Son zamanlar Qarabağda yaşayan ermənilərin rəsmi Bakıya müraciətlərinin artdığı barədə Ermənistan mətbuatında və sosial şəbəkələrdə davamlı olaraq məlumatlar yayılır. Bu məlumatlardan açıq görsənir ki, Qarabağda yaşayan ermənilər separatçı başçılarının avantürist bəyanatlarından, yanlış davranışlarından cana gəliblər. Bu səbəbdən də onlar daha Araik Artunyunyan kimi separatçılara inanmır, onlara nifrət bəsləyirlər və bunu gizlətmirlər də.
Havalar soyuyandan məlumatlar yayılır ki, Qarabağda yaşayan ermənilər yanacaq sarıdan çətinlik çəkir və qaz üzünə həsrətdirlər. Separatçıbaşı Artunyunyanın və onun dəstəsinin isə bu problemi həll etmək gücündə olmadığı məlumdur. Erməni mediası yerli hökumətə istinadən Qarabağdakı ermənilərin Bakıya rəsmi müraciət etdiklərini yazır: “...Qarabağdakı ermənilər (separatçılar-İ.S) Bakıya rəsmi müraciət ediblər ki, qışdan çıxmaları üçün onlara təbii qaz versinlər. Hazırda Xankəndi və ətrafındakı məntəqələrdə evlərin qızdırılması, habelə əhalinin istifadə etməsi üçün “mavi yanacağa” ciddi ehtiyac var. Ona görə də, problemlərini həll etmək üçün Bakıdan kömək istəyiblər. Rəsmi Bakının onlara cavab verib-vermədiyi haqda isə hər hansı bir məlumat yoxdur”.
Göründüyü kimi, artıq belə siqnallar var və onların rəsmi Bakıya can atdıqları, Bakının hakimiyyətini qəbul etmək istəyində olduqları deyilir. Məlumatlarda vurğulanır ki, onlar bu üzdən də Bakıdan yanacaq dəstəyi istəyirlər...
“Qarabağdakı sadə ermənilər onsuz da öz separatçı başçılarına nifrət bəsləyirlər, onlar əslində rəsmi Bakıya...”
BAO başqanının Türk Dünyası ilə əlaqələr üzrə müavini, AMEA-nın Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli “Bakı-Xəbər”ə bildirdi ki, hazırda Rusiya sülhməramlılarının nəzarəti altında olan Azərbaycan ərazilərində yaşayan ermənilər həm iqtisadi cəhətdən, həm də yanacaq baxımından ciddi problemlər yaşayırlar. “Əgər onlar Azərbaycan hökümətinə müraciət edirlər ki, qışda qazla, istiliklə təmin olunmaları üçün onlara yardım etsin, o zaman onlar bəzi məsələləri dəqiqləşdirməlidirlər. Sözün açığı, onların iki çıxış yolu var. Hesab edirəm ki, Azərbaycanın Qarabağ bölgəsində yaşayan ermənilərin birinci çıxış yolu odur ki, Azərbaycan sərhədləri daxilində Azərbaycan qanunları çərçivəsində yaşamaq istəmirlərsə, o zaman Ermənistana köç etsinlər, yaxud başqa yerlərə getsinlər. Onlar unutmasınlar ki, koç etmək istədikləri Ermənistan əraziləri də tarixi Azərbaycan torpaqlarıdır. Bu da bir tarixi gerçəklikdir, onu nə qədər gizlətmək istəsələr də, həqiqəti danmaq mümkün deyil. Onların ikinci çıxış yolları odur ki, bu qışdan sağ-salamat çıxmaq, qazla, istiliklə təmin olunmaq istəyirlərsə, o zaman Azərbaycan hökümətinin, dövlətinin qanunlarına tabe olmalıdırlar. Artıq separatçılıqdan, separatizmdən birdəfəlik əl çəkməlidirlər və Azərbaycan vətəndaşlığını qəbul etməlidirlər. Qarabağdakı sadə ermənilər onsuz da öz separatçı başçılarına nifrət bəsləyirlər, onlar əslində rəsmi Bakıya Azərbaycan vətəndaşlığını qəbul etmək istədikləri ilə bağlı açıq müraciət etməlidirlər. Onlar yaxşı bilirlər ki, məhv edilmiş separatçı tör-töküntüsünün saxta “hökümət”inin, “rejim”inin heç bir əhəmiyyəti yoxdur. Ola bilsin, Vətən müharibəsinə qədər hansısa dövlətlər, bəzi təşkilatlar bundan faydalanırdı. Amma onlar da bilirdilər ki, qondarma rejimin axırı gələcək, o məhv ediləcək. Bir sözlə, Qarabağdakı ermənilərin iki çıxış yolu var, bundan başqa yolları qalmayıb”.
