“...Bizim son vaxtlar apardığımız işlər onu göstərir ki, hər hansı bir revanşist meyl olarsa, onun məsələsi dərhal yerindəcə həll olunacaq. Çünki müharibədən sonra Ermənistan tərəfindən bir neçə dəfə belə cəhdlər oldu və onun acı nəticələrini onlar özləri gördülər. Ona görə, hələ ki gec deyil, mən onlara artıq dəfələrlə müraciət edərək demişdim, bizim şərtlərimizi qəbul etməlidirlər, yollarla, kommunikasiyalarla bağlı hər hansı bir qeyri-səmimi yanaşmaya son qoyulmalıdır. Əgər belə olarsa, onda Cənubi Qafqazda bütün xalqlar sülh, əmin-amanlıq şəraitində yaşayacaq. Çünki biz istədiyimizə nail ola bilmişik, bunu hər kəs gördü...”
Bunu Prezident İlham Əliyev dekabrın 6-da Qubanın Qonaqkənd qəsəbəsində yeni inşa olunan Mədəniyyət Evində yaradılan şəraitlə tanış olduqdan sonra qəsəbə sakinləri ilə görüşdə bildirib.
Azərbaycan Prezidenti revansitlərə son xəbərdarlığını etdi ki, bir də baş qaldırmaq istəsələr, məsələ dərhal yerindəcə həll olunacaq. Siyasi ekspert Rövşən Rəsulov “Bakı-Xəbər”ə şərhində bildirdi ki, Ermənistan yenə də oyun oynamaq istəyir, amma bu alınmayacaq, artıq Azərbaycan Prezidentinin bəyanatlarından nəticə çıxarılmalıdır: “Prezident İlham Əliyevin Qubaya səfəri zamanı Zəngəzur dəhlizinin, eləcə də nəqliyyat və kommunikasiya xətlərinin açılması yönündə irəli sürdüyü fikirlərini sonuncu xəbərdarlıq atəşi kimi də qiymətləndirmək olar. Artıq dekabr ayının ilk beşgünlüyü geridə qalıb, lakin noyabrın 26-da Soçidə dəhlizin açılması ilə bağlı verilmiş vədlər hələ də dalana dirənib və gördüyümüz kimi, heç bir irəliləyiş yoxdur. Bu gün Ermənistan tərəfi parlamentdə dinləmələr keçirir, hökumət toplanır və ölkə KİV-lərində də belə bir informasiyalar verilir ki, guya Zəngəzur dəhlizinin açılması yönündə fikir mübadilələri aparılır, həmçinin sərhədlərin delimitasiyası və demarkasiyası ilə bağlı son qərarlar müzakirə edilir. Sizi inandırım ki, bütün bunlar sadəcə və sadəcə boş imitasiyalardır və zaman udmağa hesablanıb. Erməni tərəfinə zamanı Brüssel görüşünə qədər uzatmaq lazımdır ki, orada bəlkə Bakıya qarşı hər hansı təzyiqlər göstərilsin və s. Amma biz bəri başdan bilirik ki, 44 günlük müharibədə də təzyiqlər oldu, amma Azərbaycan bir addım da olsun geri çəkilmədi, İlham Əliyevin qətiyyəti və iradəsi, xalqın sonsuz dəstəyi buna imkan vermədi. Bütün bunlardan sonra sözügedən məsələdə bizə qarşı hər hansı bir təzyiqin məhz İrəvanın istədiyi nəticəni verəcəyini düşünmək isə, ən azından, absurddur. Əbəs deyil ki, dövlət başçısı Quba səfəri zamanı bu barədə də xatırlatma etdi və Bakıya olan təzyiqlərin səmərəsiz qaldığını xüsusilə vurğuladı. Bu o demək idi ki, İrəvan nə qədər nala-mıxa döyəcləsə belə, yenə də Bakının dediyi olacaq – Zəngəzur dəhlizi bütün mənalarda açılacaq. İndi guya Ermənistanda revanşist qüvvələr peyda olublar və onlar Paşinyan hökumətinə müxtəlif vasitələrlə təsir göstərməyə çalışırlar ki, necə olursa-olsun, o sözügedən məsələlərdə dirəniş göstərsin. Ümumiyyətlə, Paşinyanın Qərbdən dəstək ala bilməsi qeyri-mümkün görünür, həmçinin revanşist qüvvələrin də tələblərini icra edə bilməz. Hər iki halda uduzan tərəf yenə də odur, amma etiraf edək ki, o öz çulunu sudan quru çıxarmağa çalışır. Ona görə də imitasiyalarla məşğuldur”.
R.Rəsulovun sözlərinə görə, bu gün Ermənistanın yaxasını kənara çəkmək cəhdləri Kremli də möhkəm qıcıqlandırır. “Məsələn, xatırlada bilərəm ki, Vladimir Putin üçtərəfli işçi qrupa ilkin nəticələrə gəlmələri üçün bir həftə vaxtın kifayət etdiyini demişdi və onun sözləri ilə İlham Əliyev də həmfikir olmuşdu, artıq 10 gündən çox vaxt geridə qalıb. Nəzərə alsaq ki, Zəngəzur dəhlizindən yalnız Azərbaycan deyil, Rusiya da faydalanacaq və Moskva Qərbdən uğradığı çoxsaylı iqtisadi sanksiyaları məhz bu faydası ilə sığortalayacaq, onda İrəvanın qaçmağa yeri də qalmır. Lakin bütün bunlara rəğmən, əsas söz Bakıdadır, Bakının isə çox gözləməyə nə vaxtı, nə istəyi, nə də səbri qalıb. Prezident Əliyev İrəvana son sözünü deyib, lakin Paşinyanın inadkarlığı, revanşistlərin isə ipə-sapa yapmamaları növbəti addımların məcburetmə vasitəsilə atılmasına geniş şərait yaradır. Əgər elədirsə, bu zaman Allah Ordumuza yar və yardımçı olsun”- deyə siyasi ekspert R.Rəsulov qeyd etdi.
İradə SARIYEVA
