“Rusiya sülhməramlılarının xidmət etdiyi ərazidə buna imkanın olmadığını dərk edərək, onlar dövlət sərhədində hərbi təxribatlar törətməyə cəhd göstərirlər”. Bunu Prezident İlham Əliyev İspaniyanın “El Pais" qəzetinə müsahibəsində deyib.
Ölkə başçısı müsahibəsində qeyd edib ki, Rusiya sülhməramlı qüvvələrinin Qarabağda məsuliyyət daşıdığı ərazidən danışırıqsa, vəziyyət Ermənistan-Azərbaycan sərhədində olan vəziyyətlə müqayisədə daha çox sabitdir: “Bunun səbəbi isə, əfsuslar olsun ki, Ermənistanın qisas almaq cəhdlərindən vaz keçməməsidir. İkinci Qarabağ müharibəsində məğlubiyyət onlar üçün çox ağrılı oldu. Bu məğlubiyyət, demək olar ki, onların otuz ildir davam edən “yenilməz ordusu”, “gücü”, “əsgər və komandirlərinin cəsarəti” haqqında müharibə təbliğatını və ideoloji zəminini darmadağın etdi. 44 gün davam edən müharibə zamanı Ermənistan ordusu tamamilə məhv edildi və onlar ötən il noyabrın 10-da kapitulyasiya aktına imza atmaq məcburiyyətində qalaraq, bizim 44 günlük müharibədə geri almadığımız əraziləri geri qaytarmağa razılıq bildirdilər. Buna görə də Ermənistan cəmiyyətində, siyasi spektrində revanşizm əlamətləri görünür. Buna görə də Rusiya sülhməramlılarının xidmət etdiyi ərazidə buna imkanın olmadığını dərk edərək, onlar dövlət sərhədində hərbi təxribatlar törətməyə cəhd göstərirlər”.
Görünən odur ki, Ermənistan tərəfi indiki şəraitdə təxribatları törətmək üçün Azərbaycanla sərhədi daha münasib hesab edir. O baxımdan ölkə başçısının məlum məsələ ilə bağlı izahatını doğru saymaq olarmı?
“Azərbaycan barədə beynəlxalq ictimaiyyətdə yanlış rəy formalaşdırmaq istəyir”
Məsələyə münasibət bildirən hərbi ekspert Ramil Məmmədlinin fikrincə, ölkə başçısının toxunduğu sözügedən məqam reallığı əks etdirir: “Məsələ ondadır ki, Qarabağda Rusiya sülhməramlıları yerləşir. Üstəlik, Ağdamdakı Monitorinq Mərkəzində Türkiyə həbçiləri fəaliyyət göstərir. Bütün bunlar, istər-istəməz, Ermənistan silahlı qüvvələrinin imkanlarını məhdudlaşdırır. Çünki bəlli bir nəzarət var. Rusiya Müdafiə Nazirliyi sülhməramlıların məsuliyyət zonasındakı vəziyyətlə bağlı gündəlik, həftəlik məlumat yayır. Ermənistan tərəfi anlayır ki, hansısa təxribat törətsə, bu qeydə alınacaq. Sonra bu onların əleyhinə işləyəcək. Başqa bir tərəfdən, təxribatlar təkrarlansa, o zaman Azərbaycan antiterror əməliyyatlarına başlaya bilər. Nəticədə nəzarət etdikləri ərazilər əldən çıxacaq. O üzdən, Qarabağda genişmiqyaslı təxribatlardan çəkinirlər. Azərbaycanla sərhəddə isə atəşkəsin Ermənistan tərəfindən pozulmasını qeydə alan üçüncü tərəfin qüvvəsi yoxdur. Ona görə də bəzi hallarda Ermənistan istədiyini edir. Ancaq bu o demək deyil ki, onlar sərhəddə təxribat törətməklə hansısa əraziləri ələ keçirməyə nail olur. Qətiyyən yox. Sadəcə, sərhəddə süni gərginlik yaratmaqla, Azərbaycan barədə beynəlxalq ictimaiyyətdə yanlış rəy formalaşdırmaq istəyir. Guya ki, Azərbaycan sülhün əldə olunmasında maraqlı deyil. Ancaq əslində Ermənistanın sərhəddə təxribatlar törətməsinin bir məqsədi də prosesi uzatmaqdır. Yəni üzərinə götürdüyü öhtəlikləri yerinə yetirməkdən yayınmaq üçün təxribatlar törədir. Məsələnin kökündə dayanan başlıca amil bununla bağlıdır”.
Hərbi ekspert onu da əlavə etdi ki, bu cür metodlarla Ermənistan davamlı şəkildə prosesi yubada bilməyəcək.
Vidadi ORDAHALLI
