Məlum olduğu kimi, ötən həftə Ermənistan tərəfi Azərbaycanın işğaldan azad olunan digər müəyyən ərazilərinin mina sahələrinin formulyarlarını da Azərbaycan tərəfinə təqdim edib. Mina sahələrinin formulyarlarında adətən ərazinin koordinatları, basdırılmış minaların növləri, sayları, ara məsafələri, basdırılma və gizlətmə qaydalarına dair məlumatlar qeyd olunur.
Ancaq Ermənistan tərəfinin təqdim etdiyi mina xəritəsi yanlışdır. ANAMA-nın İdarə heyətinin sədri Vüqar Süleymanov media nümayəndələrinə açıqlamasında qeyd edib ki, təqdim edilmiş formulyarlarla ilkin tanışlıq onların etibarsız, yararsız və qeyri-dəqiq olması təəssüratını yaradır: “Ermənistan tərəfi müvafiq beynəlxalq məhkəmə işləri çərçivəsində məsuliyyətdən yayınmaq məqsədi ilə bütün mina səhələrini əhatə edən formulyarların verildiyi iddiası ilə çıxış edir. Ancaq Ermənistan tərəfindən təqdim edilmiş formulyarların işğaldan azad edilmiş bütün əraziləri tam şəkildə əhatə etməsi ilə bağlı da ciddi narahatlığımız mövcuddur”.
Ermənistan tərəfi mina xəritələri ilə bağlı yanlış məlumat verərək həm Azərbaycanı, həm də dünya ictimaiyyətini aldatdı.
“Minaların dəqiq yerlərini göstərən xəritələri Azərbaycana verməməklə Ermənistan müharibədən sonra da öz terrorçuluq əməllərini davam etdirdiyini göstərir”
Qarabağ Azadlıq Təşkilatının (QAT) sədri Akif Nağı bildirdi ki, ermənilər hər zaman yalan danışıblar, bunu bütün dünya bilir: “Ermənistanın mina sahələri ilə bağlı yanlış xəritə təqdim etməsini Azərbaycan beynəlxalq təşkilatların diqqətini çatdırmalıdır. Beynəlxalq ictimaiyyət Ermənistanın mina sahələri ilə bağlı təqdim etdiyi xəritənin düzgün olmadığını, dünyanı necə aldatdığını bilməlidir. Erməni hər zaman olduğu kimi yenə də oyun oynayır. Bununla bağlı Ermənistan beynəlxalq məhkəmədə cavab verməlidir”.
QAT sədri onu da əlavə etdi ki, bir çox məsələlərdə olduğu kimi, Ermənistan rəhbərliyi minalarla da bağlı ikiüzlülük etməkdə davam edir, ikiüzlü siyasət aparır. Ermənistan bundan Azərbaycana qarşı həm təzyiq vasitəsi kimi istifadə etməyə cəhd edir, həm də özünün qaniçənliyini, insani davranışlardan uzaq olduğunun göstərir. Minaların dəqiq yerlərini göstərən xəritələri Azərbaycana verməməklə Ermənistan müharibədən sonra da öz terrorçuluq əməllərini davam etdirdiyini göstərir.
Günel CƏLİLOVA
