Erməni mətbuatı Ermənistanı İsraillə müqayisə edərək, Paşinyanın ermənilərin ölkəyə dönüş siyasətinin necə iflasa uğramasından bəhs edib.
Utanmadan Ermənistanla İsrail arasında paralellər aparırlar: “Ermənistan erməniləri tez-tez təəssüflə şikayətlənirlər ki, bizim ölkə Qafqazın İsrailinə çevrilə bilmədi. Hərçənd, tez-tez iki ölkəni müqayisə edirlər. Bəli, yəhudilər uzun əsrlərdən sonra öz dövlətlərini yenidən qura bildilər. Bəli, həm Ermənistan, həm də İsrail praktiki olaraq eyni geosiyasi müstəvidə, düşmən əhatəsində yerləşir, neft-qazdan məhrumdur. Amma yəhudilər bizdən fərqli olaraq anlaya bildilər ki, öz dövlətlərindən daha vacib heç nə yoxdur. Ona görə 40, 50, 60, 70-ci illərdə Avropa və Amerikadakı rahat, isti və təhlükəsiz evlərini tərk edərək İsrailə qayıtdılar, harada ki, onları heç də normal həyat şəraiti gözləmirdi. Ermənilərin də belə şansı var idi. Özü də ikiqat. Çünki bizim eyni vaxtda iki erməni dövlətimiz var idi. Artıq birini itirmişik. İkincisi isə yavaş-yavaş ölür”
Daha sonra qeyd edilir ki, xaricdəki ermənilərin geri dönməsi ilə bağlı əvvəlcə hakimiyyətin ümidləri özünü doğrultdu: “Təkcə 2018-ci ildə 15 min insan ölkəyə qaytarıldı ki, bu da müstəqillik illərində ən yüksək göstərici idi. Ancaq kəmiyyət keyfiyyətə çevrilmədi - vətənə qayıdanların ən böyük payı o vaxt iqtisadiyyatda ciddi problemləri olan Rusiyadan, eləcə də Suriya, Livan və İraqdan idi. Artıq 2019-cu ildə vətənə qayıtmaq istəyənlərin sayı sadəcə olaraq azaldı. Çünki birincisi, xalqın inqilaba dəstəyi azalmağa başladı. İkincisi, Ermənistanda yaşamaq üçün normal şərait yaradılmadı. Daha sonra pandemiya, müharibə bu sahədə vəziyyəti daha da pisləşdirdi”.
O da qeyd edilib ki, artıq Suriya erməninlərinin 60 faizi, İraq ermənilərinin isə daha çox hissəsi Ermənistanı tərk edib. Görünən odur ki, Paşinyanın məlum planları hələ müharibə başlamazdan əvvəl uğursuzluğa düçar olub.
“Sözügedən planların iflasa uğraması qaçılmaz idi, sadəcə, pandemiya və müharibə bunu daha da sürətləndirdi”
Məsələyə münasibət bildirən AMİP sədri Arzuxan Əlizadənin fikrincə, Ermənistan heç vaxt İsrail ola bilməz: “Ən azından ona görə ki, yəhudilər ermənilər kimi məkrli deyil. İsraildə bu gün milyonlarla ərəb və digər millətin nümayəndələri yaşayır. Ərəblərlə münaqişə vəziyyətində olsalar da, ölkədə çoxsaylı ərəb yaşayır. Ancaq gəlin görək, Ermənistanda bir nəfər də olsun azərbaycanlı yaşayırmı? Bundan söhbət belə gedə bilməz. Ermənistan monoetnik ölkədir və əhalinin 99 faizi ermənidir. Digər tərəfdən, Ermənistanın, İsraildən fərqli olaraq, açıq dənizə çıxışı yoxdur. Paşinyan populist şüarlarla hakimiyyətə gəldi və bir sıra vədlər verdi. Onlardan biri də əhalinin sayını artırmaq idi. Bu bədbəxtlər anlamır ki, qonşularla düşmənçilik etməklə əhalinin sayını artırmaq olmaz. Bunun üçün gərək qonşularla normal münasibətlər qurasan. İqtisadiyyatı dirçəltmək üçün zəngin resurslar olsun. Ölkəyə güclü sərmayə axını olsun. Xəstə erməni millətçiliyinə dayanaraq güclü Ermənistan qurmaq mümkünsüzdür. İllərlə Ermənistanda hakimiyyətdə olan qüvvələr erməni diasporunun etdiyi yardımları mənimsəyib. Oxşar siyasət Paşinyan hakimiyyətə gələndən sonra da davam edir. O baxımdan sözügedən planların iflasa uğraması qaçılmaz idi. Sadəcə, pandemiya və müharibə bunu daha da sürətləndirdi”.
Partiya sədri onu da əlavə etdi ki, belə qeyri-müəyyən vəziyyət davam edəcək.
Vidadi ORDAHALLI
