10 noyabr bəyanatı imzalandıqdan sonra Azərbaycan-Ermənistan sərhədində təxtibatlar, terror aktları törətdiklərinə görə hərbiçilərimiz tərəfindən zərərsizləşdirilərək saxlanılan Ermənistanın hərbi qulluqçuları Rusiyanın vasitəçiliyi, xahiş-minnəti nəticəsində Ermənistana qaytarılır. Amma Ermənistanın baş nazirindən tutmuş parlament sədrinə qədər Azərbaycan ordusuna təslim olan Ermənistan əsgərlərini satqın, fərari adlandırırlar.
Artıq Ermənistanın daxilində belə rəy formlaşıb ki, Bakıdakı diversant ermənilər İrəvana qayıtmaqdan imtina edə bilər, bunu siyasilər də vurğulayır. Bu barədə “Ermənistan” fraksiyasının üzvü, deputat Ripsime Stambulyan bildirib ki, Ermənistan hakimiyyətinin münasibətinə görə erməni hərbçiləri bu ölkəyə qayıtmaya bilər: “Ermənistan hakimiyyətinin məhbuslarla bağlı bəyanatı onların Bakıdan Ermənistana qayıtmaq istəməməsinə səbəb ola bilər”.
Bildirilənə görə, sonuncu dəfə Azərbaycandan Ermənistana qaytarılan 10 əsirdən 4-nə cinayət işi açılıb, onlar həbs olunub. Onlar fərarilikdə təqsirləndirilirlər.
“Erməni diversantlarının İrəvana qayıtmaq istəyib-istəməməsi barədə qoy Paşinyan hakimiyyəti və ermənilər düşünsün”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə şərhində bildirdi ki, Ermənistanın daxilində “əsirlər” məsələsindən sui-istifadə etməyə çalışırlar. A.Nağının fikrincə, vəziyyət elədir ki, onlar nədən sui-istifadə etmək istəyirlərsə o onların özlərinə qarşı qayıdır və özlərinə qarşı çevrilir. “Bunlar hamısı da onların haqq yolunda olmadığından, ədalətsizliyindən xəbər verir. Ermənilər yanlış mövqedə olduqlarını və bu yanlış mövqedən uzaqlaşmalı olduqlarını anlamırlar. Ermənistan “hərbi əsirlər” məsələsindən Azərbaycana qarşı təzyiq vasitəsi kimi istifadə etmək istəyirdi və bütün beynəlxalq təşkilatlarda bu qondarma məsələni qaldırmağı bacarmışdılar, ayrı-ayrı ölkələrin rəhbərləri səviyyəsində bu məsələni gündəmə gətirmişdilər. Hamısı müəyyən mövqe bildirirdilər ki, Azərbaycan “bu məsələni həll etməlidir”. Məlumatlara görə, Prezident İlham Əliyevin, Nikol Paşinyanın və Avropa İttifaqının Prezidenti Şarl Mişelin iştirakı ilə bu gün Brüsseldə keçirilən üçtərəfli görüşün gündəliyinə “humanitar məsələlər” adı altında bu məsələ də salınıb. Bununla da ermənilər bu cəfəngiyyatı yenidən gündəmə gətirmək istəyirlər. Əslində, bu məsələni qoymaqda da onlar yanlış mövqedə idi. Çünki özləri də bilirlər ki, onlar hərbi əsir deyillər, terrorçudurlar. 10 noyabr Bəyannaməsindən sonra onlar silahlı dəstələr yaradıb Azərbaycana qarşı terror hərəkətləri törətməyə cəhd göstəriblər. Bu diversantlara terrorçulara göstərilən münasibət olmalı idi və Ermənistan özü də bu şəxslərə terrorçu kimi yanaşmalıdır. Ermənistan azdan-çoxdan obyektiv olmaq istəyirsə belə etməlidir. Azərbaycanın mövqeyi düzgün və obyektiv mövqedir və bu mövqeni də dünyaya çatdırırdı ki, bunlar hərbi əsir deyillər, terrorçudurlar, terrorçuya qarşı necə hərəkət etmək lazımdırsa o cür də hərəkət edirik. Onların konkret cinayətləri var və bu cinayət onların konkret ifadələri ilə sübut olunub, Azərbaycan məhkəmələrinin bununla bağlı qərarı var”.
