Ermənistan hökümətinin beynəlxalq təşkilatlara müraciət edərək “Azərbaycan erməni hərbçilərinə işgəncə verib” yalanını əlində bayraq etməsinə baxmayaraq, istər 44 günlük müharibə dövründə Azərbaycana əsir düşən erməni hərbçiləri, istərsə də 10 noyabr razılaşmasından sonra ərazilərimizdə diversiya törətmək istəyərkən saxlanılan terrorçular Ermənistan hökümətinin yalanlarına, saxtakarlığına və Azərbaycana qarşı haqsız ittihamlarına şərik olmaq istəmədiklərini göstərirlər.
Onların bəziləri fürsət tapıb həqiqəti deyir və Ermənistanın yalanlarını ifşa edirlər. 44 günlük müharibə zamanı Suqoşuvanda yeddi nəfərlə birgə əsir götürülən erməni hərbçi Hayk hadisə barədə ətraflı danışıb və azərbaycanlı əsgərlərin onun həyatını xilas etdiyini etiraf edib. “Azərbaycanlı hərbçi atəş açdığımız hissəyə yaxınlaşdı və onu görüb-görmədiyimi soruşdu. 35-40 yaşı olardı. Silahını kənara qoydu və mənə inandığını dedi. O, həmçinin, mənə çıxmağımı və onunla danışmağımı təklif etdi. Mən heç vaxt azərbaycanlı əsgərin etdiyini etməzdim. Çünki o, bunkerdə onu nə gözlədiyini bilmirdi. Adı Vüqar idi. O, siqareti yandırıb mənə uzatdı. Mən yaralı idim və bilirdim ki, bu yara səbəbindən ölə bilərəm. Bu barədə uşaqlara danışdım və bunkerdən çıxmağa qərar verdim. O, mənim yaram haqqında sual verdi və ağrının keçməsi üçün mənə iynə vurdular. Mənə dedi ki, onlar indi gedə bilər, lakin artıq 30 dəqiqədən sonra qoşunlar bura gələcək və biz bunkerdə 20 nəfər belə olsaq, heç bir şansımız yoxdur. O, təslim olmağı təklif etdi. Söz verdi ki, heç kim bizə toxunmayacaq. Bizi Bakıya göndərəcəklər, müharibə başa çatdıqdan sonra isə sadəcə əsirlərlə dəyişəcəklər. Onun yaxşı insan olduğunu gördüm və biz təslim olmağa qərar verdik. Reallıqla üzləşəndə anladım ki, bu xalq mübarizə apara bilər. Biz onları lazım olandan az qiymətləndirməməliyik. Bu bizim ən böyük səhvimiz idi” - deyə Hayk etiraf edib.
Ermənistan mediasının yazdığına görə, Hayk həqiqətən də Ermənistana qaytarılıb və bir müddət sonra ailə həyatı qurub.
Ermənilər özləri açıq şəkildə deyirlər ki, Azərbaycan tərəfdən onlara heç bir işgəncə olmayıb, əksinə, humanistlik, qayğı görüblər. Baxmayaraq ki, Ermənistan hökuməti də yalançı şou düzəldir, onlar İrəvana qaytarılandan sonra həbs edilib işgəncələrə məruz qoyulurlar, məqsədləri də Azərbaycanın əleyhinə yalan ifadə almaq və Azərbaycanda guya əsirlərə işgəncə verildiyini dedirtməkdir.
Hayk özü də etiraf edir ki, Azərbaycanda ona və hərbçi yoldaşlarına heç bir işgəncə verilməyib, əksinə, burada onlara mərhəmət göstərilib.
