Ermənistan parlamentinin spikeri Alen Simonyanın rəsmi qəbullardan birində çəkilmiş gizli görüntüləri yayılıb. Həmin görüntülərdə Simonyan həmsöhbətinə “mənim üçün artıq əsirlər mövcud deyil”, - deyə bildirir. Simonyan, çox güman ki, Azərbaycanla sərhəddə noyabrın 16-da əsir götürülmüş bir qrup erməni hərbçisini nəzərdə tutur. Simonyanın görüntülərini mobil telefonla gizlicə çəkən şəxs danışmır, amma görüntülərin bir neçə hissədən ibarət olduğu və kəsilib birləşdirildiyi görünür:
Həmsöhbəti: Məsələn, bizim əsirlər hələ 2-3 ay da gözləyə bilər?
Alen Simonyan: Düz deyirlər, düz deyirlər...
Həmsöhbəti: İnsanlar arasında belə şeylər danışanda...
Simonyan: Yox, düz deyil, başa düşmürlər. Həmin əsirlərin, həmin o əsgərlərin vəzifəsi nə idi?..
Həmsöhbəti: Vətəni müdafiə etmək.
Simonyan: Bağışlayın, ola bilsin mən bir az düz ifadə etmirəm, amma hesab edirəm ki, həmin əsirlər artıq yoxdur. Mənim üçün onlar yoxdur. Terrorçular təyyarəni girov götürəndə İsrail onlarla danışıqlar aparmır, təyyarəni vurur. Bəs bilirsinizmi kimdir həmin əsirlər?
Həmsöhbəti: Bunu sizdən eşitmək istərdim...
Simonyan: Bunlar silahlarını atıb qaçıblar və azıblar. Mən bu haqda publik olaraq danışa bilmərəm. Bəs sizə maraqlı deyilmi ki, nəyə görə həmin əsirlərin valideynləri indi fəallıq göstərmir? Çünki həmin adamlar bilir ki, əsgərlər fərarilik ediblər. Silahı atıb qaçıblar və əsir düşüblər.
Alen Simonyanın hələlik bu videoya münasibəti məlum deyil, amma Ermənistan parlamentinin bu gün əsirlərlə bağlı məsələni müzakirə etmək üçün təcili toplantı keçirəcəyi bildirilir. Ermənistanın faktiki olaraq öz hərbi əsirlərindən imtina etmək istəməsinin sirri nədir?
Azərbaycan Demokratiya və İnsan Haqları İnstitutunun direktoru, eyni zamanda Azərbaycanlı Əsir və Girovlarla bağlı Məlumat Mərkəzinin koordinatoru Əhməd Şahidov “Bakı-Xəbər”ə açıqlamasında bildirdi ki, əslində bu, Ermənistan cəmiyyətində dərin kök salmış məsələdir: “Məsələyə bir neçə aspektdən yanaşa bilərik. İlk növbədə Ermənistan hökuməti artıq bu mövzudan yorulub. 44 günlük müharibədən sonra dəfələrlə erməni silahlı birləşmələrinin razılaşmanı pozaraq Azərbaycan tərəfə hücuma keçdiklərinin şahidi olmuşuq. Hər dəfə də zərərsizləşdiriliblər. Bu səbəbdən də onlar üçün baş ağrısına çevrilib. Hər dəfə də Moskvanın və digər ölkələrin vasitəçiliyinə əl atıblar. Buna görə bizə yalvarışlar olub. Bir neçə gün bundan əvvəl 10 nəfər əsir də təhvil verildi. Bu, əslində Azərbaycanın humanist yanaşmasıdır. Həm də danışıqlarda Ermənistanın əlini zəiflədir. Çünki onlar bunu tələb edəndə biz də müəyyən şərtlər irəli sürürük. Minalanmış sahələrin xəritələrini də bunun müqabilində təqdim ediblər. Digər tərəfdən, Ermənistan ordusundakı ikitirəliyin göstəricisidir. Çünki Nikol Paşinyan nə qədər çalışsa da, Ermənistan ordusunu ipə-sapa yığa bilmir. Dəfələrlə müdafiə nazirlərini, qərargah rəislərini dəyişsə də, ortada nəticə olmur. Ermənistan ordusunda nizam-intizam çox bərbaddır. Ermənistan spikerinin bu açıqlaması həm də buna əsaslana bilər ki, güya onların hərbçiləri yolu azıb biz tərəfə keçiblər. Onlar bizə qarşı hərbi təxribatlar həyata keçirərkən zərərsizləşdirilərək əsir götürülüblər. Sikerin azıb deməsi həqiqəti əks etdirmir. Ermənistan tərəfi bununla iz də azdıra bilər. Bu məsələdə bir qədər ehtiyatlı olmalıyıq. İstənilən halda gercəklik dəyişmir. Cəmiyyət bu məsələdə Paşinyanı divara dirəyir. Mən bu məsələdə Azərbaycanın yürütdüyü siyasəti uğurlu sayıram. Çünki hər dəfə Ermənistanı divara dirəyib, nələrisə ona etdirir”.
Məhəmmədəli QƏRİBLİ
