Ermənistan mediası yalanlarını, zərərli məlumatlarını və təxribatlarını davam etdirir. Dünyanın bir sıra siyasi liderlərinin dilindən yalanlar yayan erməni mediası indi də Qazaxıstanın sabiq prezidenti, Elbaşı Nursultan Nazarbayevin adından yanlış və əsassız ifadə işlədib. Onların bildirdiyinə görə, guya Nazarbayev Oliver Stounun “Qazax. Qızıl insanın tarixi” filminin müəllifinə müsahibəsində “Arsax respublikası” ifadəsi işlədib. Erməni mediası Rusiyanın məşhur TASS Agentliyinə “istinadən” yazır ki, guya Nazarbayev “Rusiya Arsax respublikasında sülhün bərqərar olmasına kömək etdi” deyib.
Sözün açığı, Nazarbayev kimi türk dünyasının böyük simalarından biri, dünyanın tanınmış və təcrbəli siyasi və dövlət xadiminin belə bir ifadə işlətməsi bizə inandırıcı gəlmədi və inanmadıq ki, o məhz belə bir ifadə işlədə bilər. Nazarbayev də digər siyasi xadimlər kimi məsələnin nə yerdə olduğunu, “Arsax respublikası” deyilən bir qurumun olmadığını çox yaxşı bilir, eyni zamanda separatçıların əməllərindən xəbərdardır.
Lakin ermənilərin növbəti yalanını ifşa etmək üçün məqalənin yayıldığı ilkin mənbəyə baş vurduq və TASS Agentliyində gedən həmin məlumatın əslini tapdıq, gördük ki, “Nazarbaev otmetil rolğ Rossii v urequlirovanii konflikta v Naqornom Karabaxe” başlıqlı yazıda Nazarbayev “Arsax respublikası” ifadəsi işlətməyib, erməni mediası onun fikirlərini təhrif edib. Nazarbayevin adından təqdim edilən bu sözün növbəti bir erməni yalanı olduğu bir daha təsdiqləndi.
Qeyd edək ki, N.Nazarbayevin fikri əslində belədir: “Rusiya Qarabağda sülhün yaranmasına yardım etdi, ABŞ bunu alqışlamalıdır, onun addımlarını tənqid etməli deyil”. Nazarbayev bu istiqamətdə sualı cavablandırarkən həmçinin deyib: “Azərbaycan və Ermənistan arasında sülhə Rusiya yardım etdi. Rusiyanı alqışlamaq əvəzinə ABŞ tənqid etməyə başlayıb”.
“Ermənistan mediasının yazıya qoyduğu başlıqdan da aydın görsənir ki, bu bir uydurmadır”
AMEA-nın Fəlsəfə və Sosiologiya İnstitutunun aparıcı elmi işisi, tarix üzrə fəlsəfə doktoru, dosent, BAO başqanının Türk Dünyası ilə əlaqələr üzrə müavin Faiq Ələkbərli “Bakı-Xəbər”ə bildirdi ki, Ermənistan mətbuatı məqsədli şəkildə təxribat törədib və N.Nazarbayevin dilindən yalan məlumat yayıb. “Mən heç zaman inana bilmərəm ki, Qazaxıstanın sabiq prezidenti, Elbaşı Nursultan Nazarbayev belə bir yanlış ifadə işlətsin. Nazarbayevin “Arsax respublikası” ifadəsi işlətdiyinə inanmıram və bu növbəti erməni uydurmasıdır. Təxribatçı erməni mediası Nazarbayevin heç zaman işlətmədiyi ifadəni onun adından verməklə bir daha öz mahiyyətini, niyyətini, iyrənc simasını ortaya qoydu. Ermənistan mediasının yazıya qoyduğu başlıqdan da aydın görsənir ki, bu bir uydurmadır, təxribatdır. Sadəcə, Nazarbayev Rusiya və ABŞ arasındakı gərginliyi şərh edərkən Qarabağ məsələsində Rusiyanın oynadığı rola da toxunub və Rusiyanın tutduğu mövqeyi müsbət anlamda ifadə etməyə çalışıb. Eyni zamanda Azərbaycan ərazisi olan Qarabağda münaqişənin tənzimlənməsində Rusiyanın oynadığı rolu vurğulayıb. Burada “Arsax” adı çəkilməyib. Qondarma rejim, bilirsiz ki, artıq yoxdur və o tarixin zibilliklərinə atılıb. Nazarbayev də yaxşı bilir ki, Azərbaycan 44 günlük müharibədə torpaqlarının böyük hissəsini işğaldan azad edib və kiçik bir hissəsi isə hələ müvəqqəti olaraq rus sülhməramlılarının nəzarətindədir. Nazarbayev müsahibəsində “Arsax respublikası” ifadəsi işlətməyib, onun fikrinin təhrif edilərək bu şəkildə təqdim edilməsi isə növbəti erməni təxribatıdır. Yəni bunun başqa bir adı yoxdur. Nazarbayev Rusiya-ABŞ münasibətlərini şərh edib və ABŞ-ın Rusiyanı tənqid etməli olmadığını vurğulayıb. Bunu da konkret suala cavab olaraq deyib. Azərbaycan və Ermənistan arasında başa çatan Qarabağ münaqişəsinin həllində də Rusiyanın müsbət mövqeyini irəli çəkib”.
F.Ələkbərli hesab edir ki, Ermənistan günü-gündən böyüyən, geniş vüsət alan türk birliyini qətiyyən həzm edə bilmir və bu səbəbdən də erməni mediasının səhifələrində məqsədli şəkildə təxribatçı yanaşmalar əks olunur. Erməni mediasının təxribatlarının heç bir vaxt nəticə verməyəcəyini deyən F.Ələkbərlinin sözlərinə görə, türk dünyasının ağsaqqallarından olan Nazarbayev hər zaman Azərbaycana dəstək göstərib və 44 günlük müharibədə Azərbaycanın qazandığı qələbəni alqışlayıb. “Bu baxımdan, Ermənistan mediasının yazdıqları uydurmadır və TASS-ın informasiyası təhrif edilib. TASS-da gedən məlumat erməni yalanını ifşa edir” - deyə F.Ələkbərli qeyd etdi.
İradə SARIYEVA
