Ermənistanda iqtidar və müxalifət arasında Azərbaycanla münasibətlərin hansı formada qurulması ilə bağlı ziddiyyətlərin getikcə daha da dərinləşməsi müşahidə edilir. Bunu təsdiqləyən daha bir məqam Ermənistan parlamentinin xarici əlaqələr komissiyasının müxalif “Hayastan” fraksiyasından lideri, keçmiş müdafiə naziri Seyran Ohanyanın hazırladığı bəyanat layihəsini rədd etməsi oldu.
Komissiya Seyran Ohanyanın hazırladığı bəyanat layihəsini 6 əleyhinə, 4 lehinə səs nisbəti ilə rədd edib. Keçmiş prezident Robert Köçəryanın yaratdığı fraksiyadan verilən bu layihə Azərbaycanla sərhədin delimitasiya və demarkasiyası barədə olub. Komissiya iclasının əvvəlində, məsələnin həssaslığı nəzərə alınaraq, səs çoxluğu ilə müzakirənin qapalı keçirilməsi barədə qərar qəbul olunub. Xarici əlaqələr komissiyasının sədri Eduard Ağacanyan bu barədə bildirib: “Təklif olunan bəyanat layihəsinin məzmun etibarilə əsasən daxili siyasi xarakter daşıması, sənəddə hökumətin birbaşa və dolayısı ilə ittiham olunması və onun faktiki olaraq müxalifətin hazırkı siyasi narazılığını əks etdirməsi artıq əsas verir ki, “Vətəndaş müqaviləsi” partiyasının komissiyadakı üzvləri onun əleyhinə səs versinlər. Eyni zamanda, layihənin açıq müzakirəsinin danışıqlara mane ola biləcəyi, təhlükəsizliyə problemlər yaradacağı nəzərə alınaraq bu məsələnin qapalı rejimdə müzakirəsi təklif edilir”. “ Hayastan” fraksiyasından deputat Armen Rüstəmyan müzakirənin qapalı keçirilməsinin qeyri-məqbul olduğunu bildirib. O qeyd edib ki, bu bəhanədir, əsas məqsəd isə hakimiyyətin ağrılı və həyəcan doğuran razılaşmalara getməsidir. Deputat soruşub ki, bu layihənin hansı bəndinə görə onun əleyhinə səs verilib: “Əgər qısa əsaslandırsaq, məsələnin mahiyyəti belədir: biz demişik ki, suverenliyimizdən heç bir güzəşt edilməməlidir və Konstitusiya rəhbər tutulmalıdır. Suverenlik həm də həmin dəhliz məntiqi və Ermənistanın mümkün itkiləri ilə bağlıdır. İkincisi, elə addımlar atmaq olmaz ki, Qarabağ Azərbaycanın tərkibində qalsın. Bu, ermənilərin Qarabağdan qovulması demək olacaq. Üçüncü məsələ isə ön cəbhəni, mövqelərimizi möhkəmlətməklə bağlıdır. Çünki biz öz sərhədlərimizi qorumasaq, kənardan heç kəs gəlib bunu bizim əvəzimizə etməyəcvək. Yəni onlar bunun əleyhinədirlər? Qoy indi izah etsinlər ki, niyə bunların əleyhinədirlər”. Lakin komissiya sədri Eduard Ağacanyan deyib ki, partiyasının bu layihəyə qarşı çıxmasının bir səbəbi onun siyasi məzmunudur. Onun sözlərinə görə, iclasın qapalı keçirilməsi barədə qərar isə müzakirə olunan məsələlərin həssaslığın ilə bağlıdır.
