“Media haqqında” Azərbaycan Respublikası Qanununun layihəsində media subyektləri və media mənsubları üçün səmərəli və faydalı olan bir sıra yeniliklər əksini tapıb. Layihədə əks olunan yeniliklərdən biri də Media Reyestridir. Layihəyə əsasən.ş jurnalistlərin Media Reyestrinə daxil edilməsi könüllü xarakter daşıyır.
Agentlik tərəfindən verilən jurnalist vəsiqəsi olmasa da, şəxs jurnalist kimi fəaliyyət göstərə bilər. Media subyektləri onlarla işləyən jurnalistlərə özlərinə məxsus vəsiqələri verməkdə tam müstəqildirlər. Eyni zamanda Media Reyestrinə daxil edilmiş jurnalistlərə vahid jurnalist vəsiqəsinin təqdim olunması könüllülük prinsipi əsasında həyata keçirilsə də, media mühitinin sağlamlaşmasına müsbət təsir göstərəcək.
“Azərbaycan jurnalistikasında bir keyfiyyət mərhələsi başlayacaq”
“Bayraqdar.info-nun baş redaktoru, əməkdar jurnalist, tanınmış media eksperti Azər Həsrət bizimlə söhbətində bildirdi ki, yeni qanun layihəsində Media Reyestririnin yaradılmasının nəzərdə tutulması çox vacib bir məsələdir. “Media Reyestri məsələsi bizim illərdir təklif etdiyimiz, üzərində dayandığımız, israr etdiyimiz bir məsələdir. Təəssüflər olsun ki, uzun illərdir bu təklifimiz nəzərə alınmırdı. Biz vahid bir reyestr olmasını, bütün jurnalistlərin orada qeydiyyata alınmasını, onlara vəsiqələrin də məhz bu reyestr tərəfindən verilməsini təklif edirdik. Təbii ki, bu, media mühitini sağlamlaşdırmaq məqsədi güdürdü. Reyestrə düşmək üçün bəlli kriteryalar tələb ediləcəkdi ki, bu saat jurnalistikadan sui-istifadə edənlərin əksəriyyətində bu kriteriyalar ümumiyyətlə yoxdur. Bu bir. İkincisi də, artıq qəbul ediləcək “Media haqqında” qanun layihəsinin müzakirələri gedir. Əlbəttə, müsbət haldır ki, nəhayət bu təşəbbüs reallığa çevrilir”.
A.Həsrət qeyd etdi ki, jurnalistlərin həm Agentlik tərəfindən verilən jurnalist vəsiqəsi, həm də işlədikləri media subyektlərindən onlara verilən vəsiqə ilə fəaliyyət göstərmək hüququna malik olmaları da yaxşı haldır. A.Həsrət bildirir ki, yeni qanun layihəsində əks olunan məsələlər peşəkar jurnalistlərin fəaliyyəti üçün daha geniş imkanlar açır. A.Həsrət hesab edir ki, bu o deməkdir, media mühiti sağlamlaşacaq və bizim illərdir mübarizə apardığımız, fəaliyyətindən əziyyət çəkdiyimiz reket jurnalistika sıradan çıxacaq, jurnalist vəsiqəsindən istifadə edənlərdən, şantajçılardan jurnalistika təmizlənəcək. “Azərbaycan jurnalistikasında bir keyfiyyət mərhələsi başlayacaq. Düşünürəm ki, bizim ictimaiyyət, eləcə də həmkarlarımız bu təşəbbüsün arxasında möhkəm dayanmalıdır. Yəni qanun artıq müzakirə olunur, bu gün Milli Məclisin komitəsində də müzakirə olundu. Taktiki olaraq biz o yola çıxmışıq və düşünürəm ki, bəlli bir vaxtdan sonra qanun qəbul olunub qüvvəyə minəcək və onun ardınca da çox qısa müddətdə o reyestr məsələsini həll etmək lazımdır. Normal sistemi, strukturu olan medianın zatən qısa bir müddətə reyestrdən keçmək məsələsini həll edəcəklər. Yeni qurulan, yaxud əvvəlcədən mövcud olub bir az da məsuliyyətsiz fəaliyyətlə məşğul olan qurumlar da özlərinə çəki-düzən verməli olacaqlar. Üçüncü kateqoriya da var ki, mediadan sui-istifadə etmək istəyirlər, artıq özlərinə başqa iş axtarmalı olacaqlar. Bütövlükdə reyestrin faydası nədir? Faydası odur ki, sabah kimsə hansısa müəssisəyə, idarəyə yaxınlaşıb özünü jurnalist kimi təqdim edəcəksə, həmin reyestr vasitəsilə onun jurnalist olub-olmadığı, harada işlədiyi, hansı media subyekti ilə əmək müqaviləsi bağladığı müəyyənləşəcək. Düşünürəm ki, bu çox müsbətdir”.
A.Həsrət deyir ki, bizim elə juranlistlərimiz var, konkret olaraq hansısa media subyektində işləmir, müstəqil olaraq fəaliyyət göstərirlər, yüksək peşəkarlığa malikdirlər, onların da adları Media Reyestrinə salınmalıdır, yaxud reyestrdə onlar üçün ayrıca kateqoriya yaradılmalıdır. “Yəni ola bilsin peşəkar juranalistdir, əməkdar jurnalist fəxri adı alıb, baqşa fəxri adları, titulları var, amma yaşına görə gündəlik işləyə bilmir, belə jurnalistlərimiz də reyestrə daxil edilməlidir. Mənə elə gəlir, bu məsələlər gələcəkdə öz həllini tapacaq. Amma bütövlükdə layihədə əksini tapan vəsiqə məsələsi, reyestrin yaradılması və sair medianın sağlamlaşdırılması istiqamətində, hətta deyərdim ki, bir inqilabi yenilikdir. Mətbuat Şurası çərçivəsində biz bunun ilkin addımlarını atmışdıq, vahid vəsiqə tətbiq etməyə başlamışdıq. Sadəcə, arxamızda dövlət dəstəyi, dövlət təminatı olmadığı üçün bunu başa çatdıra bilmədik. İndi isə konkret olaraq “Media haqqında” qanun qəbul edilir, qəbul ediləndən sonra hər hansı bir əngəl qalmayacaq”- deyə A.Həsrət qeyd etdi.
İradə SARIYEVA
