“Ağdam şəhəri nə gündədir, siz də görmüsünüz. İndi bütün dünya bunu görür. Artıq minlərlə insan – siyasətçi, deputat, ictimai xadim, jurnalist, xarici vətəndaş Ağdamda olub və bu dağıntıları görüb. Müharibənin başa çatmasından bir ildən çox vaxt keçir. İndi baxın, bir Avropa təşkilatı bu müsibət, bu fəlakət, bu faşizmlə bağlı bir söz deyib? Yox!”.
Bunu Prezident İlham Əliyev UEFA Konfrans Liqasında pley-off mərhələsinə yüksələn "Qarabağ" futbol klubunun üzvlərini qəbul edərkən deyib.
Ölkə başçısının sözlərinə görə, Avropa qurumları bütün bunları görməzdən gəlir: “Sanki bu heç olmayıb. İndi Ağdam şəhəri yoxdur, tamamilə dağıdılıb, talan edilib və hər tərəf minalanıb. Müharibə başa çatandan sonra biz artıq 200 nəfərə yaxın insanı ya itirmişik, ya da ki, onlar şikəst olub, əlil olub. Amma bir Avropa təşkilatı Ermənistanı bu müsibətə görə qınayıbmı? Yox! İşğal dövründə etnik təmizləməyə görə, Xocalı soyqırımına görə bir Avropa təşkilatı Ermənistanı qınayıbmı? Yox! Həqiqət budur, reallıq budur və əlbəttə ki, biz bu reallığı nəzərə almalıyıq, amma heç vaxt barışmamalıyıq. Necə ki, işğalla barışmamışdıq, ədalətsizliklə barışmamışdıq. Güc topladıq, düşmənə elə zərbə vurduq ki, bütün dünya bizim Qələbəmizlə bağlı artıq bir söz deyə bilmir və bütün dünya məcbur olub bizim tarixi Zəfərimizi qəbul edib. Çünki bunun başqa yolu yoxdur. Nəyə görə? Güc, iradə, birlik, həmrəylik və məsuliyyət”.
Prezidentin sadalanan məqamlara toxunması bir daha Avropa qurumlarının riyakarlığını, ikili standartlardan çıxış etmələrini ortaya qoydu.
“Hər fürsətdə Ermənistanı himayə ediblər”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, Avropa təşkilatları Azərbaycana münasibətdə misli görünməmiş ədalətsiz mövqe sərgiləyir: “Çünki 30 il Ermənistanın işğal olunmuş ərazilərdə törətdiyi vandalizmə, barbarlığa göz yumdular. İşğala rəhbərlik etmiş səhra komandirləri olan Robert Köçəryan, Serj Sarkisyan sonralar prezident oldular. Avropada bu caniləri elə təmtəraqla qarşılayırdılar ki, sanki Qarabağda bütün bu cinayətləri onlar yox, başqa bir planetdən gəlmiş yad məxluqlar törədib. Qarabağın ətrafında yerləşən rayonlarda yaşayış məntəqələri məhv edildi, daşı-daş üstündə qoymadılar. Bütün bunlar dünyada misli görünməmiş vandallıq idi. Ancaq Avropa qurumlarının gözü kor, qulağı kar oldu. Sözügedən hadisələr yaxın tarixdə baş verdiyi üçün hər şeyi yaxşı bilirik. Fransa kimi böyük dövlət Avropa İttifaqının siyasətinin müəyyən olunmasında əsas söz sahiblərindən biridir. Baxmayaraq ki, Fransa Azərbaycanda bir sıra iqtisadi layihələrin həyata keçirilməsində iştirak edib, amma bütün bunlar rəsmi Parisin ədalətli mövqe sərgiləməsinə gətirib çıxarmayıb. Hər fürsətdə Ermənistanı himayə ediblər. İşğalçı ilə işğala məruz qalan tərəfə fərq qoymayıblar. Bir il ərzində nə qədər mülki vətəndaş, hərbçi işğaldan azad olunan ərazilərdə minaya düşüb. Onların bir çoxu ya həlak olub, ya da şikəst olub. Ancaq Avropa qurumları buna görə bir dəfə də Ermənistanı qınamayıb. Hər hansı tələblərlə çıxış etməyiblər”.
Bu baxımdan V.Rəhimzadə hesab edir ki, Avropa təşkilatlarından ədalət gözləmək əbəsdir.
Vidadi ORDAHALLI
