Ermənipərəst konqresmenin ölümü erməniləri yasa qərq edib. Belə ki, Azərbaycan və türk xalqlarının böyük düşməni, keçmiş ABŞ senatoru Bob Doul dünyasını dəyişib. Doul senator olarkən Azərbaycan və Türkiyə əleyhinə qanun layihələrinin qəbulunda iştirak edib.
O hər zaman erməni “soyqırımı”nın tanınması uğrunda mübarizənin önündə olub, həmçinin Ermənistanı və “Artsax”ı dəstəkləyib. Buna görə də 2019-cu ildə Ermənistan prezidenti Armen Sarkisyan ermənilərin maraqlarını müdafiə etdiyi üçün lobbiçi Robert (Bob) Doulu Ermənistanın dövlət mükafatına layiq görmüşdü.
ABŞ prezidenti Co Bayden senator Bob Doulun xatirəsinə ölkədəki hökumət binaları üzərindən ayın 9-na qədər bayraqların endirilməsi ilə bağlı əmr verib: “Tariximizdə az sayda dövlət xadimi, müharibə qəhrəmanı, Böyük Nəslin ən böyük nümayəndələrindən biri olan Bob Doula ehtiram əlaməti olaraq, Birləşmiş Ştatların bayraqlarının endirilməsini əmr edirəm”.
O da məlum olub ki, ABŞ bayraqları ölkədəki hökumət binaları, o cümlədən Ağ Evin üzərində, eləcə də Birləşmiş Ştatların bütün səfirliklərində, hərbi bazalar və gəmilər üzərindən endiriləcək. Məlum olduğu kimi, ABŞ-ın Azərbaycanda da səfirliyi var. Düzdür, səfirlik sözügedən məsələdə müstəqildir və bayrağı endirə bilər. Ancaq o da faktdır ki, Bob Doul ömrü boyu Azərbaycanın və Türkiyənin əleyhinə mübarizə aparmış mürtəce bir şəxsiyyət olub. O baxımdan onun xatirəsinin Azərbaycanda hörmətlə yad olunmasına qarşı hansı bir jesti etmək olar? Bununla bağlı hansı siyasi addımları atmaq olar? Çünki Azərbaycan xalqı Bob Doulun xatirəsinin ölkəmizdə əziz və uca tutulmasından qəti şəkildə mənmun deyil.
Ramil Hüseynov: “Partiyalar bununla bağlı bəyanatla çıxış edə bilər”
Məsələyə münasibət bildirən Yeni Yol Partiyasının sədri Ramil Hüseynovun fikrincə, partiyalar, QHT-lər bir araya gəlib Bob Doulun ömür boyu Türkiyəyə və Azərbaycana qarşı fəaliyyətini müzakirə etməlidir: “Lazım gələrsə, partiyalar bununla bağlı bəyanatla çıxış edə bilər. Bütün bunlar yaxın tarixdə baş verdiyi üçün biz bunu unutmamalıyıq. Bu həmin Bob Douldur ki, 907-ci Düzəlişin qəbul olunmasında fəal rol oynayıb. Sonrakı dövrdə bədnam düzəlişin birdəfəlik ləğvinə mane olmağa çalışıb. Yeri gəlmişkən onu da qeyd edək ki, B.Doul Respublikaçılar Partiyasında təmsil olunub. Düzdür, həmin partiyada erməni lobbisi Demokratlar Partiyasında olduğu qədər güclü təşkilatlanmayıb. Ancaq B.Doul əsas ermənipərəst senatorlardan biri olub. 1996-cı ildə prezidentliyə namizəd olanda qondarma genosidi tanımaqla bağlı vəd verib. Bir sözlə, o hər zaman ermənilərin yanında olub”.
Əli Orucov: “Doulun xatirəsinin yad edilməsinə maksimum biganə yanaşmaq lazımdır”
AMİP funksioneri Əli Orucov isə hesab edir ki, B.Doulun xatirəsinin yad edilməsinə maksimum biganə yanaşmaq lazımdır: “Bunu müxtəlif formada göstərmək lazımdır. Bu arada bütün media vasitələri onun ermənipərəst fəaliyyətini geniş işıqlandırmalıdır. Bunu təkrarən əhatəli şəkildə ictimayətin diqqətinə çatdırmalıdır. Digər formalardan da istifadə oluna bilər”.
Vidadi ORDAHALLI