“Onların öz blogerləri, öz ətrafı Azərbaycanın qaytardığı şəxslərə deyirdilər ki, siz elə bil əsirlikdən yox, kurortdan qayıtmısınız”
Tanınmış hərbi ekspert Tərlan Eyvazov “Bakı-Xəbər”ə şərhində bildirdi ki, bütün hallarda Ermənistanın “hərbi əsirlər” üzərində qurduğu oyunlar iflasa uğrayır, bu ölkənin yanlış təbliğatını elə öz keçmiş hərbçisi ifşa edir. T.Eyvazovun sözlərinə görə, Birinci Qarabağ müharibəsi dövründə ermənilər əsir götürdükləri qadınların, uşaqların, qocaların, bir sözlə mülki əhalinin başına min-bir işgəncələr gətirib və onlarla beynəlxalq hüquq normalarına, humanizmə zidd davranıblar, əsir götürdüklərini geri qaytarmayıblar. T.Eyvazovun qeyd etdiyinə görə, hətta bizim əlaqədar qurumların əlində olan informasiyalarda bildirilir ki, itkin sayılan 5 min nəfərin 400 nəfəri sağdır və Ermənistanda saxlanılır: “Lakin Ermənistan Birinci Qarabağ müharibəsi zamanı əsir gördüyü və işgəncələrə tab gətirib qalan insanları Azərbaycana qaytarmayıb. Ermənistandan fərqli olaraq, Azərbaycan həm Birinci Qarabağ müharibəsində, həm də Vətən savaşı dediyimiz İkinci Qarabağ müharibəsində əsir götürdüyü erməni hərbçilərini öz ölkələrinə qaytarıb. Azərbaycan, Ermənistandan fərqli olaraq, həmişə beynəlxalq öhdəliklərini yerinə yetirib və indi də yetirir. Azərbaycan müharibdə bizə əsir düşən hər bir insan haqqında müvafiq orqanlara məlumat verdi və həmin orqanlar da Ermənistana bu şəxslər haqqında informasiya ötürdü və əsirlər geri qaytarıldı. Prezident Brüsseldə olarkən İspaniya mətbuatına müsahibəsində də bu məsələyə ətraflı toxundu. Yəni dünyaya bildirdi ki, biz əsirləri qaytarmışıq. Bizdə erməni hərbi əsirləri olmadığı açıq şəkildə bildirilib. Amma Ermənistan və onun havadarları bizim üstümüzə şər atmaq istəyir ki, guya bizdə “hərbi əsir” var. Ermənistanın yalandan “Azərbaycanda bizim hərbi əsirlərimiz var” deməsinin kökündə bu ölkənin öz itkilərini gizlətmək cəhdi durur. Paşinyan höküməti itkiləri gizlətmək üçün ölmüş şəxsləri “əsir” kimi qələmə verir. Çünki Ermənistanın bu müharibədə minlərlə ölmüş əsgəri var. Həmin əsgərlərin valideynləri hökümətdən övladlarının ya ölüsünü, ya da dirisini tələb edirlər, hökümət də çıxış yolunu yalan danışmaqda görür və onlara uşaqlarınının “əsirlikdə” olduğunu deyir. Ermənistan o hərbçilərin cəsədlərini tapa bilmir və yalan danışır. Baxmayaraq ki, bizim müvafiq orqanlar Rusiyanın və Qızıl Xaç Komitəsinin xətti ilə öldürülmüş erməni əsgərlərinin cəsədlərini Ermənistana verir”.
Haykın etdiyi etirafa gəlincə, T.Eyvazovun sözlərinə görə, burada təəccüblü heç nə yoxdur, Azərbaycan bir dövlət kimi həmişə humanizm prinsiplərinə, beynəlxalq qaydalara əməl edib: “Haykın etirafına gəlincə, burada yalan heç nə yoxdur. Hayk da təsdiqləyir ki, onların burada saxlanma şəraiti, onlara münasibət necə olub. Dünya da erməni hərbçilərinin saxlanma şəraiti, onlara münasibətlə, vəziyyətləri ilə bağlı dolğun məlumatlara malik olub. Doğrudan da həm onların məhkəmə prosesləri, həm saxlanma şəraitləri, həm də digər məsələlər bütün dünyaya göstərildi, amma heç bir beynəlxalq təşkilat bir noqsan tapa bilmədi. Hətta onların öz blogerləri, öz ətrafı Azərbaycanın qaytardığı şəxslərə deyirdilər ki, siz elə bil əsirlikdən yox, kurortdan qayıtmısınız. Bilirsiz ki, Ermənistanda bu baxımdan da vəziyyət çox pisdir, Azərbaycandan qaytarılanlara qarşı amansız davranılır. Halbuki, həmin şəxslərin Azərbaycana qarşı döyüşməsinə, təxribat törətməsinə baxmayaraq, Azərbaycan onları məhkəmədə vəkillə təmin etmişdi, yaşamaq şəraitlərini yüksək səviyyədə təmin etmişdi və sair. Haykın Azərbaycanın humanistliyini, hərbçilərimizin onlarla insani davranışlarını etiraf etməsi Ermənistan hökumətinin şər kampaniyasını ifşa edir. Çox az adam tapılır ki, işgəncə altında yalan danışmır, həqiqəti deyə bilir. Çünki Azərbaycanın Ermənistana təhvil verdiyi şəxslər burada başqa cür danışırdı, amma ora getdikdən sonra təzyiq və işgəncə altında onlara verilən mətni oxuyurlar. Görünür, İkinci Qarabağ müharibəsində Azərbaycana əsir düşən Hayka da Azərbaycanla bağlı suallar verilib, o da vicdanının səsinə qulaq asaraq həqiqəti söyləyib.
Ermənistan höküməti müharibədə Azərbaycan tərəfə əsir düşənlərdən intiqam alır və ona görə müxtəlif zorakı üsullrdan istifadə edir”-deyə ekspert bildirib.
İradə SARIYEVA
