Bu gün Azərbaycan üçün mühüm məqsədlərdən biri Ermənistanın üçtərəfli bəyanatlara əməl edərək ölkəmizin ərazi bütövlüyünü tanıması, regionda sülh və əməkdaşlıq prosesinə yaratdığı maneəni aradan qaldırmaqdır. Əks təqdirdə erməni tərəfinin bundan ciddi zərər görəcəyini Azərbaycan ən yüksək səviyyədə bəyan edir.
Qeyd edək ki, Prezident İlham Əliyev Qubanın Qonaqkənd qəsəbəsində sakinlərlə görüşü zamanı bu xüsusda konkret mesajlar verib: “Mən onlara artıq dəfələrlə müraciət edərək demişdim, bizim şərtlərimizi qəbul etməlidirlər, yollarla, kommunikasiyalarla bağlı hər hansı bir qeyri-səmimi yanaşmaya son qoyulmalıdır. Əgər belə olarsa, onda Cənubi Qafqazda bütün xalqlar sülh, əminamanlıq şəraitində yaşayacaq. Çünki biz istədiyimizə nail ola bilmişik, bunu hər kəs gördü. Ermənistan da gördü, dünya da gördü, heç kim bizi saxlaya bilmədi. Müharibə dövründə bizi saxlamaq istəyənlər olub, kifayət qədər güclü dairələr olub, amma bizi dayandıra bilmədilər. Mən demişdim ki, bizə tarix versinlər torpaqlarımızdan nə vaxt çıxır, o an biz dayanmağa hazırıq. Bu gün də eyni sözü deyirəm. Amma deyirəm ki, bizə tarix versinlər, Zəngəzur dəhlizi nə vaxt açılacaq və belə olan halda, heç bir problem olmayacaq. Ona görə hesab edirəm ki, həm Ermənistan rəhbərliyi, həm Ermənistan ictimaiyyəti, əhalisi bunu başa düşməlidir. Biz istədiyimizə nail olmuşuq, oluruq və olacağıq. Yaxşı olar ki, bu məsələ konstruktiv şəkildə danışıqlar yolu ilə, qarşılıqlı anlaşma yolu ilə həll olunsun. Çünki İkinci Qarabağ müharibəsi bütün dünyaya xalqımızın iradəsini, gücünü və birliyini göstərdi”. Azərbaycan tərəfinin bu yanaşması artıq Ermənistanda isterik reaksiya və yeni qorxuya səbəb olub. Bunun əsas səbəblərindən biri Azərbaycanın gücünə ermənilərin yaxşı bələd olması, eyni zamanda Bakının yanaşmalarının Moskva və Ankara tərəfindən də tam dəstəklənməsidir. Belə vəziyyətdə erməni tərəfinin Rusiyanın maraqlarına qarşı gedərək Qərblə yeni işbirliyinə can atması İrəvanın durumunu daha da ağırlaşdırır. Rusiyalı ekspert Vitali Arkov baş verənlərin Ermənistan üçün ciddi fəsadlarının olacağı qənaətindədir. O bu xüsusda “axar.az” portalına bildirib: “İrəvan Brüssel görüşünə böyük ümüdlər bəsləyir. Oradan gələn son bəyanatları Azərbaycan prezidenti İlham Əliyevlə Ermənistanın baş naziri Nikol Paşinyan arasında baş tutacaq danışıqlara hazırlıq kimi başa düşmək lazımdır”. Onun sözlərinə görə, Ermənistanın hazırkı rəhbərliyinin üzərinə götürdüyü öhdəliklərin icrasını uzatmaq üçün daha hansı "bəhanələr" tapacağını təsəvvür etmək belə çətindir: “Paşinyanın məqsədi Rusiyanın regiondakı proseslərə təsirini azaltmaq, Qərb ağalarının Cənubi Qafqazda itirilmiş mövqelərini bərpa etməyə çalışmaqdır. Bu baxımdan, dekabrın 15-də bizi “Brüssel tamaşası” gözləyəcək: Ümumi sözlər... Brüssel heç vaxt hər iki tərəfi eyni vaxtda qane edən prinsipial yenilik ortaya qoya bilməz. Hər şey əvvəllər Moskva tərəfindən Bakı və İrəvanla sıx əməkdaşlıq şəraitində hazırlanıb və onlar tərəfindən qəbul edilib. Bu gedişlə, İrəvan Brüssel görüşündən sonra da razılaşmalara “təpik atacaq”. Bu halda Bakı başqa təsir tədbirləri görəcək. Bakı artıq səbr nümayiş etdirməyəcək. Necə deyərlər: Xoş söz və tapanca ilə siz yalnız xoş sözlə qazana biləcəyinizdən daha çoxuna nail ola bilərsiniz”.
