BMT-nin Beynəlxalq Ədalət Məhkəməsi Ermənistan hökumətindən Qarabağ müharibəsi dövründə işğaldan azad edilmiş rayonların mina xəritələrinin verilməsi haqqında qərar qəbul edib. Məsələ ondadır ki, bir neçə gün öncə məhkəmənin ədalətli qərarından ehtiyat edərək, Ermənistan hökuməti Qarabağın digər ərazilərinin mina xəritələrini Azərbaycana təhvil verib.
O da məlumdur ki, bundan əvvəl Ermənistan işğaldan azad edilən 3 rayonun mina xəritələrini Azərbaycana təhvil vermişdi. Ancaq sonra məlum oldu ki, həmin xəritələrin dəqiqliyi 25 faizdir. Ümumilikdə, artıq məsələyə məhkəmədə baxılan zaman bir çox nüfuzlu qurumlar xəritələrin verilməsi ilə bağlı Ermənistana çağırış edib. Çünki minalar səbəbindən mülki şəxslərimizin həlak olması ilə bağlı bütün faktlar məhkəməyə təqdim edilib. Ermənistan məhkəmə tərəfindən qərarın elan edilməsindən 3 gün əvvəl digər ərazilərin mina xəritələrini verməklə məhkəmənin məsələyə münasibət bildirməsi zərurətini aradan qaldırdı. Görünən odur ki, Ermənistsn BMT məhkəməsinin qərarını gözləmədən bütün Qarabağın mina xəritələrini verdi. Əgər bu xəritələrdə də qeyri-dəqiqlik olsa, Ermənistan hansı beynəlxalq məsuliyyəti daşımalıdır?
“Bu zaman Ermənistana qarşı bir sıra maliyyə və digər sanksiyalar tətbiq oluna bilər”
Sözügedən məsələyə aydınlıq gətirən hərbi ekspert İbrahim Rüstəmli bununla bağlı bir sıra məqamlara toxundu: “Dünyanın 70-ə yaxın ölkəsində 120 milyona yaxın mina basdırılıb. Hər gün bu minalara orta hesabla 70-ə qədər insan düşür. Ən dəhşətlisi odur ki, mina partlayışı zamanı həyatını itirən hər 3 nəfərdən biri uşaqdır. Vəziyyət o yerə gəlib çatıb ki, dünya miqyasında minalanmış ərazilərlə bağlı çox ciddi bəyanatlar səslənir. Bəzi məlumatlara görə, sözügedən minaların təmizlənməsi üçün 65 milyard dollardan 100 milyard dollara qədər vəsait lazımdır. Yəni bu gün dünyada mina əleyhinə ciddi bir kampaniya aparılır. Belə bir vaxtda Ermənistanın minalanmış ərazilərin xəritələri ilə bağlı qeyri-dəqiqliyi beynəlxalq səviyyədə müzakirə olunası bir məsələyə çevriləcək. Bu o deməkdir ki, növbəti dəfə qeyri-dəqiqlik olarsa, Ermənistan buna görə cavab verməli olacaq. Çünki mina partlayışlarından daha çox mülki insanlar əziyyət çəkir. Mina partlayışları zamanı ya həyatını itirir, ya da şikəst olurlar. Bir məqamı qeyd edim ki, Ermənistan mina xəritələrini Azərbaycanın təzyiqlərindən sonra verdi. Həmçinin, bununla bağlı beynəlxalq təzyiqlər də artmaqda idi. Yoxsa onlar öz xoşu ilə bu xəritələri verməzdilər. Sonuncu verilən xəritələr də qeyri-dəqiq olarsa, buna görə Ermənistan cavab verməli olacaq. O zaman bu, ermənilərin insanlığa qarşı cinayəti kimi dəyərləndiriləcək. Bu zaman Ermənistana qarşı bir sıra maliyyə və digər sanksiyalar tətbiq oluna bilər. BMT məhkəməsinin qərarından sonra qarşı tərəf məsuliyyətdən qaça bilməyəcək”.
Vidadi ORDAHALLI
