İkinci Qarabağ müharibəsindən sonra uğradıqları məğlubiyyətdən sonra ermənilər hər addımbaşı Rusiya prezidenti Vladimir Putini ittiham edir, Ermənistanın üzləşdiyi bütün uğursuzluqlara görə onu günahlandırırlar. Bu səbəbdən ermənilər arasında Putinə yönəlik nifrət get-gedə artır.
Erməni mediası indi də belə bir yalan uydurub ki, guya Vladimir Putin prezident olana qədər Qarabağdakı separatçılar danışıqlar stolunda tərəf olub. Putin prezident olandan sonra bu aradan qalxıb: “Bütün bəlalarımızın, faciələrimizin əsas səbəbkarının konkret adı və soyadı, vəzifəsi var. Putin hakimiyyətə gələnə qədər “Artsax” danışıqlar masası arxasında idi, Azərbaycan buna qarşı bir söz deyə bilməzdi. Putin buna son qoydu. Prezident Boris Yeltsin Ermənistana qarşı əsl rus vətənpərvərinin ən isti hisslərini yaşayırdı. Putinin Ermənistanı səmimiyyətlə sevməməsi onsuz da aydındır. Bütün bunların arxasında nə durduğu sualı psixoloqlara aiddir. Ancaq görünən odur ki, fobiyalar və komplekslər çox böyükdür. Əslində buna görə də Putin ölkəmizin suverenliyini və müstəqilliyini məhdudlaşdırmaq üçün hər şeyi etdi. İqtisadiyyatın bütün daxili sahələrini ələ keçirmək üçün Robert Köçəryanın vasitəsilə həyata keçirilən proqram Putinin planının bir hissəsidir. Onun üçün zəif və asılı strateji tərəfdaşın olması vacib idi. Hər şeydə zəif. O cümlədən, seçim azadlığı baxımından”.
Bütün bu deyilənlərin fonunda maraqlıdır, məgər haçansa separatçılar Qarabağ danışıqlarında tərəf olublar ki, Putin buna son qoysun?
“Ermənistanın üzləşdiyi problemlərin kökü Putində yox, onların xəstə ideologiyaya sahib olmalarındadır”
Məsələyə münasibət bildirən sabiq diplomat, politoloq Fikrət Sadıqovun fikrincə, bu, sadəcə ermənilərin uydurduğu növbəti cəfəngiyatdır: “Əvvəla, biz İkinci Qarabağ müharibəsində Ermənistana elə zərbə endirmişik ki, onlar uzun müddət özlərinə gələ bilməyəcəklər. Müxtəlif himayədarları ermənilərə kömək edə bilməyəcək. Ən azından ona görə ki, situasiya tamamilə dəyişib, biz mövqelərimizi yetərincə möhkəmləndirmişik. Bizim yanımızda Türkiyə kimi dövlət var. Digər tərəfdən, biz Moskva ilə elə münasibət qurmuşuq ki, Rusiya Azərbaycanla partniyorluq münasibətlərini inkişaf etdirməkdə daha maraqlıdır, nəinki yoxsul Ermənistanla. Ermənilər bunu dərk etmədikləri üçün Putini az qala milli düşmən elan ediblər. Bütün üzləşdikləri bəlalara görə onu ittiham edirlər. Əslində bütün bunlar absurddur. Ermənistanın üzləşdiyi problemlərin kökü Putində yox, onların xəstə ideologiyaya sahib olmalarındadır. Demək olar, bütün qonşu və region ölkələrə qarşı ərazi iddiaları ilə çıxış edirlər. Qarabağ danışıqlarında separatçıların tərəf olmasına gəldikdə isə, bu kökündən yalan fikirdir. Danışıqlarda separatçılar yox, Ermənistan tərəf olub. Düzdür, Ermənistan bir neçə dəfə separatçıların danışıqlarda tərəf olmasına cəhd edib, amma hər dəfə Azərbaycan bunun qarşısını alıb. Ona görə də güya Putinin separatçıları danışıqlardan kənarlaşdırdığı fikri cəfəngiyatdır”.
Politoloq onu da əlavə etdi ki, ermənilərin Putinə yönəlik tənqidləri bundan sonra nəyisə dəyişə bilməyəcək.
Vidadi ORDAHALLI
