Ermənistan ordusunun tərkibində terrorçuların, xüsusən də ASALA və başqa terror qruplaşmalarının üzvlərinin olduğu, onların 44 günlük müharibədə Azərbaycan ordusuna qarşı döyüşdüyü haqda kifayət qədər səhih məlumatlar vardı. Bu günlərdə isə üzə yeni əlavə faktlar çıxarılıb.
Caliber kanalı ordumuzun düşmən təxribatına cavab olaraq 14-16 noyabr tarixli əməliyyatları haqda maraqlı süjet yayıb. Kanal əməkdaşları sözügedən ərazidə olublar və ermənilərdən geri alınan postda düşmən əsgərlərinin atıb-qaçdıqları əşyalar içərisində ASALA terror təşkilatına aid “gerb” və yazılar aşkarlayıblar.
“...Dünya bir daha gördü ki, bu ölkənin ordusunda Azərbaycan ordusuna qarşı terrorçular döyüşüb”
Həmin postda ASALA-nın izlərinin aşkarlanması onu bir daha təsdqiləyir ki, Ermənistan ordusunda terrorçu qruplardan, muzdlu döyüşçülərdən istifadə edilib. Aşkarlanan dəlillər bunu bir daha təsdiqləyir. “Müasir İnkişaf” Birliyinin rəhbəri, siyasi şərhçi Mübariz Göyüşlü “Bakı-Xəbər”ə bildirdi ki, Ermənistan ordusunun tərkibində “ASALA” üzvlərinin və başqa terrorçu qruplaşmaların təmsilçilərinin olduğunu Azərbaycan hələ müharibə dövründə ifşa edib, yeni tapılan faktlar isə Azərbaycanın nə qədər haqlı olduğunu təsdiqləyir. “Birinci və İkinci Qarabağ müharibələrində Ermənistan silahlı birləşmələrinin tərkibində ASALA və digər terrorçu təşilatların üzvlərinin Azərbaycan ordusuna qarşı döyüşdüyünün şahidi olmuşuq. Birinci Qarabağ savaşında ASALA üzvləri azərbaycanlılara divan tutub, dinc əhalinin başına olmazın müsibətlər gətiriblər. Onların törətdiyi tükürpədici cinayətləri insanlarımız yaddan çıxara bilmir. Birinci Qarabağ müharibəsində olduğu kimi, İkinci Qarabağ müharibəsində də erməni terror təşkilatlarının üzvlərinin, muzdlu döyüşçülərin aktiv döyüşdüyü məlumdur. Bunu bütün dünya bilir ki, Ermənistan silahlı birləşmələrinin tərkibində Azərbaycan ordusuna qarşı döyüşənlər arasında ASALA üzvləri olub. ASALA ilə yanaşı PKK və başqa terroru öz fəaliyyətinin əsas istiqaməti, amalı, məqsədi hesab edən təşkilatların təmsilçiləri 44 günlük müharibədə bizə qarşı döyüşlərdə iştirak edib. Bunu əks etdirən onlarla fakt, şahid ifadələri, görüntülər var. Ermənistan ordusunda muzlu döyüşçülərin və ASALA, PKK və başqa terror təşkilatlarının üzvlərinin olduğunu inkar edirdilər. Ermənistan tərəfi iddia edirdi ki, xaricdən gəlib döyüşənlər muzdlular və terrorçu qruplaşmaların üzvü deyillər, onlar sadə ermənilərdir və öz soydaşlarına kömək etmək üçün gəliblər. Halbuki, bunlar kökündən yalan məlumatlar idi. Məsələ burasındadır ki, Ermənistan saxtakarlıq edərək o terrorçulara Ermənistan vətəndaşlığı vermişdi və onlar müharibədə Ermənistan vətəndaşları kimi iştirak edirdi. ASALA üzvləri və başqaları müharibəyə cəlb edilmişdilər ki, Azərbaycana qarşı terror təxribatları həyata keçirsinlər. ASALA üzvləri elə zənn edirdi ki, qarşılarındakı 30 il əvvəlki Azərbaycan ordusudur, amma tezliklə yanıldıqlarını gördülər”.
M.Göyüşlü qeyd etdi ki, nə Azərbaycan insanı, nə Azərbaycan ordusu, nə də Azərbaycan dövləti 30 il əvvəlkidir, indi daha güclü, daha təşkilatlanmış şəkildə düşməni sarsıdan vahid bir qüvvədir, bunu bütün dünya İkinci Qarabağ müharibəsi zamanı yaxşı gördü. “Postdan tapılan dəlillər də bir daha sübut etdi ki, Ermənistan ordusunun tərkibində muzdlular, xüsusən də ASALA terror təşkilatının amansız terrorçuları döyüşüb. İkinci Qarabağ müharibəsi dövründə də, sonradan da Ermənistanın terrorçularla əlaqələri ifşa edildi və dünya bir daha gördü ki, bu ölkənin ordusunda Azərbaycan ordusuna qarşı terrorçular döyüşüb. Azərbaycan ordusu Ermənistanın ordusunu tamamilə darmadağın etdi. Livandan gələn bir snayper qadını ordumuz ələ keçirmişdi. Ordumuz bir neçə belə muzdlunu həm döyüş meydanında məhv etdi, həm də bir qismini ələ keçirdi...Yenə də Rusiyanın xahişi ilə biz snayper qadını azad etdik. Amma müharibədə Ermənistanın dadına heç nə çatmadı, nə muzdlular, nə terror, nə xaricdəki erməni lobbisi, nə də böyük dövlətlərin dəstəyi ona kömək edə bilmədi. Çünki erməni əsgərinin, Azərbaycan ordusuna qarşı döyüşən ermənin nə vətən sevgisi, nə milli qeyrəti, nə də döyüşkənlik əzmi var. Heç biri yoxdur. Ermənilərlə bağlı hər şey mif üzərində qurulmuşdu, Azərbaycan ordusu da bu mifi darmadağın etdi. Bundan sonra ASALA da, başqa terror qrupları da gəlsə, Azərbaycan ordusuna qarşı heç nə edə bilməyəcəklər. Son faktlar da bir daha Ermənistanın mahiyyətini, ordusunun ASALA-nın və başqa terror təşkilatlarının yuvasına çevrildiyini göstərdi.
Terror, təxribat, şantaj, qocalara, qadınlara, uşaqlara qarşı “mübarizə” aparmaq, meyitlər üzərində işgəncələr etmək Ermənistan dövlətinin siyasətininin, erməni toplumunun xarakterik xüsusiyyətidir. Bu da onları məhvə aparır”- deyə M.Göyüşlü qeyd etdi.
İradə SARIYEVA