Ağacanyan xatırladıb ki, noyabrın 26-da Soçidə keçirilən üçtərəfli görüşdən sonra verilən bəyanatda deyilirdi ki, Bakı və İrəvan sərhədin delimitasiya və demarkasiyası üçün birgə komissya yaratmalıdır. Lakin onun sözlərinə görə, bu məsələ ilə bağlı heç bir təzə xəbər yoxdur. Bu fonda diqqət çəkən daha bir məsələ Ermənistan baş naziri Nikol Paşinyanın Təhlükəsizlik Şurasının iclasını keçirməsidir. İclasda konkret nələrin müzakirə edildiyi açıqlanmır. Lakin Ermənistan mediası Təhlükəsizlik Şurasında Paşinyanın ötən həftənin sonunda rəhbəri olduğu “Vətəndaş müqaviləsi” fraksiyası ilə qapalı toplantısının gündəmini müzakirə etdiyini yazır. Ötən həftənin sonunda Nikol Paşinyanın parlamentdə partiyasının deputatları ilə qapalı müzakirə keçirdiyi deyilirdi. Hətta erməni mediası Paşinyanın parlament binasında qışqıra-qışqıra danışdığını, səsinin dəhlizlərdən eşidildiyini də yazmışdı. Məlumatlara görə, Paşinyanın parlamentdəki toplantısında Azərbaycanla sərhədin delimitasiya və demarkasiyası məsələsi müzakirə olunub. “Qraparak” qəzeti bu fonda yazır: “Paşinyan deputatlarına delimitasiya-demarkasiyası prosesi başa çatdıqdan sonra dövlətlərarası sənədin parlamentdə təsdiq edilməsinin vacibliyini bildirirdi. Yəni hər kəs müqavilələrin imzalanmasında məsuliyyəti bölüşdürməlidir. Toplantıda, həmçinin, Soçi razılaşnmalarına əməl edilməsi, Azərbaycanın irəli sürdüyü dəhliz məsələsi də müzakirə olunub. Əldə etdiyimiz məlumata görə, sərhədin delimitasiya və demarkasiyası ilə bağlı müqavilənin parlamentdə ratifikasiya edilməsi tələbi Paşinyanın qarşısına Putin tərəfindən qoyulub. Delimitasiya və demarkasiya prosesinin ən qısa müddətdə – 6 ay müddətində həyata keçirilməsi planlaşdırılır”. Məlumata görə, Paşinyan Təhlükəsizlik Şurasının iclasında da eyni məsələləri müzakirə edib. Toplantıda Təhlükəsizlik Şurasının üzvləri ilə yanaşı, parlamentin spikeri və vitse-spikerinin, eləcə də parlamentin xarici əlaqələr və təhlükəsizlik komitələri rəhbərlərinin iştirak etməsi də bu məlumatın doğruluğu ehtimalını gücləndirir. Belə görünür ki, hakimiyyət Azərbaycanla razılığa getməyə meyllidir. Sadəcə, revanşist qüvvələr buna əngəl olmağa çalışır. Lakin Prezident İlham Əliyev Qubanın Qonaqkənd qəsəbəsində yeni inşa olunan Mədəniyyət Evində yaradılan şəraitlə tanışlıqdan sonra qəsəbə sakinləri ilə görüşü zamanı həmin qüvvələrə sərt xəbərdarlıq edib: "Bizim son vaxtlar apardığımız işlər onu göstərir ki, hər hansı bir revanşist meyl olarsa, onun məsələsi dərhal yerindəcə həll olunacaq. Çünki müharibədən sonra Ermənistan tərəfindən bir neçə dəfə belə cəhdlər oldu və onun acı nəticələrini onlar özləri gördülər. Ona görə, hələ ki gec deyil, mən onlara artıq dəfələrlə müraciət edərək demişdim, bizim şərtlərimizi qəbul etməlidirlər, yollarla, kommunikasiyalarla bağlı hər hansı bir qeyri-səmimi yanaşmaya son qoyulmalıdır. Əgər belə olarsa, onda Cənubi Qafqazda bütün xalqlar sülh, əminamanlıq şəraitində yaşayacaq. Çünki biz istədiyimizə nail ola bilmişik, bunu hər kəs gördü".
Tahir TAĞIYEV
