Məlum olduğu kimi, Birləşmiş Millətlər Təşkilatının Beynəlxalq məhkəməsi Ermənistanın Azərbaycana qarşı “müharibə əsirlərinin dərhal geri qaytarılması haqda” əsas iddiasını təmin etməyib.
Bununla bağlı yayılan məlumatda deyilir ki, BMT məhkəməsi həmçinin erməni tərəfinin “Hərbi qənimətlər parkının bağlanması” və “Azərbaycan tərəfindən hərbi cinayətlərin araşdırılması haqda” iddialarını da təmin etməyib. Eyni zamanda, beynəlxalq məhkəmə bəyan edib ki, Ermənistan bu məsələlərlə bağlı əsaslandırılmış sübutlar təqdim edə bilməyib. Bundan başqa, BMT-nin beynəlxalq məhkəməsi Ermənistandan azərbaycanlılara qarşı irqi ədavətin, düşmənçiliyin qızışdırılmasının qarşısını almağı tələb edib.
Bütün bu deyilənlərin fonunda, BMT məhkəməsinin sözügedən qərarının Azərbaycan üçün nə kimi əhəmiyyəti var? Ekspertlər bunun əhəmiyyətini necə dəyərləndirir?
“Qərar İrəvanın süquta uğramış diplomatiya siyasətinin, eyni zamanda təhlükəli maraqlarının siyasi məhvidir”
Sözügedən məsələ ilə bağlı fikirlərini “Bakı-Xəbər”lə bölüşən “Səs” Media Qrupunun rəhbəri, politoloq Bəhruz Quliyev buna bir neçə aspektdən yanaşdı: “BMT-nin Beynəlxalq məhkəməsinin Azərbaycanın Ermənistana qarşı qaldırdığı iddiaları ilə bağlı müsbət qərarlar verməsi ilk növbədə güclü diplomatiyanın və təbliğatın məntiqi nəticəsidir. Məlum olduğu kimi, məhkəmədə Ermənistanın ölkəmizə qarşı qaldırdığı iddiaları təmin olunmayıb. Bu faktın özü də sübut edir ki, vaxtilə Ermənistanın Azərbaycan torpaqlarını işğal altında saxladığını sübut edən, eləcə də bu fakta müvafiq olaraq BMT-nin torpaqlarımızın dərhal və qeyd-şərtsiz işğaldan azad olunmasını tələb edən məlum dörd qətnaməsini icra etməyən İrəvan layiq olduğu cavablarını alır. O cümlədən, Beynəlxalq məhkəmə Azərbaycanın ittihamlarını kifayət qədər məqbul sayıb. Qaçqın və məcburi köçkünlərimizin işğaldan azad edilmiş ərazilərə qaytarılmasını, minalanmış sahələrin xəritələrinin Bakıya təhvil verilməsi prosesinin sürətlənməsini istəyib. Eyni zamanda irqçilik, etnik təmizləmə və s. kimi faktların aradan qaldırılması tələb olaraq irəli sürülüb. Bütün bunlar rəsmi Bakının ədalətli mövqeyinin siyasi cəhətdən uğur qazanması kimi qiymətləndirilməlidir. Təbii ki, bu reallıqdır və çox əhəmiyyətlidir. Diqqətçəkici məqamlardan biri də budur ki, Ermənistanın Azərbaycana qarşı qaldırdığı iddiaları – “Hərbi qənimətlər parkının bağlanması”, yaxud “Azərbaycan tərəfindən hərbi cinayətlərin araşdırılması haqqında” tələbləri rədd edilib. Belə də olmalı idi. Misal üçün, Hərbi Qənimətlər Parkının fəaliyyəti yalnız Azərbaycanda deyil və bu gün dünyanın bir çox ölkəsində, habelə Avropa ölkələrində bənzər muzeylər, parklar mövcuddur. Azərbaycanın haqqıdır ki, əldə etdiyi Zəfərini təbliğ, Ermənistanın 30 il boyu həyata keçirdiyi təcavüzkar, işğağlçılıq siyasətini isə ifşa etsin. Bütün dünya birliyi, bəzi məlum ölkələr istisna olunmaqla, Azərbaycanın haqlı mövqeyini dəstəkləyir. Həmin o bəzi məlum ölkələrə görə isə BMT Ermənistanın maraqlarını təmin edə bilməzdi, bu ədalətsizlik olardı”.
Politoloq hesab edir ki, sözügedən qərar təsadüfi deyil: “Müharibə başa çatandan sonra Ermənistan və onun separatçı əl buyruqları bir neçə dəfə Azərbaycanın suveren ərazilərində təxribat planlarını həyata keçirməyə çalışıblar. Üçtərəfli bəyanatın imzalanmasından sonra törədilən təxribatlara görə ələ keçirilən diversantlar hərbi əsir hesab oluna bilməz. BMT-nin Beynəlxalq məhkəməsi də bunu çox gözəl bilir və ona görə də Ermənistanın iddialarını rədd edir. Bütövlükdə isə bu məsələlərin mühüm amilləri ondan ibarətdir ki, arıtq kimin haqlı, kimin haqsız olduğu kifayət qədər məlumdur. Ən başlıcası, Azərbaycanın mövqeyi kifayət qədər möhkəm əsaslara söykənir. Ermənistanın isə mövqeyi və iddiaları əsassızdır. Düşünürəm ki, bu məhkəmə qərarı İrəvanın onsuz da süquta uğramış diplomatiya siyasətinin, eyni zamanda təhlükəli maraqlarının siyasi məhvidir”.
Politoloq onu da əlavə etdi ki, proseslər Azərbaycanın xeyrinə inkişaf edir.
Vidadi ORDSAHALLI
