Türkiyənin xarici işlər naziri Mövlud Çavuşoğlunun ölkəsi və Ermənistan arasında münasibətləri normallaşdırmaq üçün xüsusi nümayəndə təyin edəcəklərini açıqlaması erməni tərəfində şok effekti yaradıb. Müxalif qüvvələr bu fonda hakimiyyəti növbəti dəfə Ermənistanın maraqlarına xəyanət etməkdə ittiham edir.
Hazırda bu məsələ ilə bağlı hakimiyyət və müxalifət arasında ciddi qarşıdurmanın hökm sürməsi müşahidə edilir. Hakimiyyəti təmsil edən erməni deputat Eduard Ağacanyan məsələ ilə bağlı bildirir: “Biz heç bir ilkin şərt olmadan Türkiyə ilə münasibətləri normallaşdırmağa hazırıq. Söhbət Ermənistanla Türkiyə arasında diplomatik münasibətlərin başlamasından gedir. Bu, heç bir halda Ermənistanın dövlət maraqlarından imtina etməsi demək deyil. Əksinə, biz əminik ki, Türkiyə ilə diplomatik münasibətlərin qurulması Ermənistanın dövlət maraqlarından irəli gəlir”. Bu arada o da məlum olub ki, Türkiyə və Ermənistan arasında münasibətlərin normallaşması istiqamətində Rusiya vasitəçilik edib. Belə ki, Türkiyə ilə Ermənistan arasında münasibətlərin normallaşması Moskvada XİN müavinlərinin "3+2" formatında keçirilən görüşündən dərhal sonra baş verdi. Amma erməni müxalifəti Rusiyanın da maraqlı olduğu bu prosesə qarşıdır. Ermənistanın keçmiş xarici işlər naziri Ara Ayvazyan bu məsələyə “Dostlarınızı özünüzə yaxın, düşmənlərinizi isə daha da yaxın tutun” sitatı ilə münasibət bildirib: “Təbii ki, ilkin şərtsiz dialoqa başlamaq istəyi həmişə olub. Amma Türkiyə ilə uzun müddətdir ki, dialoq yoxdur. Danışıqların hansı gündəmdə aparılacağını bizim Xarici İşlər Nazirliyinin başa düşməsi çox vacibdir”. O qeyd edib ki, həm Ankaranın, həm də Bakının hədəfləri hamıya məlumdur: “3+2” formatının neytrallaşdırılmasından və ATƏT-in Minsk Qrupunun həmsədrliyinin formatına kölgə salmaq cəhdinin ola biləcəyindən ehtiyatlanıram. Biz Ankaradan müsbət siqnallar deyil, daimi tələblər görürük. Mən çox çaşqınam və “3+2” formatının əslində hansı məqsədi güddüyünə şübhə edirəm”. Parlamentdə “Hayastan” fraksiyasının deputatı Qeqam Manukyan isə qeyd edir ki, Türkiyə və Ermənistan liderləri harmonik və sinxron işləyirlər: “Türkiyənin xarici işlər naziri Çavuşoğlu Ermənistanla münasibətləri yaxşılaşdırmaq üçün xüsusi nümayəndənin təyin olunduğunu, İrəvan isə bunu etməyə hazır olduğunu açıqlayıb. Çavuşoğlu ikitərəfli xüsusi nümayəndələrin təyin olunduğunu elan etdi, bu da Ermənistanın davranışını əvvəlcədən bildiyinə işarədir. Buradan belə məlum olur ki, artıq razılıq əldə olunub, lakin hakimiyyət Ermənistan ictimaiyyətini xəbərdar etməkdən çəkinib. Artıq Türkiyənin ilkin şərtləri qəbul edilib, ona görə də Ankara işləməyə hazırdır və nəhayət, Çavuşoğlunun sözlərinə görə, onlar Bakı ilə birgə işləyirlər, bu yəqin Əliyevi qane edib. Ermənistanda hazırkı hakimiyyətin tələb etmədiyi və səssizcə Ankaraya və Bakıya güzəştə getdiyi, eyni zamanda şərti sülh yalvarışları. Suallar, milli kimlik və təhlükəsizlik məsələləri, problemlər masadadır, lakin taleyüklü qərarlar verən insanlar qrupu müstəsna olaraq antimilli arzuları çərçivəsində hərəkət edir”. “Hayastan” fraksiyasının digər deputatı Andranik Tevanyan isə bir qədər də irəli gedərək bildirib ki, Paşinyan kreslosunu qorumaq üçün geosiyasi fahişəliklə məşğuldur. O deyib ki, bu hakimiyyət Türkiyə və Azərbaycana faydalı olmaqda davam edir. Parlamentin “Şərəf duyuram” fraksiyasının deputatı Tiqran Abramyan da məsələyə sərt mövqe sərgiləyib: “Növbəti qapalı, gizli xarakterli prosesin üstü açıldı. Aylar əvvəl Ərdoğan Paşinyanın Gürcüstan baş naziri vasitəsilə müsbət siqnallar verdiyini açıqlamışdı. İndi Ankara Bakı ilə istəyinə nail olur.
Erməni siyasi şərhçi Ruben Abramyan isə bildirir ki, müxaifətin çığır-bağır salmasına baxmayaraq, Ankara ilə İrəvan pərdəarxası danışıqlar aparır: “Türkiyənin xarici işlər naziri bəyan edib ki, Ankara və İrəvan ikitərəfli münasibətlərin normallaşdırılması üçün xüsusi nümayəndələr təyin etmək barədə razılığa gəliblər. Belə çıxır ki, Ermənistan Türkiyənin ilkin şərt kimi Zəngəzur dəhlizinin verilməsi məsələsini ön plana çəkdiyi zaman prosesə başladı. Ermənistan-Türkiyə münasibətləri ilə bağlı təfərrüatın Türkiyə tərəfdən açıqlanmasını nəzərə alsaq, pərdəarxası danışıqlar məsələsi və xüsusi nümayəndələrin təyin edilməsi tamamilə real görünür. Yeri gəlmişkən, bir neçə həftə əvvəl Ermənistanın xarici işlər naziri etiraf etdi ki, Ankara iki ölkəsi arasında formalaşmaq üzrə olan dialoq siyasətində ilkin şərt kimi Zəngəzur dəhlizi məsələsini irəli sürür. Buna dayanaraq əminliklə deyə bilərəm ki, növbəti gizli prosesə start verilib, onun dağıdıcı nəticələrini də sonra görəcəyik”. Erməni politoloq Qaqik Hambaryan isə “Facebook” səhifəsində yazıb: “Alqışlayın: Qarabağ müqabilində Nikolun dövründə dayandırılmış İstanbul-İrəvan uçuşları yenidən açılacaq. Türkiyənin xarici işlər naziri Çavuşoğlunun bəyanatından da təxmin edildiyi kimi, torpaqsız Nikol başda olmaqla, Ermənistan hakimiyyəti Ankara ilə gizli danışıqlar aparıb və Ermənistanla Türkiyə arasında münasibətlərin normallaşdırılması üçün xüsusi nümayəndələr təyin ediləcəyi barədə razılığa gəlib. Türkiyənin xarici işlər naziri “İstanbuldan İrəvana beynəlxalq çarter reyslərinin açılacağını” bildirib, Ankaranın bütün addımlarını Bakı ilə razılaşdırdığını xatırladıb”.
Samirə SƏFƏROVA
