Azərbaycana qarşı ağılagəlməz iddialar irəli sürən Ermənistan BMT-nin ali ədliyyə orqanı olan Beynəlxalq Ədalət Məhkəməsindən əli ətəyindən uzun qayıdıb. Beynəlxalq Ədalət Məhkəməsi Ermənistana bir-birinin ardınca tərs şillələr vurub.
Ermənistanın Azərbaycana qarşı irəli sürdüyü qondarma iddialardan biri də, guya onun tarixi-mədəni abidələrinin dağıdılması ilə bağlı imiş, amma Beynəlxalq Ədalət Məhkəməsi bu iddianı da tamamilə rədd edib. Ümumiyyətlə, Ermənistanın Beynəlxalq Ədalət Məhkəməsində Azərbaycana qarşı maddi-mədəni irsin dağıdılması ilə bağlı iddia irəli sürməsinin özü gülünc bir məsələdir. Ekspertlər bildirir ki, ermənilərin Qarabağda heç bir maddi-mədəni, tarixi, dini irsi yoxdur, olmayıb da. Bu səbəbdən də onların bu iddiasını Beynəlxalq Ədalət Məhkəməsi də absurd sayaraq rədd edib.
Ekspertlər deyir ki, Ermənistan Azərbaycanın Qarabağdakı və Qərbi Azərbaycandakı tarix-mədəniyyət abidələrini, dini irsini, məscidləri məhv edib, dağıdıb, mənimsəyib, amma öz cinayətlərini Azərbaycanın üzərinə yıxmaq istəyib, onun bu cəhdləri isə alınmayıb.
“Qərbi Azərbaycanda, xüsusən də Zəngəzurdakı tarix-mədəniyyət abidələrimizin vəziyyəti, taleyi barədə məsələlər aktivləşdirilməlidir ki, Ermənistan birdəfəlik sussun”
Bakı Dövlət Universitetinin (BDU) hüquq fakültəsinin dekanı Əmir Əliyev “Bakı-Xəbər”ə bildirdi ki, Ermənistanın Azərbaycana qarşı tarixi-mədəni abidələrin dağıdılması ilə bağlı iddiası da tamamilə rədd edilib. Ermənistanın Azərbaycana qarşı bütün iddialarının absurd olduğunu deyən Ə.Əliyevin sözlərinə görə, indiyə qədər bu ölkənin bütün iddiaları Beynəlxalq Ədalət Məhkəməsi tərəfindən rədd edilib. “Ermənistanın Beynəlxalq Ədalət Məhkəməsində Azərbaycana qarşı qaldırdığı hər üç məsələnin üçü də əsassızdır. Hər üçünü də Beynəlxalq Ədalət Məhkəməsi rədd etdi. Ermənistan 2020-ci il noyabrın 10-da imzalanan üçtərəfli bəyanatdan sonra saxlanılmış diversantları hərbi əsir hesab etsə də, BMT-nin Beynəlxalq Ədalət Məhkəməsi bu iddianı tamamilə rədd etdi. Onlar hərbi əsirlər deyil və onlar müvafiq cinayətlər törədiblər. Azərbaycan məhkəmələri də özünün cinayət qanunvericiliyinə uyğun olaraq həmin şəxsləri məsuliyyətə cəlb edib. Bu iddia da rədd edildi.
İkinci iddiaları Hərbi Qənimətlər Parkı ilə bağlı idi, bu da rədd edildi. Çünki Qənimətlər Parkının yaradılması tamamilə beynəlxalq hüquqa uyğundur. Belə bir parkın olması Haaqa konvensiyalarının əsas müddəalarından biridir, beynəlxalq hüquqa tamamilə uyğundur və vuruşan tərəflərin əldə etdiyi qənimətləri nümayiş etdirməsidir. Bu, dünya praktikasında, Haaqa konvensiyalarında əks olunub. Ermənistanın Azərbaycana qarşı bir başqa iddiaları isə tarixi-mədəni abidələrin dağıdılması ilə bağlı olub. O da tamamilə rədd edildi. Əksinə, Ermənistana, onun cəmiyyəti və dövlətinə məhz 1965-ci il İrqi ayrı-seçliyin bütün formalarının ləğv edilməsi üzrə Konvensiya müddəalarına uyğun bu hərəkətlərin aradan qaldırılması tələbi irəli sürüldü. Ermənistan Azərbaycanın 20 %-dən çox ərazisini işğal etmişdi və bununla da cinayət törətmişdi. BMT Təhlükəsizlik Şurası Ermənistan qoşunlarının Azərbaycan ərazilərindən qeyd-şərtsiz çıxarılması və işğal faktına son qoyulması barədə qətnamələr qəbul etmişdi. Ermənistan həmin qətnamələri yerinə yetirmədi. Azərbaycan öz diplomatik uğurları və özünümüdafiə hüququndan istifadə edərək bu işğala son qoydu. Ermənilər uzun illər işğal altında saxladıqları əraziləri dağıdıblar, bütün meşələri qırıblar. Bilirsiniz niyə? Çünki orada azərbaycanlılar yaşayıb və yaşayacaq”.
Ermənistanın Azərbaycana qarşı tarix-mədəniyyət abidələrinin dağıdılması ilə bağlı qondarma ittihamlarını bu ölkənin növbəti beynəlxalq həyasızlığı kimi şərh edən Ə.Əliyev hesab edir ki, bununla Ermənistan özü özünü beynəlxalq aləmdə biabır etdi. “Bu, Ermənistanın növbəti beynəlxalq həyasızlığı idi ki, onun da cavabı verildi. Əksinə, bundan sonra biz daha ciddi məsələ qaldırmalıyıq. Biz Qərbi Azərbaycanda (indiki Ermənistan), xüsusilə də Zəngəzurda Azərbaycan xalqına məxsus olan tarix-mədəniyyət abidələrinin qorunması məsələsini qaldırmalı, bu məsələni aktivləşdirməliyik. Bu məsələdə gecikmək olmaz, Qərbi Azərbaycanda, xüsusən də Zəngəzurdakı tarix-mədəniyyət abidələrimizin vəziyyəti, taleyi barədə məsələlər aktivləşdirilməlidir ki, Ermənistan birdəfəlik sussun. Beynəlxalq Ədalət Məhkəməsində Ermənistan özü özünü ifşa edib. Şuşada Azərbaycanın tarix-mədəniyyət abidələrini saxtalaşdırıb. Yəni ermənilər bizə aid olan abidələrin dağıtığını dağıdıb, dağıda bilmədiklərini isə saxtalaşdırıb, erməniləşdirib, farslaşdırıb. Bunlar hamısı Azərbaycan tərəfindən də qaldırılıb və müvafiq çərçivədə bu məsələlər tezliklə həll ediləcək” - deyə Ə.Əliyev qeyd etdi.
İradə SARIYEVA
