Beynəlxalq Ədalət Məhkəməsi Azərbaycanın iddiası üzrə Ermənistanın təcili tədbirlər görməsinə dair qərar verib. Məhkəmə Ermənistanda etnik zəmində zorakı çağırışlar edən qruplaşmalar və fərdi şəxslərə qarşı Ermənistan dövlətinin təcili tədbirlər görməsinə dair qərar qəbul edib.
Qərara görə, Ermənistan BMT-nin “İrqi ayrıseçkiliyin bütün formalarının ləğv edilməsi haqqında” Konvensiyası çərçivəsində götürdüyü öhdəliklərə uyğun olaraq, öz ərazisində təşkilatlar və özəl şəxslər tərəfindən də daxil olmaqla azərbaycanlı milli mənsubiyyəti olan şəxslərə hədəflənmiş irqi ayrıseçkiliyə təhrik və təşviqin qarşısını almalıdır.
Artıq beynəlxalq məhkəmədə Ermənistana qarşı konkret tələblər qoyulur. Nəzərə alaq ki, Azərbaycana qarşı bu arzuolunmaz hallara yol verənlər arasında Ermənistanın mövcud hakimiyyətində təmsil olunan şəxslər də az deyil. Yəni bu prosesdə təkcə Ermənistanin keçmiş rəhbərliyi iştirak etməyib, müasir məmurlar da iştirak edib.
“Kimliyindən asılı olmayaraq, bizə qarşı etnik ayrıseçkilik edənlərin, nifrət bəsləyənlərin, bunu təşviq edənlərin...”
AVCİYA-nın vitse-prezidenti, professor, siyasi şərhçi Məhərrəm Zülfüqarlı hesab edir ki, BMT Ermənistan dövlətinin boynuna bütün milli qisasçıları cəzalandırmaq məsuliyyəti qoyub və Ermənistan da konkret olaraq Ədalət Məhkəməsinin tələblərini yerinə yetirməlidir. “Ermənistan-Azərbaycan-Dağlıq Qarabağ münaqişəsi başlayandan beynəlxalq təşkilatlar bir sıra qərarlar qəbul ediblər. Azərbaycan hələ keçən əsrin 90-cı illərində, indikindən qat-qat zəif olduğu dövrlərdə BMT-nin 4 qətnaməsi olub. Hələ o dövrdə Azərbaycanın haqq işinin qalib gələcəyinə bizdə inam yaranıb. İndi isə Azərbaycan güclüdür, qardaş Türkiyə də Azərbaycana əvvəlkindən daha çox dəstək verir. Bu gün Azərbaycanı dəstəkləyən ölkələrin sayı həddən artıq çoxdur. Qoşulmama Hərəkatına, Türk Birliyinə daxil olan dövlətlərdən, Pakistan kimi nüvə silahına malik olan güclü bir dövlətdən dəstək alırıq. Bu halda bizim səsimiz daha çox eşidilməlidir. BMT-nin Ədalət Məhkəməsinin Ermənistanda etnik zəmində zorakı çağırışlar edən qruplaşmalar və fərdi şəxslərə qarşı Ermənistan dövlətinin təcili tədbirlər görməsinə dair qəbul etdiyi qərar haqq-ədalətin bərpa edildiyindən xəbər verir. Amma bu qərar qəbul olunubsa biz arxayın olmalı deyilik ki, hər şey öz yerini tutub. Xeyr. Hər bir beynəlxalq təşkilatın, məhkəmənin, həm də BMT-nin qəbul etdiyi qərarın icrası üçün bizim dövlətimiz əvvəlkindən daha çox çalışmalıdır. Çünki bu qərarların icrasına mane olan çoxsaylı qüvvələr var. Məsələn, BMT Təhlükəsizlik Şurası tərəfindən Azərbaycanın xeyrinə qəbul olunan 4 qətnamə ki vardı, Ermənistan çox gülünc bəhanə gətirərək onların icrasından yayındı. Beynəlxalq təşkilatlar da buna susurdu. Mən özüm dəfələrlə xarici tədbirlərdə erməni ekspertlərinin fikirlərini eşitmişəm. Onlar iddia edirdilər ki, bu 4 qətnamədə konkret olaraq Ermənistan Silahlı Qüvvələrinin adı işlənmir, orada bir abstrakt işğalçı kəlməsi işlənir. Deyirdilər ki, sizin torpaqları Qarabağ erməniləri işğal edib və siz gedin onlarla danışıq aparın. Yəni Ermənistan təmsilçiləri bu cür riyakarlığa əl atırdılar”.
M.Zülfüqarlı hesab edir ki, Ermənistan hər zaman riyakardır və BMT Ədalət Məhkəməsinin qərarını da icra etməkdən yayınmaq üçün müxtəlif bəhanələr gətirə bilərlər. “İndi də onlar Ədalət Məhkəməsinin qərarının icrasından bəhanələrlə boyun qaçırmağa çalışacaqlar və qərarların icrasına mane olmağa cəhdlər edəcəklər. Bu baxımdan hesab edirəm ki, BMT məhkəməsində ədalətli qərarın verilməsinə nail olduğumuz kimi, Ermənistan tərəfindən bunun tam icra edilməsinə də nail olmalıyıq. Kimliyindən asılı olmayaraq, bizə qarşı etnik ayrıseçkilik edənlərin, nifrət bəsləyənlərin, bunu təşviq edənlərin hamısı cəzalandırılmalıdır. Azərbaycan buna çalışmalıdır. Dövlətimiz əvvəlki deyil, indi hərtərəfli şəkildə güclüdür, bizim haqq işimizə dəstək verən çoxlu sayda beynəlxalq hüquqşünaslarımız da var. Ona görə də, biz çalışmalıyıq ki, bu qərarlar vaxtında icra olunsun, Ermənistan hansısa formada qərarları icra etməkdən yayına bilməsin. Bütün səylərimizi də buna sərf etməliyik. Konkret olaraq qərarın qəbulundan eyforiyaya qapılıb arxayınlaşmaq olmaz, mübarizəmizi davam etdirməliyik ki, Azərbaycanın haqq işi bütün mərhələlərdə qalib gəlsin”.
M.Zülfüqarlı əlavə etdi ki, Ermənistan BMT-nin “İrqi ayrıseçkiliyin bütün formalarının ləğv edilməsi haqqında” Konvensiyası çərçivəsində götürdüyü öhdəliklərinə uyğun olaraq, öz ərazisində təşkilatlar və özəl şəxslər tərəfindən də daxil olmaqla azərbaycanlı milli mənsubiyyəti olan şəxslərə hədəflənmiş irqi ayrıseçkiliyə təhrik və təşviqin qarşısını almalıdır və bu yolu tutanları cəzalandırmalıdır. O qeyd etdi ki, azərbaycanlı milli mənsubiyyəti olan şəxslərə hədəflənmiş irqi ayrıseçkiliyə təhrik və təşviqi alovlandıran şəxslər statusundan asılı olmayaraq cəzasını almalıdır. Onun sözlərinə görə, Ermənistanda anti-Azərbaycan ab-havasını yaradanlara və qızışdıranlara qarşı tədbirlər görülməlidir.
İradə SARIYEVA
