Prezident İlham Əliyev dəfələrlə çağırışlar edib ki, məscidləri, islam irsinə aid abidələri məhv edən Ermənistandan müsəlman ölkələrinə dost olmaz. Ancaq çox təəssüflər olsun ki, bəzi Ərəb ölkələrinin Ermənistan “sevgisi” azalmır. Hə vasitə ilə Ermənistanla əlaqələri genişləndirməyə can atırlar.
Qətər əmiri Şeyx Təmim bin Haməd əl-Sani Ermənistan prezidenti Armen Sarkisyanla iki ölkə arasında əməkdaşlığın daha da genişləndirilməsi məsələlərini müzakirə edib. O cümlədən, iki ölkə arasında əlaqələrin möhkəmləndirilməsi və əlaqələrin inkişafı, regional hadisələr kontekstində məsələləri müzakirə olunub. Sarkisyan ölkəsindəki reallıqlar barədə məlumat verərək, iqtisadi dəstək istəyib. Sarkisyan Ermənistanın körfəz ölkələri ilə əməkdaşlığı dərinləşdirməkdə maraqlı olduğunu qeyd edərək, bu kontekstdə Qətərin İrəvanın ən mühüm tərəfdaşlarından biri olduğunu vurğulayıb. Qətər rəhbərliyi də ona bildirib ki, iki ölkə arasında əməkdaşlığın inkişaf etdirilməsini çox istəyirlər. Bununla yanaşı, müxtəlif sahələrdə sərmayə yatırmağa və sair meyllidirlər. Danışıqlar zamanı bildirilib ki, Qətərlə Ermənistan arasında müştərək maraq kəsb edən bir sıra məsələlər mövcuddur.
Görünən odur ki, bəzi Ərəb ölkələri Ermənistanın törətdiyi cinayətkar əməllərə göz yumaraq işğalçı dövlətlə yaxınlaşmaq yolunu tutublar. Belə görünür ki, həmin ölkələr bunda qərarlıdır.
“Özünü müsəlman dini adət-ənənələrinə sadiq göstərən bəzi islam dövlətləri əməldə tamamilə başqa hərəkət sərgiləyirlər”
Məsələyə münasibət bildirən AMİP-in sədr müavini Afsəddin Nəbiyevin fikrincə, bir sıra Ərəb dövlətlərinin Ermənistanla yaxınlaşma yolu tutması təəssüf doğurur: “Bu münasibətlərin dini kontekstdə ortaya çıxması ona görə aktualdır ki, maddi mədəniyyət nümunələrinin və dini abidələrin dağıdılması bütün dünyada bəşəriyyətə qarşı cinayət hesab olunur. Çünki dini abidələrimizi, məscidlərimizi məhv edən bu toplumu təmsil edən erməni siyasi liderləri ilə dostluqdan danışan müsəlman ölkələrinin hökumət başçıları, nədənsə, ermənilərin bu cinayətlərinə göz yummaqda davam edirlər. Üstəlik, bu azmış kimi, bu ölkələr əlaqələrin möhkəmlənməsində çox həvəsli görsənirlər. Müasir dünyada hər yerdə xristian təəssübkeşliyinin şahidi olmaqdayıq. Baxın, 20 min erməni üçün Azərbaycanın yurisdiksiyasına aid olan ərazilərimizdə ruslar kilsə tikməkdən belə çəkinmədilər. Ancaq biz görürük ki, müsəlman dövlətlərindən, Türkiyə və Pakistan istisna olmaqla, heç biri işğaldan azad olunmuş ərazilərimizdə bir məscidin belə yenidən bərpa olunmasına həvəsli deyil. Buradan belə bir nəticəyə gəlmək mümkündür ki, özünü müsəlman dini adət-ənənələrinə sadiq göstərən bəzi islam dövlətləri əməldə tamamilə başqa hərəkət sərgiləyirlər. Qətər dövləti də belə ölkələrdəndir. Qətərə Yaxın Şərqdəki erməni lobbisinin təsir imkanları böyükdür. Təbii ki, belə hərəkətlər xalqımızda qıcıq doğurmaya bilməz. Əgər bu dövlətlər ermənilərlə əlaqələri dərinləşdirməyə davam edəcəklərsə, onda siyasi və diplomatik əlaqələrimizə yenidən baxmaq məcburiyyətində qalacağıq. Müsəlman dövlətinin nümayəndələri səmimidirlərsə, o zaman erməni liderləri ilə görüşlər keçirərkən dağıdılmış dini abidələrimizin hesabını tələb etməlidirlər. Əks halda elə onlar da qütbləşən dünyamızda ikili standartlara haqq qazandıran tərəf olacaqlar”.
Sədr müavini onu da əlavə etdi ki, bəzi müsəlman ölkələrinin məlum siyasəti qəbuledilməzdir.
Vidadi ORDAHALLI
