Ermənipərəst konqresmenlər Konqresin 2022-ci maliyyə ili üçün qanun layihəsinə “Artsax”da minaların təmizlənməsinə görə yardımın daxil edilməsinin salınmasını gündəmə gətiriblər. Sözügedən məsələni 34 konqresmen dəstəkləyib.
Ermənipərəst konqresmen Anna Eşu bəyan edib ki, 2020-ci ildə Azərbaycan və Türkiyə Ermənistana qarşı əsassız müharibəyə başlayıb. Bu müharibə 6000-dən çox insanın həyatına son qoyub və ən azı 90000 etnik erməninin didərgin düşməsinə səbəb olub. Eşu onu da vurğulayıb ki, bölgədə minlərlə partlamamış hərbi sursat qalıb və evə qayıtmaq istəyən ailələr üçün ölümcül təhlükə yaradır.
Əvvəla, Qarabağda ermənilərin nəzarətində olan ərazidə minalar elə də çox deyil və onsuz da təmizləmə işini oradakı rus sülhməramlılar həyata keçirir. Minalar əsasən işğaldan azad olunmuş ərazilərdə basdırılıb. Konqresmenlər, nədənsə, buna görə elə də narahat deyil. İkincisi, konqresmenlərin bu fəaliyyəti Azərbaycanın suverenliyinə hörmətsizlikdir. Azərbaycanın razılığı olmadan belə birtərəfli addım atmaq beynəlxalq hüquqa ziddir. O baxımdan bütün bunları ekspertlər necə dəyərləndirir?
“Birləşmiş Ştatlar uzun illərdir ölkəmizə qarşı dövlət terroru keçirmiş tərəfin yanında yer alır”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafovun fikrincə, ABŞ Konqresinin Qarabagda qanunsuz erməni hərbi birləşmələrinin nəzarətində olan ərazilərin minalardan təmizlənməsi ilə bağlı maliyyə vəsaiti ayırması birincisi beynəlxalq hüquq normalarına sayqısızlıqdır: “İkincisi, müstəqil Azərbaycan dövlətinin ərazisinə qəsddir. Üçüncüsü, Azərbaycanın daxili işlərinə müdaxilə deməkdir. Dördüncüsü, Azərbaycan torpaqlarına təcavüzə etmiş, beynəlxalq birlik tərəfindən tanınmayan üzdəniraq qurumun separatçı rejiminə bilavasitə maliyyə dəstəyi kimi qiymətləndirilməlidir. Hesab edirəm ki, Azərbaycanın Xarici İşlər Nazirliyi bununla bağlı ABŞ hökumətinə etirazını bildirməlidir. ABŞ bu hərəkəti ilə əslində Avropanın enerji təhlükəsizliyində özünəməxsus rolu və imkanları olan Azərbaycan dövləti ilə münasibətlərini özünün bəyan etdiyi müstəvidən kənara çıxarır. Bir növ münasibətləri təhdid edir. Azərbaycan beynəlxalq terrorizmə qarşı mübarizədə, ABŞ başda olmaqla, Qərb koalisiyası ilə əməkdaşlıq etdiyi halda, fərqli münasibətlə üzləşir. Birləşmiş Ştatlar uzun illərdir ölkəmizə qarşı dövlət terroru keçirmiş tərəfin yanında yer alır. Azərbaycan multikultural və tolerant siyasəti ilə seçildiyi halda, ABŞ irqçiliyi, qati millətçiliyi, genosidi həyata keçirən Ermənistanın, Qarabağdakı separatçı rejimin yanında yer alir. Özünün xristian təəssübkeşliyi ilə bağlı mövqedə dayandığını qabardır. Sivilizasiyalar arasında əməkdaşliğa deyil, qarşıdurmaya xidmət etdiyini göstərir. Özünü bütün dunyada insan haqlarının, demokratiyanın qızğın və ardicıl tərəfdarı kimi təqdim edən ABŞ hökumətinə bu sayaq mövqe başucalıgı gətirmir. Ən nəhayət, konqresmenlərin bu mövqeyi, ABŞ-ın Azərbaycanın 44 günlük savaşda əldə etdiyi qələbə nəticəsində Cənubi Qafqaz və onun ətrafinda yaranmış yeni geosiyasi reallıqları həzm edə bilməməsi ilə bağlı amillərdən də qaynaqlanır”.
Bu baxımdan politoloq ABŞ Konqresinin atdığı addımı düzgün saymır.
Vidadi ORDAHALLI
