Erməni hüquq müdafiəçisi Vaan Oqanesyan öz Facebook səhifəsində Azərbaycan xüsusi təyinatlılarına könüllü təslim olan erməni hərbçilərin etiraflarını dərc edib. Oqanesyan yazır ki, bu etirafı yaydıqdan sonra bir çox insan ona zəng edib və yazıb, bunun həqiqiliyinə şübhələrini bildirib: “Bu şübhələri aradan qaldırmaq üçün mən Azərbaycandan qayıdan ondan çox hərbçinin ifadəsini gətirirəm”.
Sitat: “62 nəfər idik, onlar bizim istiqamətimizə gəlməyə davam edirdilər. Mövqedə 15-20 dəqiqə oturduqdan sonra nə baş verdiyini anlamaq üçün əsgərlərə yaxınlaşmaq qərarına gəldik. Onlardan biri rus dilində səlis danışaraq narahat olmamağımızı xahiş etdi, biz də təslim olduq. Yaxınlaşdım və gördüm ki, onlar 4-5 nəfərdir. Ocağın yanında daha 3-4 azərbaycanlı dayanmışdı”, - deyə Azərbaycandan əsirlikdən qayıdan S.G. danışıb.
“Biz bütün qərargahla mövqeni tərk etdik. Növbə ilə silahlarımızı azərbaycanlılara verdik, bundan sonra bizdən xahiş etdilər ki, onlarla gedək. Orada 7 azərbaycanlı və onların bir komandiri var idi”, - deyə, erməni hüquq müdafiəçisi hərbi əsir R.K.-dan sitat gətirib.
“Axşam saat 8 radələrində biz göstərilən mövqelərə getdik və “Yaşma” xüsusi təyinatlılarının bir dəstəsini gördük. Onlar 6-7 nəfər idi, biz də silahlarımızı təhvil vermək qərarına gəldik", - S.P danışıb.
“Tanımadığımız bir əraziyə çatdıqdan sonra 6-8 nəfərə yaxın Azərbaycan xüsusi təyinatlısı qarşımıza çıxdı, özlərini təqdim etdi, silah-sursat və geyim formalarımızı təhvil verməyi təklif etdilər”, - N.D deyib.
Erməni təbliğat maşınının 62 erməni hərbçisinin 7 Azərbaycan əsgərinə əsir düşdüyü rəyini yaratmaqda başlıca məqsədi nə ola bilər?
“Bakı-Xəbər” media qrupunun rəhbəri Aydın Quliyev az sayda azərbaycanlını misilsiz qəhrəman kimi təqdim etmək istəyən bu erməni yalanının əsl mahiyyətini belə izah edib: “Deyilən “xəbəri" erməni vəkil Vaan Oqanesyan özünün sosial şəbəkə hesabında yazıb. Elə bilib ki, ona inanacaqlar və hesab edəcəklər ki, bu 62 erməni o qədər
"bəşəri düşüncəli mütərəqqi adamlar” imişlər ki, qan tökülməməsi üçün 7 Azərbaycan əsgərinə təslim olublar... Əslində isə...
Vaan Oqanesyan Ermənistan spikerinin müzdlu xidmətçisindən başqa birisi deyil. Ermənistanın parlament sədrinin əsirlər barədə o məşhur bəyanatı ortaya çıxan kimi əsirlərin valideynləri İrəvanda ayağa qalxdılar, spikeri cəzalandlrmaq istədilər. Spikerin köməyinə vəkil Oqanesyan özünü yetirdi, şahid ifadələri ilə onların Azərbaycana könüllü təslim olduqlarına dair hekayə uyduraraq dünyaya demək istədi ki, Ermənistan parlamentinin sədri "əsir düşənlər mənim nəzərimdə yoxdur" fikrini yerində deyib və tam haqlıdır. Bu da sübut - 62 silahlının 7 azərbaycanlıya əsir düşməsi o deməkdir ki, onlar həqiqətən xaindirlər...”
Daşdəmir Əliyev: “Mən bu açıqlamanı erməni hakimiyyətindəki daxili gərginlikdən doğan təzahür sayıram”
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Paşinyan hakimiyyəti hərbi əsirlər mövzusundan bezib: “Çünki orduda yaranan acınacaqlı vəziyyət səbəbindən onların hərbçilərinin əsir düşməsi hakimiyyətə baha başa gəlir. Həm daxildə təzyiqlə uzləşirlər, həm də əsirlərin geri alınmasında müəyyən güzəştlərə getməyə məcbur qalırlar. Bundan əlavə, ordunu gözdən salmağa çalışırlar. Çünki Paşinyan nə qədər çalışsa da, ordunu özünə tam ram edə bilmir. Erməni ordusuna revanşistlərin təsiri çoxdur. Bu səbəbdən də siyasi hakimiyyətə bəzi itaətsizliklər yaşanır. Erməni rəsmiləri və hakimiyyətə yaxın hüquq müdafiəçiləri öz ordularının rəzil gündə olmasını ictimailəşdirirlər ki, nəzarəti ələ götürsünlər. Həm də daxili qüvvələrə mesaj verirlər ki, satqınları müdafiə etməklə onlara təzyiq göstərməsinlər. Hər nə olubsa, erməniləri əsir götürən Azərbaycan ordusunun əsgərləri olub. Bu da bizim ordunun psixoloji və hərbi hazırlıq cəhətdən qat-qat üstün olduğunu şərtləndirir. Mən bu açıqlamanı erməni hakimiyyətindəki daxili gərginlikdən doğan təzahür sayıram. Başqa bir məqsədləri isə hərbi əsir mövzusunu gündəmdə saxlamaqla beynəlxalq diqqəti bu mövzuya yönəltməkdir”.
Məhəmmədəli QƏRİBLİ
