İkinci Qarabağ müharibəsində əldə olunan ciddi qələbə ermənilərə dərs olmayıb. Məsələ ondadır ki, separatçıların təmsilçiləri qıcıqlandırıcı açıqlamalar verir, ara-sıra Qarabağda müəyyən fəaliyyətlərə cəhd edirlər. Bu baxımdan son vaxtlar Qarabağdakı separatçıların bəzi təxribatları diqqət çəkir.
Ermənistan parlament üzvlərinin Qarabağa gəlişinin Azərbaycan tərəfdən kəskin reaksiya ilə qarşılanmasına münasibət bildirən separatçı rejimin liderlərindən olan Artak Beqlaryan İrəvanda media qarşısında çıxış edərkən həyasızcasına bunları deyib: “İstənilən adam, xüsusilə də erməni yalnız “Artsax hakimiyyəti”nin razılığı ilə “Artsax”a gələ bilər və gəlməlidir. Azərbaycanın buna cavab olaraq hansı demarşı olacağını bilmirəm, aydın olan odur ki, onlar çox əsəbiləşirlər. Amma onlar bundan çəkinməli və etiraf etməlidirlər ki, bizim öz hüququmuz, öz vətənimiz var”.
Bundan başqa, separatçılar Xocavəndin Cəmiyyət kəndi ilə Zəfər yolu arasında tikanlı məftillə sərhəd xətti çəkiblər. İki dövlət arasındakı sərhəd necə olursa, elə bir sərhəd qurulub, bütün mühəndis qurğularını, projektorlarını, tikanlı məftillərini möhkəmləndiriblər. Şuşa şəhərinin ərazisi olan teleqülləyə yaxın yerdə “Xaç postu” adlanan hərbi post qurublar. Düzdür, bundan əvvəl bir sıra buna bənzər təxribatlar törətməyə cəhd edərkən onların qarşısı alınıb. Ancaq son proseslər onu göstərir ki, separatçılar daha da həyasızlaşırlar.
O baxımdan bütün bunları ekspertlər necə dəyərləndirir?
“Sülhməramlıların arxasında gizlənərək belə işlərlə məşğul olurlar”
Məsələyə münasibət bildirən hərbi ekspert Ramil Məmmədli separatçıların sözügedən təxribat xarakterli fəaliyyətlərini bir sıra amillərlə əlaqələndirdi: “Bunun bir səbəbi onunla bağlıdır ki, separatçılar Azərbaycanın əsəbləri ilə oynayıb bizi təxribata çəkmək istəyirlər. Fürsət düşdükcə ora xaricdən qanunsuz səfərlər təşkil edirlər. Məqsəd Azərbaycanı sərt tədbirlər görməyə təhrik edib sülh danışıqları prosesini pozmaqdır. Sonra da Azərbaycanı günahkar çıxarmaqdır ki, guya biz hərbi əməliyyatlara başlamaqla prosesi pozuruq. Bu səbəbdən separatçılar məqsədyönlü şəkildə belə həyasız açıqlamalarla çıxış edirlər. Qaldı ki, onların hansısa postlarda möhkəmlənmələrinə, sərhəd xətti çəkmələrinə, bununla bağlı birmənalı informasiya yoxdur. Ancaq görünən odur ki, separatçı tör-töküntüləri Rusiya sülhməramlılarının arxasında gizlənərək belə işlərlə məşğul olurlar. Bir neçə dəfə Azərbaycan sərt xəbərdarlıq edərək buna bənzər halların qarşısını alıb. Ancaq görünən odur ki, sülhməramlılar bu kimi təxribatların önlənməsində həvəsli görünmürlər. Sülhməramlılar buna mane olsa, separatçılar belə cəsarətlənməz. O üzdən, sülhməramlılar bu cür təxribatların qarşısını almağa borcludur”.
Hərbi ekspert onu da qeyd etdi ki, bu kimi təxribatlar davam edərsə, Azərbaycan sona qədər buna dözməyəcək.
Vidadi ORDAHALLI
