Birləşmiş Ərəb Əmirlikləri Milli Təhlükəsizlik müşaviri Şeyx Tahnoun ibn Zayed əl-Nəhyan İran İslam Respublikasına səfər reallaşdırıb. Bu barədə rəsmi açıqlama verilib. Rəsmi açıqlamada vurğulanır ki, səfər çərçivəsində İranın Milli Təhlükəsizlik Ali Şurasının Baş katibi Əli Şəmxani ilə görüş keçirilib.
Görüş zamanı iki ölkə arasındakı təhlükəsizlik məsələləri, əməkdaşlıqlar və region müzakirə olunub. Həmçinin bir sıra vacib sahələr üzrə ili ölkə arasındakı münasibıələrin inkişaf etdiriləcəyinə dair razılığa gəlindiyi bildirilir. Qeyd edək ki, bu iki ölkə arasındakı münasibətlərdə uzun müddət sərinlik hökm sürürdü. İki müsəlman ölkəsinin bu cür yaxınlaşması gələcək üçün nə vəd edir?
Politoloq Qabil Hüseynli “Bakı-Xəbər”ə açıqlamasında bildirdi ki, bu olduqca ciddi bir hadisədir: “Bu iki ölkə arasında münasibətlər o qədər də şəffaf olmayıb. Hazırda reallıqlar dəyişir. Bölgədə müəyyən kommunikasiya xətlərinin bərpası həyata keçirilir. Şimal-Cənub adlı yeni dəmiryol koridoru işə düşür. Bu layihə bilavasitə Azərbaycanın dəstəyi ilə ərsəyə gəlib. İranın fars körfəzinə çıxışı olan Bəndər Abbas limanı ilə Dubay arasındakı əlaqələr getdikcə daha da ciddiləşəcək. Mənə belə gəlir ki, daha çox iqtisadi faktorlar Birləşmiş Ərəb Əmirliklərini İranla münasibətləri yaxşılaşdırmağa vadar edib. İran indiyə qədər Zəngəzur dəhlizinin açılmasına maneçilik törədirdi. Ancaq praktika sübut etdi ki, Zəngəzur dəhlizinin açılması, həmçinin Şimal-Cənub dəmiryol xəttinin fəaliyyətə başlaması İranın maraqlarına tam cavab verir. Bu amil İranı yaxın coğrafiyada olan ölkələrlə daha da yaxınlaşmağa vadar edir. Məlumdur ki, BƏƏ ABŞ-la yaxın müttəfiqdir. ABŞ-ın da İranla münasibətləri gərgindir. Ancaq bu amil də iki ölkə arasındakı münasibətlərin gələcək inkişafına təsir etməyəcək. BƏƏ son vaxtlar iqtisadi məsələlərə daha çox önəm verir. Həmin ölkədə iqtisadiyyatın inkişafına dövlətin müdaxiləsi daha daçoxalıb. Bu səbəbdən də, dişi zəifləyən ABŞ-ın prosesə maneçilik törədə bilməsi istisna olunur”.
Qeyd edək ki, İranın ərəb ölkələrinə qarşı loyal siyasətə keçməsi ötən ilin ortalarından başlayıb. Həmin vaxt İranın xarici işlər naziri açıq mətnlə Bəhreyn və Birləşmiş Ərəb Əmirlikləri ilə münasibətləri yaxşılaşdırmağa hazır olduqlarını bəyan etmişdi. Hətta həmin ölkələrin İsraillə əməkdaşlığının buna mane olmayacağını demişdi. XİN rəhbəri demişdi ki, İranın qonşu ölkələrlə münasibətləri qarşılıqlı hörmət prinsipinə əsaslanır: “Bu ölkələr İranla yaxşı münasibətlər istədikləri müddətdə münasibətlər davam edəcək. Bununla yanaşı, İranla güclü əlaqələr qurmaq istəməyən bir sıra ölkələr var - Səudiyyə Ərəbistanı, BƏƏ, Bəhreyn. Lakin İranla yaxşı münasibətlər qurmaq istədikləri zaman bizim də buna bənzər bir istəyimiz olacaq. Əlbəttə ki, İsraillə münasibətləri bizim onlarla münasibətlərimizə mane olmur".
Göründüyü kimi, İran bu münasibətlərin qurulmasında müstəsna dərəcədə maraqlı olub, hətta özü üçün qırmızı xətt saydığı İsraillə onların yaxınlığına da göz yuma bilib.
Məhəmmədəli QƏRİBLİ
