Türkiyənin xarici işlər naziri Mövlud Çavuşoğlu bəyan edib ki, Ankara və İrəvan münasibətlərin normallaşdırılmasını müzakirə etmək üçün xüsusi nümayəndələr təyin edəcəklər. Nazir bunu ölkə parlamentindəki çıxışında deyib:
"Biz münasibətlərin normallaşması üçün bütün addımları yalnız Azərbaycanla birlikdə atacağıq".
Çavuşoğlu İstanbul və İrəvan arasında çarter reyslərinin bərpa olunduğunu da açıqlayıb. Türkiyə rəsmiləri dəfələrlə bəyan ediblər ki, Ermənistanla münasibətlərin normallaşması yalnız Zəngəzur dəhlizinin açılmasından sonra mümkün ola bilər. Ermənistan isə hələlik Zəngəzur dəhlizinin açılışına rəsmi razılıq verməyib. Belə olan təqdirdə Çavuşoğlunun belə bir açıqlama verməsindən hansı nəticəni hasil esə bilərik?
Politoloq Yeganə Hacıyeva “Bakı-Xəbər”ə açıqlamasında bildirdi ki, son bir neçə aydır Ermənistanın Türkiyə ilə sərhədlərin açılması mövzusunda istər erməni dövlət rəsmilərindən, istərsə də siyasi ekpertlərindən, Türkiyə tərəfindən mesajlar eşitməkdəyik:
“Məsələn, Paşınyanın parlament tribunasından Türkiyədən alınan "müsbət siqnallar" və Ermənistanın Türkiyə ilə münasibətləri tənzimləməyə hazır olması ilə bağlı açıqlamaları olub.
Rusiya XİN sözcüsü Zaxarova da iki həftə öncə bu istiqamətdə fikirlərini bildirdi və Rusiyanın, hətta Sürix protokolları ilə bağlı müzakirələrin başlanması üçün vasitəçi ola biləcəyini bəyan etmişdi.
Əlbəttə, bütün bunlar hər iki ölkənin və vasitəçiliyini təklif edən Rusiyanın dialoqa başlamaq üçün hazırlıq mərhələsi kimi görsənirdi.
Ermənistan-Türkiyə sərhədlərinin açılması Ermənistanı uzun müddət iqtisadi baxımdan Türkiyədən aslı vəziyyətə salacaq.
Ermənistanın Türkiyə ilə sərhədləri Azərbaycan torpaqlarının işğalından sonra bağlanıb .Qardaş ölkə Azərbaycana dəstək olmaq məqsədilə belə bir addım atıb. Bu addım Ermənistanı blokadaya salaraq iqtisadi inkişafının qarşısını aldı.
44 günlük Vətən müharibəsindən sonra isə sərhədlərin bağlanması üçün artıq bu əsas yoxdur. Hazırda başqa reallıqlar var.
Azərbaycan Zəngəzur dəhlizindən dəmiryolu və avtomobil yolunun çəkilməsini istəyir. Bu yol həm Azərbaycanının böyük hissəsini Naxçıvanla əlaqələndirəcək, həm də Naxçıvan üzərindən Azərbaycan Türkiyə ilə birbaşa dəmiryolu və avtomobil yolu ilə əlaqə quracaq.
Qarabağ münaqişəsindən əvvəl bu dəhliz isitfadə olunub, amma münaqişədən sonra Naxçıvanla quru əlaqəsi ancaq İran ərazisindən keçməklə olub.
Zəngəzur dəhlizinin yaradılması Avrasiyanın nəqliyyat şəbəkəsinin yeni bir xətti olacaq və bu, bölgə ölkələri arasında, xüsusilə iqtisadi-ticari əlaqələrə müsbət təsir göstərəcək. Türkiyə bu dəhlizdən istifadə edərək, əsas iqtisadi tərəfdaşlarından biri olan Azərbaycana birbaşa quru yolunu reallaşdıracaq. Bu dəhliz Türkiyə üçün həm də Mərkəzi Asiya ilə iqtisadi səmərəli əlaqələrin genişlənməsi deməkdir.
Zəngəzur dəhlizinin Türkiyə üçün önəmi həm iqtisadi, həm siyasi baxımdan vacibdir. Görünür, Çavuşoğluda Zəngəzur dəhlzinin açılacağı ilə bağlı tam əminlik var ki, belə açıqlama verib. Türkiyə heç vaxt Ermənistanın qeyri-konstruktivliyi fonunda onunla münasibətləri normallaşdırmaz”.
Məhəmmədəli QƏRİBLİ
