Avropa Şurasının prezidenti Şarl Mişelin təşkilatçılığı ilə Azərbaycan və Ermənistan liderlərinin görüşü keçirilib. Görüş nəticəsində Ermənistan öz ərazisindən dəmir yolu xəttinin çəkilməsi ilə bağlı üzərinə düşən öhdəliyi təsdiq edib.
Məlumata görə, tərəflər dəmir yolunun işə salınması barədə razılığa gəlib. Bildirilib ki, Ermənistan tərəfi dəmir yolunun çəkilişinə tezliklə start verəcək. Burada gömrük və sərhəd nəzarət məsələlərinin qarşılıqlı prinsip əsasında təmin olunması barədə razılığa gəlinib. Paşinyan “Facebook” hesabından "Üçtərəfli görüşdə dəmir yolunun istifadəyə verilməsi barədə razılığa gəldik. Ermənistan da İranla və Rusiya ilə dəmir yolu əlaqəsi əldə edəcək” postunu paylaşıb. Prezident İlham Əliyev İspaniya mətbuatına verdiyi müsahibəsində iki ölkə arasında münasibətlərin normallaşdırılması istiqamətində hazırlıqların görülməsinin vacibliyindən danışıb.
Sitat: "Ermənistan istənilən düşmənçilik hərəkətindən, ərazi iddialarından çəkinməli və sülh sazişi üzərində çalışmalıdır. İstənilən halda biz qonşuyuq və bizdən heç kim digər planetə uçası deyil. Biz yan-yana yaşamağı öyrənməli, münasibətlərin, o cümlədən insanlar arasında təmasların normallaşması üçün tədricən zəmin hazırlamalıyıq. Biz açıq şəkildə bəyan etmişik ki, buna hazırıq. Ancaq indiyədək heç bir müsbət siqnal gəlməyib".
Avropa İttifaqı Şurasının prezidenti Şarl Mişel isə bəyanatla çıxış edərək bildirib ki, iki ölkə arasında münasibətlər nizama salınmalı, Cənubi Qafqazda sülhün təmin edilməsi üçün Aİ tərəfindən Azərbaycanın təklif etdiyi sülh müqaviləsinə dəstək kimi qəbul edilməlidir.
Bəyanatdakı daha bir mühüm məqam odur ki, ilk dəfə olaraq Aİ-nin gündəliyinə itkin düşmüş şəxslər mövzusu salınıb və onların taleyinə aydınlıq gətirilməsinin zəruriliyi qeyd olunub. Bu olduqca vacibdir, çünki birinci Qarabağ müharibəsi zamanı Azərbaycan tərəfindən itkin düşmüş 4 mindən artıq şəxsin taleyi hələ də məlum deyil.
Onu da qeyd edək ki, Aİ tərəfindən sərhədlərin demarkasiyası və delimitasiyası məsələsinə də məşvərətçi statusunda dəstək ifadə olunub, həmçinin, Zəngəzur dəhlizi boyunca dəmir yolunda gömrük və sərhəd nəzarətinin qarşılıqlı prinsip əsasında təşkil olunacağı vurğulanıb.
Maraqlıdır ki, görüşdən sonra Ermənistan mediası sanki sükuta qərq olub. Bir sutka ərzində Ermənistanın aparıcı KİV-ləri görüşün nəticələri ilə bağlı heç bir məlumat və ya şərh vermədilər. Bu susqunluğun səbəbini nə ilə izah edə bilərik?
Politoloq Rəşad Bayramov “Bakı-Xəbər”ə açıqlamasında bildirdi ki, ənənəvi olaraq danışıqlardan sonra Ermənistan tərəfi yenə də öz həyasız siyasətini işə saldı, Azərbaycanın suveren ərazisi olan Laçın koridoru barədə iddialar irəli sürərək, prosesi ləngitməyə çalışdı: “Görüş çox vacib nəticələrlə yekunlaşdı. Azərbaycan Brüsseldə növbəti uğurunu prinsipial mövqeyi nəticəsində əldə etdi. Bunun üçün biz yalnız sevinməliyik. Mən əminəm ki, birlikdə növbəti uğurlarımıza addımlayacağıq. Azərbaycan öz ərazi bütövlüyünü tam təmin edəcək və xalq daha böyük uğurlara imza atacaq”.
Politoloqun sözlərinə görə, Azərbaycan Soçidən sonra Ermənistan üzərində növbəti qələbəsini əldə etdi: “Ermənistanın gözləntiləri tam başqaydı. Onlar istəyirdi ki, Brüsseldə Azərbaycan divara dirənsin. Amma bu baş vermədi. Məyus olduqları üçün deməyə söz tapa bilmirlər. Ermənistan yenə iddia edir ki, bəyanatda Zəngəzur dəhlizi ifadə olunmayıb. Bəli Zəngəzur dəhlizi açıq şəkildə ifadə olunmur. Amma Zəngəzur ərazisindən heç bir maneə olmadan xidmətlərin Ermənistan ərazisindən keçməsi ilə bağlı bənd var. Əgər bəyanatdakı “söz oyunu”na başlayacağıqsa, Ermənistan Zəngəzur ərazisindən dəhliz vermirsə, o zaman biz Laçın koridoruna gömrük və sərhəd postları tətbiq edəcəyik. Çünki bəyanatda Laçın dəhlizi ilə bağlı hər hansı bənd yoxdur.
Ermənilər görüşün şokundan ayıla bilmirlər. Bu səbəbdən də, informasiya təxribatlarına iki gün sonra start veriblər”.
Məhəmmədəli QƏRİBLİ
