Türkiyə Böyük Millət Məclisində Daxili İşlər Nazirliyinin büdcəsinin müzakirələri zamanı deputatlar arasında dava düşüb.
İnsident Cümhuriyyət Xalq Partiyasının (CHP) deputatı Erkan Aydının çıxışı zamanı baş verib.
Çıxışı zamanı daxili işlər naziri Süleyman Soylu onu saxtakar adlandırıb. Yaranan mübahisə hakim Ədalət və İnkişaf Partiyasının (AKP) deputatları ilə CHP deputatları arasında yumruq davasına çevrilib.
Münaqişə ilə əlaqədar iclasa fasilə verilib.
Hər zaman siyasi əxlaq nümunəsinin olduğu ölkə kimi tanınan Türkiyədə baş verən bu hadisə doğrudan da üzücüdür. Türkiyə siyasətində bu cür halların yaşanmasının başlıca səbəbi nədir?
Ana Vətən Partiyasının sədr müavini Arzuman Abdulkərimov “Bakı-Xəbər”ə açıqlamasında bildirdi ki, Türkiyədə siyasi fəallıq hər zaman yüksək olub: “Türkiyə əhalisi siyasi cəhətdən çox dinamikdir. Onlar siyasi partiyalara futbol komandalarına olan kimi fanatcasına azarkeşlik edirlər. Əhalinin böyük əksəriyyəti partiyalara üzv olmağı özünün vətəndaşlıq borcu sayır. Təbiidir ki, belə olan təqdirdə ölkədəki siyasi fəallıq və rəqabət də artır. Bu özünü siyasi həyatın bütün sferalarında göstərir. Xüsusilə də ölkədə keçirilən seçkilərdə gərgin yarış atmosferi hakim olur. Türkiyə parlamenti də gərgin müzakirələrin keçdiyi bir qanunverici qurum kimi tanınır. Əslində belə davalara dünyanın bir çox ölkələrinin parlamentlərində rast gəlmək olur. Ancaq heç də xoşagələn bir mənzərə deyil. Çünki bir çox ölkələr, o cümlədən biz Türkiyəyə bir örnək kimi baxmışıq. Zəngin dövlətçilik təcrübəsi olan böyük ölkələrin təcrübəsinə hər zaman istinad olunur. Dediyiniz mənzərə həmin ölkənin nüfuzuna ciddi xələl gətirir. Bunun bir səbəbini də Türkiyədə yaşanan iqtisadi amillərlə əlaqələndirmək olar. Bilirsiniz ki, Türkiyənin milli valyutası olan lirə sürətlə dəyər itirib. Bu da qardaş ölkənin iqtisadiyyatına ağır zərbə vurub. Türkiyə iqtisadiyyatında lirənin ABŞ dollarına nəzərən ucuzlaşması fonunda müşahidə olunan proseslər ciddi narahatlıq doğurur. Çünki vəziyyət kifayət qədər ağırdır. Neçə illərdir, ardıcıl yüksək iqtisadi yüksəliş nümayiş etdirən qardaş ölkədə hazırda vəziyyət durğunluq kimi deyil, sanki məhz bataqlığa doğru istiqamətlənmə kimi qiymətləndirilir.
Lirənin xarici valyutalara nəzərən ucuzlaşması vaxtaşırı baş verib. Lakin bütün bunlar müəyyən zaman çərçivəsində ortaya çıxdıqdan sonra proses səngiyib, lirə dəyərcə sabitlik əldə edərək, əksinə, möhkəmlənib. Budəfəki dəyər itirmə prosesi isə heç də 1 dolların 13 TL-dən baha olması ilə deyil, ucuzlaşmanın həm uzun müddətdir davam etməsi, həm əvvəlkilərdən daha sürətli xarakter daşıması və getdikcə dərinə işləməyə meyl etməsi, həm də ümumiyyətlə, nəzarətdən çıxma qorxusu yaratması ilə seçilir. Parlamentdə dava daxili işlər nazirliyinin büdcəsinin müzakirəsi zamanı düşüb. Gəlin, yumruq davasına qalxan deputatların təmsil olunduqları siyasi düşərgələrə diqqət edək. Davanı sol təmayüllü CHP ilə sağçı AKP deputatları edib. Türkiyənin siyasi tarixinə bələd olanlar yaxşı bilir ki, ötən əsrin 80-ci illərində Türkiyədə sağçılarla solçular arasında ölümlərlə nəticələnən küçə davaları baş verirdi. Uzun müddətdir ki, bu tendensiya aradan qalxıb. Türkiyə parlamentində yaşananlar ölkədəki siyasi partiyalar arasındakı gərginliyin pik həddə çatmasına bir işarədir. Gərək qardaş ölkədəki siyasilər səbr nümayiş etdirsinlər. Bilirik ki, bizi və onları istəməyən xarici qüvvələr belə mənzərəni görəndə xoşhal olur. Elə iqtisadi problemlərin başlıca səbəbi də xarici amillərlə bağlıdır. Siyasətçilər onların əlinə əsaslar verməməlidir”.
Məhəmmədəli QƏRİBLİ