A.Nağı təəssüflə qeyd etdi ki, dünyanın bəzi ölkələri, beynəlxalq təşkilatlar Ermənistanın yalanlarını daha çox dəstəkləyir və burada eyni zamanda bir xristian təəssübkeşliyi də var. “İndiki şəritdə Azərbaycan dövləti humanistlik göstərərək cinayət, terror hərəkəti törətmiş erməni hərbçilərinin bir qismini Ermənistana qaytarır. Bilirsiz ki, bu məsələ cəmiyyət və müxalifət tərəfindən Ermənistan hakimiyyətinə qarşı bir təzyiq kimi istifadə olunur ki, hakimiyyət “əsirlərin” hamısını geri qaytara bilmir. Bakıda saxlanılan erməni diversantlarının valideynləri də aksiyalar keçirir, hakimiyyətin qarşısına bu tələbləri qoyur, müxalifət parlamentdə hakimiyyətə qarşı tələblə çıxış edir. Hakimiyyət bu təzyiqi bir azca səngitmək üçün hər yerdə bunu deyir. Azərbaycan da humanistlik edərək diversantları İrəvana qaytarır, sonuncu dəfə də 10 nəfər qaytarılıb. Onlardan da, bildiyim qədər, 5 nəfəri barədə cinayət işi açılıb. Bu, dediyimiz kimi, bumeranq reaksiyasıdır. Onların Azərbaycana qarşı təzyiq kimi istifadə etdikləri məsələ indi özlərinə qarşı çevrilib. Ermənistanda “əsirlər” dedikləri diversantlara cinayət işi açırlar, açmalıdırlar da. Çünki mən Ermənistanın istintaq komitəsinin məlumatını oxudum ki, onlar həm 44 günlük müharibə dövründə, həm də 16 noyabr 1 günlük hərbi qarşıdurma zamanı Azərbaycan ordusunun, əsgərlərinin qarşısında tab gətirmədilər, heç müqavimət də göstərmədilər, nizamnamə qarşısında borclarını yerinə yetirə bilmədilər, buna cəsarətləri çatmadı. O ifadəni də istintaq komitəsinin məlumatında işlədirlər ki, mövqelərini qoyub qaçdılar. Özləri deyir ki, əsgərlər də, zabitlər də Azərbaycan ordusuna müqavimət göstərməyib qaçıblar. Bu gün Ermənistan hakimiyyəti “hərbi əsirlərə” qarşı cinayət işi açırsa, bu, ölkə müxalifəti tərəfindən kəskin tənqid olunur, açmırsa, onlar cəzadan kənarda qalırlar. Ona görə də Paşinyan höküməti dilemma qarşısında qalıb. Erməni diversantlarının İrəvana qayıtmaq istəyib-istəməməsi barədə qoy Paşinyan hakimiyyəti və ermənilər düşünsünlər. Onlar diversantdılar və bütün hallarda törətdikləri təxribatlara görə cəzalandırılmalıdırlar. Məsələ burasındadır ki, ola bilsin, ermənilərin “hərbi əsirlər” adlandırdığı terrorçuların, cinayətkarların bir qismi heç Ermənistana qayıtmaq istəməsin, bu tam mümkündür. Bu diversantların Ermənistana getməkdən imtina edib ya Azərbaycanda qalmaq, ya da üçüncü bir ölkəyə getmək istəməsi gözləniləndir. Amma Azərbaycan onları üçüncü ölkəyə təhvil verməli deyil, terrorçular cəzalarını Azərbaycanda çəkməlidirlər. Yəni maraqlı nüanslar ortaya çıxa bilər, Bakıda saxlanan diversantlar geri qayıtmaqdan imtina edə bilər, yaxud onların valideynləri, yaxınları Azərbaycan tərəfə müraciət edib “onları Ermənənistana qaytarmayın” deyə bilərlər. Ermənistan çoxbilmişliyindən özünü növbəti dəfə çətinə salıb. Belə bir situasiya yaranıb və hesab edirəm ki, Azərbaycan rəhbərliyi də bu situasiyadan kifayət qədər istifadə edib düzgün mövqe tutur. Belə də olmalıdır, başqa cür olmamalıdır. Əks tərəfdən çıxılmaz bir vəziyyətdə qalır, hara addım atırsa qarşısına uğursuzluq çıxır. Bu reallıqdır. Bu o vaxta qədər davam edəcək ki, onlar Azərbaycanın regionda lider dövlət olduğunu qəbul etsinlər, Azərbaycanın və Türkiyənin bir yerdə güc mərkəzi olduğunu bilsinlər, bu güc mərkəzinin qarşısında təslim olsunlar, real kapituliyasiya sənədi imzalasınlar və Türkiyə ilə Azərbaycanın bir yerdə dedikləri ilə oturub-dursunlar. Onlar üçün çıxış yolu bundan ibarətdir”- deyə A.Nağı bildirdi.
İradə SARIYEVA
