Ermənistanın baş naziri Nikol Paşinyan Təhlükəsizlik Şurasının iclasını keçirib. Bu barədə Ermənistan hökumətin mətbuat xidməti məlumat yayıb.
Yayılan məlumata görə, müzakirələrin gündəliyi açıqlanmayıb. Qeyd olunub ki, Təhlükəsizlik Şurasının üzvlərindən başqa iclasda parlamentin spikeri Alen Simonyan, baş nazir aparatının rəhbəri Arayik Arutyunyan, parlament sədrinin müavini Ruben Rubinyan, hakim “Vətəndaş razılaşması” parlament fraksiyasının rəhbəri Ayk Koncoryan, parlamentin xarici əlaqələr daimi komitəsinin sədri Eduard Ağacanyan, eləcə də müdafiə və təhlükəsizlik məsələləri üzrə komissiyanın rəhbəri Andranik Köçəryan iştirak edib.
Diqqəti çəkən məqam odur ki, hökumətin bir sıra üzvləri Təhlükəsizlik Şurasının toplantısına qatılıb. Bu isə olduqca vacib məsələnin müzakirə edilməsindən xəbər verir.
Maraqlıdır, bəs ekspertlər bunu necə dəyərləndirir? Sözügedən iclas niyə belə geniş tərkibdə olub? Paşinyan niyə geniş tərkibli təhlükəsizlik iclası barədə məlumat yaydırmadı?
“İmza atdığı Bəyannamələrə əməl etməsə, bunun Ermənistana baha başa gələcəyinin fərqindədir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bunun səbəbini bir sıra amillərlə əlaqələndirdi: “Bunun müxtəlif səbəbləri ola bilər. Görünən odur ki, Ermənistan Baş naziri Nikol Paşinyan Soçi görüşündə imza atdığı Bəyannaməni məhz Təhlükəsizlik Şurası ilə müzakirə edir. Məsələ ondadır ki, baş nazir olaraq həmin görüşdə üzərinə öhdəlik götürüb. Bu o deməkdir ki, baş nazir olaraq həmin öhdəliyi yerinə yetirməlidir və bu reallaşmalıdır. Bundan əlavə, ölkədə müxalifət və digər radikal qruplar N.Paşinyanın imza atdığı sənədləri xəyanət adlandırır. Bu səbəbdən Paşinyan ehtiyat edir və müzakirə olunan məsələlər barəsində açıq danışmır. Çünki müxalifət ona qarşı yeni qüvvə ilə gələ bilər. Həmçinin N.Paşinyanın əlavə çıxış yolu yoxdur. Çünki dairə hər keçən gün daha da daralır. O, razılaşmalara əməl etməlidir və fakt odur ki, ona ayrılan vaxt azalır. Ona görə də belə görüşlər keçirib, qərar verməlidir. Bu, həm də tarixi bir siyasi hadisədir. Göründüyü kimi, ölkə daxilində revansizmdən çəkinir. N. Paşinyan imza atdığı bəyannamələrə əməl etməsə, bunun Ermənistan üçün baha başa gələcəyinin fərqindədir. Ona görə də belə toplantılar keçirməklə müzakirələr aparır və komandası ilə qərar verməlidir”.
Politoloq onu da əlavə etdi ki, Paşinyan digər alternativ varianta əl atsa, bu onun üçün fəlakətli ola bilər.
Vidadi ORDAHALLI
