Müvəqqəti olaraq rus sülhməramlılarının nəzarətində olan Azərbaycan ərazilərində separatçılar qanunsuz əməllərini davam etdirirlər. Lakin onlara “dayan, dur” deyilmir. Halbuki, adlarını sülhyaratma qüvvələri qoyub orada xidmət edən kontingent ermənilərə qanunsuzluqlar törətməyə icazə verməməlidir, amma heç bir iş görmür.
Yayılan məlumata görə, Xankəndidə “geniş funksiya və tapşırıqlara malik polis qüvvələri” yaradılacaq. Bu barədə separatçıların “polis rəisi” Artyom Arutyunyan bildirib. “Onlar “ölkənin” müdafiəsində iştirak edəcək, xüsusi və mühüm obyektləri mühafizə edəcək, xüsusi yüklərin daşınmasının təhlükəsizliyini təmin edəcəklər”. Onun sözlərinə görə, “qanun layihəsinin qəbul edilməsi” zərurəti 2020-ci il müharibəsi nəticəsində yaranmış vəziyyətlə bağlıdır.
Gördüyümüz kimi, Rusiya sülhməramlılarının gözləri qarşısında Qarabağda ermənilər “dövlət” qurur, dövlət üçün lazım olan strukturları yaradırlar, indi polis yaratmağa başlayıblar, sabah da başqa “qurum”lar yaradacaqlar. Yəni Xankəndidə “ mini-dövlət “ quruculuğu gedir və separatçıların açıqlaması da buna bir sübut.
“Qudlur rejimin sonu bilavasitə, istənilən an Bakının əlindədir”
Məsələni şərh edən siyasi ekspert Rövşən Rəsulov “Bakı-Xəbər”ə bildirdi ki, biz zaman-zaman Qarabağ separatçılarının boş və gülünc bəyanatlarının şahidi olmaqdayıq. “Onlar gah Xankəndidə və Rusiya sülhməramlılarının müvəqqəti nəzarət etdiyi ətraf ərazilərdə “çoxmənzilli binaların inşası”, gah “yol infrastrukturları”, gah da hansısa “xüsusi funksiyalı polis qüvvələrinin yaradılması” ətrafında sərsəm manipulyasiyalar nümayiş etdirirlər. Halbuki, bugünə qədər verilən “vədlərinin” heç biri realizə olunmayıb və olunmayacaq da. Birincisi, bu gün Xankəndidə və ətraf ərazilərdə Azərbaycan vətəndaşı hesab edilən ermənilərin təhlükəsizliyini məhz Bakının dəvətilə müvəqqəti yerləşdirilmiş Rusiya sülhməramlı kontingenti təmin edir və əgər separatçılar hansısa “polis” funksiyasından dəm vururlarsa, bilməlidirlər ki, həmin planlarına görə başları çox möhkəm ağrıya bilər. Xüsusilə unutmamalıdırlar ki, bu gün Xankəndinin bütün pəncərələri Azərbaycanın nəzarəti altındadır və sizi inandırım ki, quldur rejimin sonu bilavasitə, istənilən an Bakının əlindədir və belə davam edəcəksə, daha əvvəllər verdiyimiz proqnozlarımız özünü doğruldacaq”. R.Rəsulovun sözlərinə görə, onlar unutmamalıdırlar ki, vaxtilə Şuşaya köçürmək istədikləri saxta “parlament” binaları bir anın içində başlarına uçuruldu və həmin vəziyyətin Xankəndidə də təkrarlanmayacağına kimsə, hətta Rusiya sülhməramlıları da zəmanət verə bilməz. “Daha bir fakt budur ki, bu gün Qarabağ torpaqlarımızda separatçı-quldurların qondarma bayraqları da endirilib və bu şərtlərin hər biri Bakının tələbləri ilə həyata keçirilir. Bütün bunlardan dərs çıxara bilməyən, ya da dərs çıxarmaq istyəməyən separatçıların indi də durub “xüsusi polis alayları” yaratmaq planlarından danışmaları onlara çox baha başa gələcək.
Yeri gəlmişkən, separatçılar hələ də Qarabağın statusu ilə bağlı sərsəm xəyallarına dalırlarsa, biz Prezident İlham Əliyevin bu barədə irəli sürdüyü bəyanatını bir daha xatırlada bilərik. “Qarabağın statusu barədə hər hansı müzakirəyə dönüş yoxdur, Dağlıq Qarabağ münasişəsi başa çatıb”, deyə vurğulayan dövlət başçımızın fikirləri kifayət qədər net və dəqiqdir. Bu baxımdan, Qarabağ ermənilərinin üç çıxış yolu var – ya Azərbaycanın qanunlarına baş əyməli, buna razı deyillərsə yüklərini toplayıb ölkəmizin ərazisini tərk etməli, ya da hər iki tələblərə riayət etməyəcəklərsə burunları əzilməlidir. Artıq dəfələrlə onlara xəbərdarlıqlar edilib və bu xəbərdarlıqların da bir sonunun olacağına şübhə etməməliyik.
Və əgər bu gün Brüsseldə Ermənistan növbəti dəfə dalana sıxışdırılırsa, Azərbaycanın şərtləri önə sürülürsə, dövlət başçımız Zəngəzur, Laçın dəhlizləri ilə bağlı qətiyyətli bəyanatlarını səsləndirirsə, istər İrəvan, istərsə də Xankəndidəki tör-töküntülər bütün bunlardan məntiqli nəticə hasil etməyə məhkumdur, təbii ki, bütün məsuliyyətləri özləri daşıyır, özləri cavabdeh olacaqlar, necə deyərlər, olacağa çarə yoxdur”- deyə R.Rəsulov vurğuladı.
İradə SARIYEVA
