Ermənistanda Rusiyameylli və Qərbmeylli siyasi qüvvələr arasında yeni qarşıdurma meylləri müşahidə edilməkdədir. Bu, Ermənistan parlamentindəki müxalif “Hayastan” fraksiyası deputatlarının çağırdığı növbədənkənar iclas fonunda özünü daha qabarıq büruzə verdi.
Xatırladaq ki, hakim fraksiyadan olan deputatlardan heç biri iclasa gəlməyib və qeydiyyatdan keçməyib. Beləliklə də. əsası keçmiş prezident Robert Köçəryan tərəfindən qoyulmuş fraksiyanın çağırdığı iclas hüquqi qüvvə kəsb etməyib. Reqlamentə uyğun olaraq ayrılmış 4 saat ərzində iclasın keçirilməsi üçün zəruri olan 54 millət vəkili parlamentə yığışmayıb. “Azatutyun” radiosu yazır ki, iclasda iştirak üçün cəmi 30 deputat qeydiyyatdan keçib. İclası aparan spiker müavini Akop Arşakyandan başqa, qeydiyyatdan keçən deputatların hamısı müxalifət fraksiyasının üzvləri olub. Müxalifətin parlamentin növbədənkənar iclasında müzakirə üçün təklif etdiyi məsələ Azərbaycan və Ermənistan arasında dövlət sərhədinin delimitasiya və demarkasiyasına aid olub. Müxalifətin bəyanat layihəsində “Azərbaycanın təcavüzü” pislənir, Ermənistan hökumətindən delimitasiya və demarkasiya məsələsinin “Dağlıq Qarabağ xalqını öz müqəddəratını təyinetmə hüququndan” ayırmaması tələb olunurdu. Müxalifət Azərbaycan tərəfi ilə danışıqlarda heç bir yazılı və ya şifahi razılıqların verilməməsini tələb edirdi. Müxalifətin təklifində deyilirdi ki, Qarabağ və Ermənistanın əsas hüquqlarını pozan razılaşma əvvəlcədən etibarsız sayılmalıdır. “Azatutyun” yazır ki, iqtidar müxalifətin daxili siyasi spekulyasiya ilə məşğul olduğunu bildirib. Parlamentin “Hayastan” fraksiyasından olan vitse-spikeri İşxan Saqatelyan iqtidarın iclası nəyə görə pozduğunu belə izah edib: “Bu, beynəlxalq birliyə yeni Ermənistan parlamentinin, müxalifət və iqtidarın vahid mövqeyi barədə mesajı olmalı idi. Lakin onlar bundan boyun qaçırdılar, çünki Türkiyə və Azərbaycanın əleyhinə kəskin və tələbli bəyanatlardan çəkinirlər. Onların deməyə sözləri olmadığından, necə deyərlər, günahdan uzaq olmaq üçün boykota getdilər”. Hakim “Vətəndaş Müqaviləsi” partiyasının parlament fraksiyasından xarici əlaqələr komissiyasının üzvü Anuş Beqloyan etiraf edib ki, iclasa gəlməmək barədə vahid qərar olub: “Parlamentin bəyanatları beynəlxalq birliyə ən ciddi mesajların verilməsi üçün ən ciddi alətlərdən biridir və bu alətdən ünvanlı, vaxtlı və ciddi mesajların, həqiqətən də beynəlxalq birliyə ünvanlanmış mesajların verilməsi üçün istifadə edilməlidir. Amma biz görürük ki, müxalifətin bəyanatı daxili siyasi, mən hətta deyərdim ki, təbliğati-spekulyativ xarakter daşıyır”. “Azatutyun” yazır ki, “Hayastan” bloku sözügedən bəyanatı artıq ikinci dəfədir müzakirəyə çıxarmağa çalışır. Lakin Rusiyameylli düşərgəyə daxil olan müxalifətin hər iki cəhdi iflasla nəticələnib. “Hayastan” blokunun rəhbəri Seyran Ohanyan bu fonda bildirir: “Sərhədlərin delimitasiyası və demarkasiyası, eləcə də ərazi bütövlüyünün qarşılıqlı tanınması Qarabağın taleyinə yağlı xaç olacaq”. Onun fikrincə, delimitasiya və demarkasiya məsələsi “Dağlıq Qarabağ Respublikası”nın öz müqəddəratını təyinetmə məsələsi üçün kifayət qədər ciddi təhlükə yaradır.
Keçmiş müdafiə nazirinin sözlərinə görə, Ermənistanla Azərbaycan arasında sərhədin bu gün harada olduğunu heç kim bilmir, çünki iki respublika SSRİ-nin tərkibinə daxil olduqdan sonra kifayət qədər ciddi dəyişikliklərə məruz qalıb. O qeyd edir ki, sərhədlərin delimitasiya və demarkasiyasını həyata keçirmək üçün ciddi araşdırmalara ehtiyac var. Ohanyan məhz bu proseslərin aparılması üçün lazımi şəraitin olmadığını bildirir: “Ermənistan hakimiyyəti bütün prosedurları pozaraq, şifahi və yazılı razılaşmalara razıdır. Söhbət, xüsusilə 10 noyabr 2020-ci il tarixli bəyanatdan başlayaraq əldə olunmuş razılaşmalardan gedir. Biz özümüzü kifayət qədər çətin hərbi-siyasi vəziyyətə salmışıq. Məsələn, Türkiyə-Azərbaycan tandemi artıq Ermənistanın bilavasitə sərhədlərində yaranıb”. Ermənistanın “Past” nəşri yazır ki, bu vəziyyətdə hakimiyyət Rusiyameylli müxalifəti susdurmaq üçün Qərbə bağlı qüvvələri işə salmağa hazırlaşır: “İndi Ermənistanda Qərb maliyyəsi ilə fəaliyyət göstərən ictimai sahənin nümayəndələri, üstəlik də siyasi sahəyə cəlb olunanlar öz standart xətlərindən və xüsusən də Rusiya əleyhinə kampaniyadan başqa, bu günlərdə yeni proqram həyata keçirirlər. Onların qarşısında hakimiyyətin siyasi kursuna uyğun olaraq kifayət qədər aktiv daxili siyasi fəaliyyət göstərmək və müvafiq tezislər yaratmaq vəzifəsi var. Bununla əlaqədar Qərbə bağlı nümayəndələrlə mühüm görüş keçirilib. Görüşün əsas mövzularından biri Ermənistanın xarici siyasət vektorunun dəyişdirilməsi məsələsi, eləcə də Ermənistan-Türkiyə münasibətləri ilə zəruri təbliğat işlərinin həyata keçirilməsi olub. Sonuncu məsələ fəaliyyətdə olan hakimiyyətə hazırda hava və su kimi lazımdır. Həmçinin məlumatlarımız var ki, qeyd olunan dairələrin qarşısına müəyyən “doza”da hakimiyyətə qarşı tənqidlə çıxış etmək vəzifəsi qoyulub. Məqsəd odur ki, birincisi, öz açıq iqtidaryönümlülüklərini “yandırmasınlar”, ikincisi, mümkün qədər Rusiyayönlü müxalif sahənin ağzını bağlasınlar”.
Samirə SƏFƏROVA