F.Ələkbərlinin sözlərinə görə, yaxın illərdə də məsələ bu cür həll olunacaq - ya ermənilər çıxıb gedəcək, ya da Azərbaycan vətəndaşlığını qəbul edib yaşayacaqlar. F.Ələkbərli deyir ki, onlar Azərbaycan vətəndaşlığını qəbul etsələr qazla da, işıqla da, işlə də təmin olunacaqlar, bütün vətəndaşlara aid hüquqlar onlara da aid olacaq. “Onlar da digər Azərbaycan vətəndaşları ilə eyni hüquqa malik olacaqlar. Separatizmə başlamazdan əvvəl də onlar Azərbaycan vətəndaşları idilər. Qarabağdakı ermənilər separatçıların tələsinə düşməsəydilər və hansısa oyunlara gəlməsəydilər indi onlar da başqa Azərbaycan vətəndaşları kimi qanunlarımızın üstün cəhətlərindən yararlana bilərdilər. Qarabağ erməniləri separatçıların toruna düşəndən bəri çox şey itirib. Başlıcası isə, Azərbaycan vətəndaşı olaraq qanunlarımızın üstünlüklərindən yararlanmağı. Bu gün onlar Azərbaycan vətəndaşlığını qəbul edib onun qanunlarına tabe olub separatçılıqdan əl çəkməlidirlər ki, həyatları normal axara düşsün. Separatçılara başçılıq edənlər də, separatçılar da Azərbaycan qanunlarına və beynəlxalq hüquq qaydalarına uyğun olaraq cəzalarını alacaqlar, sadə ermənilər isə Azərbaycan vətəndaşları olaraq Azərbaycan konstitutsiyasına uyğun yaşamlarına davam edəcəklər. Ermənilər bununla razı olmayacaqlarsa, o zaman sülhməramlıların müvəqqəti olaraq nəzarətində olan Xankəndini, Əsgəranı, Ağdərəni Xocalını, Xocavəndi tərk etməlidirlər. Qarabağda yaşayan erməni sakinlər, nəhayət ki, düzgün qərar qəbul etməlidirlər. Çünki düzgün qərar qəbul etməsələr nəinki İrəvanda, Gorusda, Qafanda, heç başqa yerlərdə də onlara yer olmayacaq. Onda məcbur qalıb, bir vaxtlar gəldikləri Hindistana, Suriyaya, Livana gedəcəklər. Bir sözlə, hər şey ortadır, vəziyyətləri göz qabağındadır, qısa müddətə qərarlarını verməlidirlər. Yoxsa sən separatçılıq edəcəksən, Azərbaycan qanunlarına zidd hərəkətlərə yol verəcəksən, sonra da “soyuqdan donuruq bizə qaz ver” deyəcəksən, belə bir şey yoxdur. Ermənilər qaz, yanacaq istəyirlərsə separatizmə son qoyub Azərbaycan vətəndaşlığını qəbul etsinlər və separatçıların da cəzalandırılmasına razılıq versinlər, başqa yolları yoxdur”-deyə F.Ələkbərli qeyd etdi.
İradə SARIYEVA
