“Şərəf duyuram” fraksiyasından olan deputat Anna Mkrtçyan parlamentdə 10 noyabr 2020-ci il tarixli bəyanatın 9-cu bəndindən sitat gətirib.
Deputatın Paşinyana sualı belə olub: “Ermənistan vətəndaşların, nəqliyyat vasitələrinin və yüklərin hər iki istiqamətdə maneəsiz hərəkətini təşkil etmək üçün Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat əlaqəsinin təhlükəsizliyinə təminat verir. Nəqliyyat əlaqəsinə nəzarət Rusiya FTX-nin Sərhəd Xidməti tərəfindən həyata keçirilir. İndi sual yaranır: bu bir neçə kilometr uzunluğunda dəhliz deyilsə, bəs nədir?”.
Baş nazir Nikol Paşinyan sualı belə şərh edib: “İlk növbədə, bu paraqrafı oxuyursunuzsa, digər yazılanları da oxuyun: Regionda bütün iqtisadi və nəqliyyat əlaqələri açıqlacaq. İkincisi, nəqliyyat kommunikasiyalarına nəzarəti Rusiya FTX-nin Sərhəd Xidməti həyata keçirəcək. Ermənistan bütün yolların açılmasında maraqlıdır. Bəli, biz hazırıq və maraqlıyıq ki, Azərbaycanın qərb rayonları Naxçıvan Respublikası ilə, Ermənistan isə Azərbaycan ərazisindən keçməklə İran və Rusiya ilə avtomobil və dəmir yolu əlaqəsi əldə etsin”.
Paşinyan onu da əlavə edib ki, bütün bunlar Ermənistanın maraqlarına tam cavab verir.
Ancaq Paşinyan yenə də dəhlizlə bağlı konkret mövqe sərgiləməyib. Maraqlıdır, Paşinyan bununla nə demək istəyir? Naxçıvana dəhliz yox, sadəcə avtoyol? Ekspertlər bunu necə şərh edir?
“O üzdən, dəhlizlə bağlı məsələdə ölkə ictimaiyyətini aldadaraq yol ifadəsini işlədir”
Sözügedən məsələyə aydınlıq gətirən politoloq Tural İsmayılov bununla bağlı bir sıra məqamlara toxundu: “Nikol Paşinyan özü də yaxşı başa düşür ki, Ermənistanın bir dövlət kimi siyasi və iqtisadi baxımdan mövcud olmağının tək qarantı dəhlizlərin açılmağından keçir. Hazırda Ermənistanın dövlət büdcəsinə daxilolmaları kifayət qədər aşağı səviyyədədir. Üstəlik, xarici borcu dövlət büdcəsindən dəfələrlə böyük olan, ümumilikdə ölkəyə iqtisadi kapitalın cəlbində böyük çətinliklər yaşayan Ermənistanda vəziyyətin belə davam etməsi ciddi fəlakət vəd edir. Belə bir durumda ölkədəki siyasi institutların Ermənistanın gələcəyi ilə bağlı heç bir fikri yoxdur. Nə hakimiyyət, nə də müxalifət doğru-düzgün iqtisadi planlama təqdim edə bilir. Ona görə də Ermənistan sərhədlərin və dəhlizin açılmasına bir növ məhkumdur. Başqa bir tərəfdən, 10 noyabr Bəyanatının və Soçi razılaşmasının tərəflərindən biri olan Rusiyanın da dəhlizlərin, kommunikasiyaların açılmasında marağı var. Paşinyan bu cür qeyri-müəyyən açıqlama verməklə daxili auditoriyaya oynayır. Əslində Zəngəzur dəhlizinə razılıq verməkdən başqa çıxış yolları yoxdur. İndiki məqamda müəyyən qədər revanşistlərdən çəkindiyi üçün bunu açıq deməyə cəsarət etmir. Ona görə də manipulyativ açıqlamalarla çıxış edir. Məsələ ondadır ki, 10 noyabr və Soçi bəyanatlarında konkret Zəngəzur dəhlizindən bəhs olunub. Prezident İlham Əliyevlə yanaşı, Rusiya prezidenti Vladimir Putin də dəhliz sözünü dəfələrlə işlədib. Paşinyan isə ictimai rəyə hesablanmış manevrlər edərək dəhliz məsələsini yol kimi təqdim etməyə çalışır. Bu, Paşinyanın növbəti saxtakarlığıdır. O, Brüssel görüşündən əvvəl ölkə daxilində hansısa etiraz aksiyalarının olmasını istəmir. O üzdən, dəhlizlə bağlı məsələdə ölkə ictimaiyyətini aldadaraq yol ifadəsini işlədir. Ancaq Azərbaycanın qalib tərəf olaraq ortada konkret mövqeyi var. Bu da ondan ibarətdir ki, Zəngəzur dəhlizi mütləq açılmalıdır. Çünki dəhliz nə qədər tez açılarsa, bundan region ölkələri bir o qədər udur”.
Bir sözlə, politoloq hesab edir ki, Paşinyanın nə deməsindən asılı olmayaraq dəhliz açılacaq.
Vidadi ORDAHALLI
