Azərbaycan Prezidenti İlham Əliyev ilə dəmir yolunun tikintisi ilə bağlı əldə olunan razılaşmalar onların icrası zamanı regiondakı siyasi, iqtisadi mühiti, eləcə də təhlükəsizlik mühitini dəyişəcək.
Bunu Ermənistanın baş naziri Nikol Paşinyan bu gün hökumətin iclasında bildirib.
Bundan əvvəl Paşinyan qeyd edib ki, Prezident İlham Əliyevlə Brüsseldə keçirilən görüşdə Yeraşx - Culfa - Ordubad - Meğri - Horadiz dəmir yolunun tikintisi ilə bağlı razılıq əldə olunub.
Qeyd edək ki, dekabrın 14-də Brüsseldə Azərbaycan Respublikasının Prezidenti İlham Əliyevin Avropa İttifaqı Şurasının Prezidenti Şarl Mişel və Ermənistan Respublikasının baş naziri Nikol Paşinyan ilə birgə görüşü keçirilib. Görüşdə Azərbaycanın işğaldan azad edilmiş ərazilərinin minalardan təmizlənməsi məsələsi gündəliyə gətirilib, Avropa İttifaqının bu istiqamətdə Azərbaycana texniki yardım göstərməyə hazır olduğu bildirilib.
Ermənistan-Azərbaycan dövlət sərhədinin delimitasiyası ilə bağlı hər iki tərəf müvəqqəti işçi qrupun yaradılması ilə bağlı razılığa gəliblər. Eyni zamanda, kommunikasiya və nəqliyyat xətlərinin açılması məsələsi geniş müzakirə olunub. Ermənistan tərəfi öz ərazisindən dəmir yolu xəttinin çəkilməsi ilə bağlı üzərinə düşən öhdəliyi təsdiq edib. Bildirilib ki, Ermənistan tərəfi dəmir yolunun çəkilişinə tezliklə start verəcəkdir. Burada gömrük və sərhəd nəzarət məsələlərinin qarşılıqlı prinsip əsasında təmin olunması barədə razılığa gəlinib.
Paşinyanın ifadəsindən onun Azərbaycanın regionun sımasını dəyişməklə bağlı yaratdığı reallıqları qəbul etməsini kimi dəyərləndirmək olarmı?
Politoloq Yeganə Hacıyeva “Bakı-Xəbər”ə açıqlamasında bildirdi ki, Nikol Paşinyan nəhayət müharibədən sonra keçirilən görüşlər və əldə olunan nəticələr barədə xalqı məlumatlandırır: “İndiyə qədər o təfsilatlı açıqlama vermirdi. Əsasən ziddiyyətli fikirlər səsləndirirdi. Bizim mövqeyimiz tam aydın idi. Regionda sülhün və təhlükəsizliyin davamlı olması üçün əlimizdən gələn nə varsa edirdik. Təhlükəsizlik risklərin aradan qaldırılması üçün Ermənistandan da üzərinə götürdüyü öhdəliklərin yerinə yetirilməsini istəyirik. Paşinyan görür ki, xalqa yalan danışmağın heç bir faydası yoxdur. Regionun simasını biz yaratdığımız reallıqlarla dəyişirik. Buna mane olan ölkə Ermənistandır. Dəfələrlə izah etməyə çalışırıq ki, Ermənistanın götürdüyü öhdəliklərə əməl etməsinin ən böyük faydası elə həmin ölkənin özünədir. Sanki Paşinyan üzərinə götürdüyü öhdəliklərin Avropada təsdiqlənməsini həyata keçirdi. Bundan sonra bir qədər rahatladığı üçün belə danışdı. Ortada qeyri-adi heç bir razılaşma yoxdur. Əvvəlcədən razılaşdırılan detalları Paşinyan indi etiraf etməyə başlayıb. Paşinyanın bu reallıqlar məhz Avropa səfərindən sonra elan etməsi onun Moskvadan daha çox Qərbə güvəndiyini təsdiqləyir. İş burasındadır ki, Moskvanın vasitəçiliyi ilə əldə olunan razılaşmalara əməl etmək kimi öhdəlikləri yerinə yetirəcıyinə dair vədi Avropaya verməklə Paşinyan həm də böyük maliyyə qazanır. Avropa Birliyi və Şərq Tərəfdaşlığının ayırdığı qrantların həcmi milyardlarla ölçülür. Onun dediklərini İlham Əliyev bir ildi deyir. Elə bir vəziyyətdir ki, ermənilər xəbərləri həm də Avropadan alırlar. Rusiyanın vasitəçiliyi ilə baş tutan görüşıərlə bağlı ictimaiyyət geniş məlumatlandırılmayıb. Ancaq indi Avropa mediası əldə olunan razılamalardan yazır. Bu səbəbdən də Nikol Paşinyan bunu etməyə məcbur idi. Brüseldə yeni nəsə qəbul olunmayıb. Bütün razılaşmalar Azərbaycan Prezidentinin səsləndirdiyi fikirləri ilə bağlıdır. Qətiyyətli mövqe ifadə olunub ki, Zəngəzur açılmasa, Laçın dəhlizi də olmayacaq”.
Məhəmmədəli QƏRİBLİ
