Rusiya Müdafiə Nazirliyinin xüsusi təyyarəsi Erebuni hərbi hava limanına eniş edib. Təyyarə Rusiya delimitasiya və demarkasiya komissiyasının nümayəndələrini İrəvana gətirib.
Bu haqda məlumat yayan “Qraparak” qəzeti yazır ki, delimitasiya və demarkasiya prosesinə bu həftə başlanacaq. Delimitasiya və demarkasiya komissiyasına Ermənistan tərəfdən kimin daxil olacağı hələlik məlum deyil. Qeyd edilir ki, komissiyanın işini Rusiyanın Qarabağdakı sülhməramlı kontingentinin keçmiş komandanı, general-leytenant Rüstəm Muradov əlaqələndirəcək.
Ermənistan Müdafiə Nazirliyinin mətbuat xidmətinin rəhbəri Qevorq Altunyan mövzu ilə bağlı “Qraparak” qəzetinə yalnız bunu deyib: “Nazirliyin funksiyalarının 90 faizi məxfidir”.
Maraqlıdır, Rüstəm Muradovun bu işə rəhbərlik etməsinə ekspertlər necə baxır? Bu, Azərbaycanın xeyrinə olacaq, yoxsa ziyanına?
“Regionda dayanıqlı sabitliyin başlıca şərti sərhədlərin tanınmasından, bununla bağlı işlərin görülməsindən keçir”
Məsələyə münasibət bildirən hərbi ekspert Ramil Məmmədlinin fikrincə, indidən buna birmənalı prizmadan yanaşmaq çətindir: “Rüstəm Muradov Rusiyanı təmsil edir. Rusiya hakimiyyətinin delimitasiya və demarrkasiya məsələsində mövqeyi necə olacaqsa, Muradov da o cür davranacaq. Muradov olmasın, hansısa bir İvan olsun, məsələ belə olacaq. Müxtəlif gözləntilər ola bilər. Buna da təbii yanaşmaq lazımdır. Bəziləri hesab edə bilər ki, o, Qarabağda sülhməramlılara rəhbərlik etdiyi üçün ermənilərin maraqlarına önəm verəcək. Ermənilər onun Dağıstanda doğulduğunu əsas gətirib Azərbaycanın maraqlarından çıxış edəcəyini iddia edə bilər. Deməyim odur ki, sərhədlərin delimitasiyası zamanı Rusiyanın necə davranacağı ilə bağlı müxtəlif proqnozlar verilə bilər. İstənilən halda, R.Muradovun bu işə rəhbərlik etməsinin bizim xeyrimizə, yoxsa ziyanımıza olacağını zaman göstərəcək. Görünən odur ki, nəqliyyat kommunikasiyalarının açılmasından ötrü Rusiya prosesləri sürətləndirmək istəyir. Üstəlik, xəritələr Rusiya Müdafiə Nazirliyinin Baş Qərərgahındadır. Fikrimcə, Rusiya Azərbaycanla olan münasibətlərini, iqtisadi əlaqələrini nəzərə alaraq rəsmi Bakını incik salmayacaq. Yəni münasibətləri sərinləşdirəcək addım atmayacaq. Çünki Ermənistan Rusiyanın strateji müttəfiqi olsa da, Rusiyanın Azərbaycanla da yaxşı münasibətləri var. Regionda dayanıqlı sabitliyin və inkişafın başlıca şərti sərhədlərin tanınmasından, bununla bağlı işlərin görülməsindən keçir. O üzdən, Rusiya bu işdə nə qədər ədalətli və obyektiv mövqedən çıxış etsə, bu bir o qədər Moskvanın maraqlarına uyğun olacaq. Rusiya rəhbərliyinə etimad artacaq”.
Hərbi ekspert onu da qeyd etdi ki, bir sıra məsələlər yaxın dövrdə tam bəlli olacaq.
Vidadi ORDAHALLI
