Dekabrın 3-də Kipr Respublikasının Nümayəndələr Palatası tərəfindən “Azərbaycanın ermənilərə qarşı davamlı təcavüzü və Dağlıq Qarabağdakı mövcud vəziyyət” adlı təxribat xarakterli, əsassız və həqiqətə uyğun olmayan qətnamə qəbul edib.
Milli Məclisin Beynəlxalq münasibətlər və parlamentlərarası əlaqələr komitəsi Kipr Respublikasının Nümayəndələr Palatası tərəfindən qəbul edilmiş təxribat xarakterli, həqiqətə uyğun olmayan qətnamə ilə bağlı bəyanat yayıb.
Bəyanatda deyilir: “Kiprli deputatların nəzərinə çatdırmaq istərdik ki, regionda sabitliyi pozmağa yönəlmiş bu cür təxribatlar 30 il ərzində Azərbaycan ərazisinin 20 faizini qeyri-qanuni olaraq işğal altında saxlayan, bütün Azərbaycan əhalisini etnik təmizləməyə məruz qoyan, Xocalı soyqırımını törədən və bölgəni yenidən xaos və müharibə vəziyyətinə qaytarmağa çalışan qüvvələrə xidmət edir. Müharibəyə son qoyaraq regionda dinc yaşayışın yeni mərhələsinə şərait yaradan, Azərbaycan, Rusiya prezidentləri və Ermənistanın baş naziri tərəfindən üçtərəfli Bəyanatın imzalanmasından artıq bir il ötür. Hazırda Qarabağın dirçəldilməsi, məcburi köçkünlərin öz evlərinə qaytarılması, regionda yeni infrastrukturun qurulması ilə yanaşı, xalqlar arasında etimad tədbirlərinin də gücləndirilməsi üçün böyük səylər göstərilir. Bu gün Azərbaycan bütün səviyyələrdə hər iki ölkənin ərazi bütövlüyünün qarşılıqlı tanınması şərti ilə Ermənistanla sülh müqaviləsi imzalamağa hazır olduğunu açıq şəkildə bəyan etdiyi və heç bir şərt olmadan delimitasiya və demarkasiya prosesinə başlamağa hazır olduğu halda buna qarşı çıxan da məhz bu qüvvələrdir.
Təəssüflər olsun ki, Kipr Nümayəndələr Palatasının deputatları bu lüzumsuz qətnaməyə səs verərək, özlərini və parlamentlərini dəyərdən salmış, qisas və müharibəyə can atanlarla eyni səviyyəyə qoymuşlar. Onların regionda sülhün bərqərar olması səylərini dəstəkləmək əvəzinə, sadə insanların dərdindən, iztirabından öz çirkin siyasi oyunlarında istifadə etməyə çalışanların ardınca getmələri təəssüf hissi doğurur. Sülh və əmin-amanlığa məhəl qoymayaraq, bu cür qərəzli, əsassız qətnamənin qəbul edilməsi regiondakı yeni reallığı dəyişdirmir, əksinə, bu cür qətnamələri qəbul edənlərin özlərinə xələl gətirərək, obyektivliklərinə ciddi şübhə yaradır”.
Göründüyü kimi, artıq Milli Məclis Kiprin təxribatçı addımı ilə bağlı bəyanat qəbul edib və Kiprin Nümayəndələr Palatasına etiraz ünvanlayıb. Bu öz yerində. Beynəlxalq birlik də yunan Kiprinin ermənipərəst mövqeyini və Azərbaycana qarşı təxribat kampaniyasını, davranışlarını, əsassız sənəd qəbul etməsini kəskin pisləməlidir.
Azərbaycan yunan Kiprinə daha nə edə bilər? Onun Azərbaycandan bir iqtisadi asılılığı varmı? İqtisadi, siyasi münasibətlər baxımından indiki şəraitdə biz hansı təsir mexanizmindən istifadə edə bilərik? Azərbaycan bu bəyanatdan əlavə Kiprə qarşı nə kimi addımlar ata bilər ki, Kipr hansı səhvə yol verdiyini başa düşsün?
“...Buna aidiyyəti qurumlar vasitəsilə reaksiya verilməlidir”
Millət vəkili Ceyhun Məmmədov bu barədə “Bakı-Xəbər”ə şərhində bildirdi ki, Kiprin Nümayəndələr Palatasının qəbul etdiyi bəyanat təxribatçı xarakter daşıyır. C.Məmmədovun sözlərinə görə, Ermənistan yalnız yunan Kiprində bizə qarşı təbliğat aparmır, başqa ölkələrdə də bu təxribatlarını davam etdirir.
“Biz ümumi prosesə baxdıqda görürük ki, ermənilər ayrı-ayrı ölkələrdə Azərbaycana qarşı çox güclü təbliğat tədbirlərinə başlayıblar. Hazırda dünyanın bütün ölkələrində ermənilətr Azərbaycan əleyhinə çox güclü təbliğat aparırlar. Azərbaycanın “aqressiya”sından, hansı ki, bu mövcud deyil, Ermənistana qarşı apardığı siyasətdən bəhs olunur. Hesab edirəm ki, biz bu məsələni qəti şəkildə pisləməliyik və rəsmi qaydada buna aidiyyəti qurumlar vasitəsilə reaksiya verilməlidir. Parlament də bu məsələyə öz münasibətini bildirib və hər zaman bildirir. Fikrimcə, bu istiqamətdə biz çox ciddi şəkildə çalışmalıyıq. Bu gün həmin ölkələrdəki ayrı-ayrı qurumlarla, təşkilatlarla, media ilə biz aktv şəkildə fəaliyyətimizi davam etdirməliyik”.
C.Məmmədovun sözlərinə görə, bizim də münasibətimiz, reaksiyamız həm Milli Məclis Səviyyəsində olmalıdır, bununla yanaşı media vasitəsilə olmalıdır. “Oradakı lobbiçilik fəaliyyətimizi gücləndirməliyik. Yəni bu gün baş verənlər, prosesin təhlili onu göstərir ki, ermənilər bu istiqamətdə səylərini davam etdirirlər. Biz də çalışmalıyıq ki, bu fəaliyyəti həm parlament vasitəsilə, həm media müstəvisində, diaspor, lobbiçilik fəaliyyəti istiqamətində davam etdirək, işlər həyata keçirək. Yəni biz bütün gücümüzlə, potensialımızla çalışmalıyıq ki, bu kimi təxribatların qarşısını qəti şəkildə alaq. Birmənalı olaraq da müxtəlif istiqamətlərdə çox sərt və qəti reaksiyamızı bildirməliyik ki, ermənilər bu kimi təxribatlara son qoysunlar.
Bu məsələdə hansısa güclü iqtisadi asılılıqdan söhbət getmir. Bu gün bizim Kiprlə hansısa bir güclü iqtisadi əlaqələrimiz mövcud deyil. Ona görə də biz çalışmalıyıq ki, müxtəlif yollarla öz məqsədlərimizə nail olaq”-deyə C.Məmmədov bildirdi.
Millət vəkili hesab edir ki, təcavüzkar Ermənistana dəstək verən, onun təxribatlarına alət olan dövlətləri, qurumları dünya birliyi də sərt şəkildə qınamalıdır.
İradə SARIYEVA
