. Xalq kasıb, məzlum gününə salınırdı. Nəticə də bu idi ki, insanlar ilk fürsətdə ölkədən qaçırdılar. Bu gün də qaçırlar”.
M.Göyüşlünün sözlərinə görə, 44 günlük müharibə ermənilərə çox böyük zərər vurdu və kasıb əhali daha da kasıbladı, çıxılmaz duruma düşdü. M.Göyüşlü deyir ki, nəinki Ermənistandakı, eləcə də Xankəndidə və ətrafda yaşayan ermənilər başbilənlərinin yanlış siyasətindən cana doyub qaçmağa çalışırlar. O qeyd etdi ki, bütövlükdə sadə ermənilər Ermənistandan qaçmağa meyllidir və bunu özləri etiraf edir. M.Göyüşlünün sözlərinə görə, baş verənlərin hamısının səbəbkarı Ermənistanın həm keçmiş rəhbərliklərinin, həm də indiki rəhbərliyinin yanlış və zərərli siyasətidir: “Əhalinin bir daha geri qayıtmamaq şərtilə ölkəni tərk etməsi Ermənistanın həm keçmiş, həm də indiki rəhbərliyinin həyata keçirdiyi yanlış siyasətin nəticəsidir. Bu da Ermənistan dövlətinin iflasa uğraması deməkdir. Son zamanlar Paşinyanın konstruktiv mövqe göstərmək istədiyini müşahidə edirik. O, Azərbaycanla, Türkiyə ilə normal münasibətlər, dialoq qurmaq istəyir. Yəqin ki, Paşinyan bu yolla Ermənistanı iqtisadi-sosial problemlərin məngənəsindən çıxarmaq istəyir. Düzdür, Ermənistanın konstruktiv mövqe nümayiş etdirmək istəməsinin ona faydası var. Amma bir məsələ var ki, kommunikasiyalar bərpa olunub sərhəddlər tam açılandan sonra ermənilərin Rusiyaya, Türkiyəyə, eləcə də Gürcüstan, Azərbaycan vasitəsilə Avropaya, Amerikaya getmək imkanları yaranan kimi ölkəni tərk edəcəklər. Yəni Ermənistanın iflası, məhv olma həddinə qədər gəlib çıxması qaçılmazdır. Çünki bu ölkənin indiki və keçmiş hakimiyyəti bu vəziyyəti yaradıblar və bunu da etiraf edirlər” - deyə M.Göyüşlü qeyd etdi.
İradə SARIYEVA
