Ermənistan mediası və cəmiyyətində son dövrlərdə Rusiyaya qarşı səslənən ittihamların sayı daha sürətlə artır. Bu hal Ermənistan parlamentinin spikeri Alen Simonyanın Rusiya mediasına müsahibəsində “Qarabağın təhvil verilməsini” bu ölkə ilə əlaqələndirməsi isə prosesi daha da qızışdırıb.
Xatırladaq ki, məsələyə Rusiya sərt reaksiya verib. Rusiya Xarici İşlər Nazirliyi dərhal bəyanat yayaraq, erməni spikerin “Qarabağı Rusiya təhvil verdi” iddiasına etiraz edib: “Bəzi erməni siyasətçilərin Rusiyanın ona məxsus olmayan Dağlıq Qarabağı təhvil verməsi kimi cəfəng fikirləri təkzib etməməsi və mahiyyət etibarilə belə əsassız mülahizələrlə həmrəylik nümayiş etdirməsi dərin təəssüf hissi doğurur”. Belə halların ikitərəfli münasibətə zərəri vurğulansa da, Ermənistanda anti-Rusiya isteriyası genişlənir. Erməni siyasi şərhçi Qalust Qriqoryan məsələ ilə bağlı bildirir: “Ermənistanda, demək olar ki, hamı Rusiyaya və bu ölkə ilə bağlı hər şeyə nifrət edir. Polislərinin arağı rüşvət kimi götürdüyü bir ölkə bu gün özünü super dövlət kimi göstərmək istəyir. Ermənistanın Qərbin timsalında əsl müttəfiqi var. Onlara biz lazımıq, bizə isə onlar. Qərb artıq başa düşdü ki, biz Rusiyadan bezmişik. Müvafiq olaraq, Qərb üçün Rusiyanı həm siyasi, həm də iqtisadi baxımdan neytrallaşdırmaq şərəf işidir. Onların valyutasının hansı sürətlə ucuzlaşdığına fikir versək, deyə bilərik ki, bu proses artıq start götürüb. Ermənistana qarşı xəyanətin qiyməti belə olacaq”. Belə bir vaxtda İrəvanda Milli Demokratik cinahın rəhbərliyi ilə millətçilərin məşəl yürüşü keçirilib. Məsələnin maraqlı tərəfi odur ki, rusların strateji tərəfdaşı və “sadiq dost” olan Ermənistanda məşəl yürüşündə əsas fəallıq nasistlərə məxsus olub. Yürüşdə Rusiya əleyhinə şüarlar səslənib, həmçinin plakatlarda Rusiyanın prezidenti Vladimir Putinin şəkli qaniçən obrazında təqdim olunub. Yürüşdə anti-Rusiya mövqeyi və çıxışları ilə tanınan “Sasna Tsrer” radikal qruplaşmasının üzvü Vahe Qasparyan başda olmaqla bir sıra şəxslər iştirak edib. Mitinq Rusiya əleyhinə olmaqla yanaşı, iştirakçılar Putinin portretini Ermənistanın digər keçmiş liderləri ilə bərabər şəkildə təsvir ediblər. Bunlar fonunda ortaya digər maraqlı məqamlar da çıxıb. Belə ki, Rusiyanın maraqlarının birbaşa əleyhinə olaraq ABŞ Ermənistanda hərbi cəhətdən də möhkəmlənməyə hazırlaşır. ABŞ Silahlı Qüvvələrinin Mühəndislər Korpusunun bəyanatında bu xüsusda qeyd olunur ki, ABŞ Gürcüstan və Ermənistanda müdafiə fəaliyyətini dəstəkləmək üçün yeni obyektlərin tikintisinə vəsaitin ayrılmasını istisna etmir. Məlumata görə, Amerika tərəfi ABŞ-ın müdafiə fəaliyyətinə dəstək məqsədilə Gürcüstan və Ermənistanda yeni obyektlərin layihələndirilməsi və tikintisində, eləcə də köhnə obyektlərin bərpası və təmirində iştirak etməyə hazır olan şirkətlərlə iki ayrı müqavilə bağlamaq niyyətindədir. Bundan başqa, ABŞ-ın sözügedən işlərdə iştirak edən şirkətlərə 45 milyon dollar ayırmaq planının olduğu bildirilib.
