Yayılan məlumatlara görə, Rusiya sülhməramlı kontingenti Xankəndidə yaşayan ermənilərə yardımlarını davam etdirir. Erməni teleqram kanalları yazırlar ki, Rusiya sülhməramlı kontingenti Xankəndiyə növbəti dəfə “humanitar” yük gətiriblər.
“Humanitar” yükün gətirilməsini əks etdirən və Teleqramda təqdim edilən fotoların, böyük ehtimalla, Xocalı ərazisindəki aeroportda çəkildiyi barədə iddialar var. Əgər iddia edildiyi kimidirsə, onda Rusiya sülhməramliları niyə “humanitar” yükü Azərbaycanda dünya standartlarına malik Füzuli aeroportundan istifadə etməklə Xankəndiyə çatdırmayıb? Niyə Rusiya sülhməramlı kontingenti öz yüklərini oradan daşımayiblar? Ekspertlərə görə, Bakı Xocalı hava limanının fəaliyyətinə rəsmi icazə verməyib və bu baxımdan da “humanitar” yüklərin ordan daşınması yolverilməzdir.
Rusiya sülhməramlı kontingentinin “humanitar” yükləri Xocalı aeroportundan istifadə etməklə Xankəndiyə gətirməsi barədə yayılan məlumatlar və fotolar nə dərəcədə doğru ola bilər?
“Onlar Xankəndiyə “Humanitar yardım” adı altında nələr daşıyırlar?”
Qarabağ Azadlıq Təşkilatının (QAT) sədri Akif Nağının sözlərinə görə, bu barədə yayılan məlumatların hər biri çox dərindən yoxlanılmalı və ona uyğun şəkildə addım atılmalıdır. “Vaxtaşırı olaraq erməni mətbuatında və seqmentlərində bu kimi məlumatlar yayılır. Yəni müvəqqəti olaraq Rusiya sülhməramlı kontingentinin nəzarətində olan Azərbaycan ərazilərində yaşayan ermənilərə humanitar yaradımların ediliyi haqda informasiyalar var. Bunun bir tərəfi odur ki, bundan ermənilər bir təbliğat vasitəsi kimi istifadə edirlər. Bunu dünyaya çatdırmaq, ictimai rəyə yeritmək istəyirlər ki, Rusiya ilə bu cür xoş münasibətlərimiz var, Rusiya ermənilərə belə xoş münasibət bəsləyir, onları hər şeylə təmin edir. Bu bir tərəfdən ermənilərin təbliğat vasitəsidir, digər tərəfdən də reallığı göstərir. Yəni Rusiya sülhməramlıları Azərbaycan qanunlarına hörmətsizlik nümayiş etdirir. Belə hallar müxtəlif formalarda olub, indi də davam edir. Rusiya sülhməramlılarının Xocalı aeroportundan istifadə etməsi real görsənir, amma bu məsələ dərindən araşdırılmalıdır. Bütövlükdə isə Füzuli beynəlxalq hava limanı var və Rusiya Xankəndiyə, yaxud başqa bir yerə yük daşımaq istəyirsə hökmən Füzuli hava limanından istifadə etməlidir. Onun imkanları da genişdir və Azərbaycan dövlətinin nəzarəti altında olan bir hava limanıdır. Eyni zamanda Xankəndi də Azərbaycan ərazisidir. Bu məsələlərə diqqətlə yanaşmalıdırlar. Əgər bu xətdən kənara çıxırlarsa, orada demək Azərbaycanın qanunlarına hörmətsizlik nümayiş etdirirlər. Bu məsələni Azərbaycan birmənalı şəkildə Rusiya rəhbərliyi qarşısında qoymalıdır və buna birdəfəlik son qoyulmasına nail olmalıdır. Həm də qeyri-qanuni şəkildə Xocalı hava limanından istifadə ediləməsinə son qoyulmalıdır. Bu qətiyyən yolverilməzdir. Azərbaycan bunu dəfələrlə bəyan edib. Xocalı hava limanı məsələsi belə idi ki, bu, Azərbaycanla Ermənistan arasında bir mübahisə obyekti idi. Ora təyyarə endirmək istəyirdilər. Hətta o zaman Serj Sarkisyan iddia edirdi ki, özüm uçacağam birinci. Azərbaycan da dedi ki, uçsanız təyyarə vurulacaq. Azərbaycan cəmiyyətində də belə mövqe var ki, qəti buna yol vermək olmaz. Rusiya slhməramlılarının Xocalı hava limanından bu şəkildə istifadə etməsi yolverilməzdir. Onlar Xankəndiyə “Humanitar yardım” adı altında nələr daşıyırlar? Bu çoxlu suallar doğurur... Bu həm Azərbaycan qanunlarına hörmətsizlikdir, eyni zamanda təhlükəli məqamdır...Keçən əsrin 90-cı illərinin əvvəllərində “humanitar yardım” adı altında Rusiyanın özündən də, başqa ölkələrdən də Azərbaycana qarşı istifadə olunmaq üçün silah-sursat gətirilirdi. Bunların hamısını biz yaxşı bilirik. Bir azdan ola bilər ki, başqa ölkələr də bu hava limanından Rusiyanın xəttilə istifadəyə cəhd etsinlər və separatçılara “humanitr yük” adı altında silah göndərsinlər. Yaxud başqa təxribat xarakterli işlər olsun. Ona görə də bunların qarşısı alınmalıdır. Məsələnin bir tərəfi budur. Digər tərəfdən də, Rusiya sülhməramlılarının bu cür “humanitar yardım”larına son qoymaq lazımdır. Sən ora sülhməramlı kimi gəlmisən və statusuna uyğun hərəkət et...”- deyə A.Nağı vurğuladı.
İradə SARIYEVA