Rusiyalı hərbi ekspert Yevgeni Mixaylovun da məsələyə münasibəti olduqca maraqlıdır. Ekspert qeyd edir ki, İlham Əliyev Nikol Paşinyana Qərbin dəstəyi ilə Ermənistan-Azərbaycan münaqişəsinin nizamlanması ilə bağlı əldə edilmiş razılaşmaları dəyişmə imkanı verməyəcək. Onun sözlərinə görə, Ermənistan növbəti dəfə bir neçə stulda əyləşməyə çalışır. O, əlbəttə ki, elə Fransanın timsalında Avropa İttifaqının dəstəyinə ümid bəsləyir: “İrəvanın bu oyunu Moskva “Bunlar nə vaxtadək davam edəcək” sualını verənədək sürəcək. Rusiya Federasiyası regionda sülhməramlı prosesin əsas moderatorudur. Məhz Moskvanın zəmanəti ilə Azərbaycan konkret razılaşmalara razılıq verib. Ermənistan da öz hərəkətləri ilə Rusiya Federasiyasının həm Dağlıq Qarabağ münaqişəsi üzrə səylərini, həm də bütövlükdə regionda sülh və razılığın əldə edilməsi çabalarını zərbə altına qoyur. Məncə, yaxın vaxtda vəziyyət dəyişəcək, çünki Moskvanın səbri tükənir”. Mixaylov bu fonda “Demokratiya sammiti” mövzusuna da toxunub: “Məlumdur ki, dekabrın 9-10-u tarixlərində Ermənistanın ABŞ-dan dəvət aldığı "Demokratiya sammiti" keçiriləcək. Rusiya, Çin, Türkiyə və Azərbaycan bura dəvət ediməyib. Bu, son dərəcə səciyyəvi hərəkətdir. Hamımız yaxşı bilirik ki, “demokratiya” Qərbin anlayışında nə deməkdir. Düşünürəm ki, Ermənistanın sammitə dəvət alması ABŞ-ın respublikada "demokratik islahatlara" dəstək vermək üçün daha bir cəhdidir. Bu da orada yerləşən fondların işidir. Həmin fondlar Ermənistanı Qərbə yaxınlaşdırmaq niyyətindədirlər. Əlbəttə, bu, Ermənistanı Rusiyaya qarşı çevirmək cəhdidir. Niyə Azərbaycanı dəvət etməmisiniz? Çünki o, müstəqil siyasət yeridir, Qərb ona nəsə diqtə edə bilməz. Ermənistan isə Cənubi Qafqazda zəif bənddir”. Ermənistan parlamentində müxalif “Hayastan” fraksiyasının üzvü Vahe Akopyan bu fonda qeyd edir ki, indiki hakimiyyətin səriştəsiz siyasəti Ermənistanı məhvə aparır: “Bu hakimiyyət xain, dağıdıcı, səriştəsiz davamlı siyasət yürütməklə Azərbaycana sərt bəyanatlar vermək imkanı verir. Azərbaycan qalib mövqeyindən danışır, amma məğlubiyyətimiz də davamlıdır. Bu, dövlətçiliyimizi, xalqımızı, ölkəmizi Nikol və komandasının hara gətirib çıxarmasının nümunəsidir. Azərbaycana dəhliz verib-verməmək məsələsi daha çox Ermənistan hakimiyyətinin iradəsindən asılıdır, lakin Paşinyanın dövründə İlham Əliyevin istədiyini ala biləcəyi göz qabağındadır".
Samirə SƏFƏROVA