Qeyd edək ki, Ermənistanda ABŞ-ın Müdafiə Nazirliyi tərəfindən maliyyələşdirildiyi bildirilən biolaboratoriyalar mövcuddur. Rusiya dövləti bu laboratoriyaların mövcudluğundan narazılığını bildirsə də, Ermənistan hər hansı tədbir görmür. Rusiyanı narahat edən fakt Ermənistanda bu tipli laboratoriyaların Pentaqonun proqramları ilə maliyyələşdirilməsidir. Burada söhbət tibb sahəsində hərbi fəaliyyətdən, bioloji silahın yaradılmasından gedir. Digər tərəfdən, ABŞ-ın İrəvan səfirliyi dünya üzrə ikinci ən böyük diplomatik müəssisəsidir və burada 500-dən çox əməkdaş işləyir. Rus mediası bu xüsusda ona diqqət çəkir ki, MDB məkanının ən yoxsul respublikalarından biri olan Ermənistanda iqtisadi marağı olmayan və ən yaxın perspektivdə də görünməyən Amerika təsəvvürəgəlməz dərəcədə bir bina inşa edib. Əslində, amerkalıların İrəvan civarında səfirliyi deyil, bütöv bir “şəhərciyi” var. Vaşinqtondakı məlumatlı şəxslərdən başqa içəridə nə baş verdiyini heç kim bilmir. Bu gen-bol, böyük kompleksin hər otağında heç olmasa bir əməkdaş əyləşdirilsə, ABŞ-ın Ermənistandakı diplomatik korpusu öz sayına görə bir neçə postsovet respbulikasının heyətini artıqlamasilə geridə qoya bilər. Burada, əslində, klassik anlamda ABŞ-ın Ermənistanda səfirliyi deyil, kəşfiyyat mərkəzi, spesifik obyektlər kompleksi var. Orada amerikalılar üçün maraq doğuran məlumatların gen-bol toplantısı, işlənməsi və kəşfiyyat mərkəzinə ötürülməsi gedir. Bundan başqa, erməni hakimiyyətində yenə xeyli sayda ABŞ və Qərbə bağlı şəxslər yer alır. Soros Fondu həmişəki kimi aktivdir. Rusiyalı politoloq Sergey Markov isə qeyd edir ki, bunlar fonunda ABŞ-ın Demokratiya Sammitinə yalnız Ermənistanın dəvət edilməsi də təsadüfi deyil: “Demokratiya Sammiti daha çox demokratik dövlətlərin deyil, ABŞ-a tabe olan və Vaşinqtonun göstərişlərinə əməl edən dövlətlərin toplantısıdır. Ermənistan üçün bu sammitdə iştirak vacib idi. Belə ki, İrəvan Rusiyanı ABŞ-a dəyişmək istəyir. Ermənistanın iştirak etdiyi forumda səslənən demokratiya çağırışlarına heç kim inanmayacaq”. Qeyd edək ki, Demokratiya Sammitinin başlıca məqsədi sadəcə olaraq digər ölkələri sıxışdırmaq, dünyanı müxtəlif düşərgələrə bölməkdir. Bu, bir növ parçala və hökm sür siyasətinin təzahürüdür. Dövlət səviyyəsində terroru dəstəkləyən Ermənistanın sammitə dəvət olunması fonunda azad siyasət yürüdən Macarıstan, Azərbaycan və Türkiyənin sözügedən sammitə dəvət olunmaması iştirakçıların hansı meyarlara uyğun gəldiyi barədə aydın təsəvvür yaradır.
Samirə SƏFƏROVA
