Amerika Hərbi Hava Qüvvələrinə məxsus “OF 38th RS/55th WG, Boeing RC-135V Rivet Joint” tipli təyyarə Qara dəniz üzərində kəşfiyyat uçuşu həyata keçirib. Rusiya KIV-i xəbər verir ki, Krım sahillərinin yaxınlığında kəşfiyyat uçuşu edən təyyarə Krit adasında yerləşən Suda aviabazasından havaya qalxıb. Sayt iddia edir ki, təyyarə Rusiyanın Qara dəniz sərhədi bölgəsində vəziyyəti izləyib, Ermənistan və Azərbaycan tərəfə uçub. Bunun ardınca isə təyyarənin Gürcüstanın hərbi məkanına daxil olduğu qeyd olunur.
Maraqlıdır, ABŞ-ın kəşfiyyat təyyarəsinin bizim sərhədimizə yaxınlaşmaqda hansı məqsədi ola bilər?
Politoloq Elşən Mustafayev “Bakı-Xəbər”ə bildirdi ki, bu məsələyə bir neçə fərqli aspektdən yanaşmaq olar: “Birinci təbliğati istiqamətə fikir verək. Məlumatı yayan Rusiya mənbələridir. Ola bilər ki, onların məlumatı tam dəqiq də olmasın. Hələ ki, ABŞ-ın bu xəbəri təsdiqlədiyinin şahidi olmamışıq. Hazırda ABŞ və Rusiya arasında münasibətlər gərgindir. Bu özünü təbii olaraq informasiya mübarizəsi sahəsində də göstərir. Yəni biz bu qəbildən, tərəflərin hansınınsa yaydığı məlumatı həm də informasiya savaşının tərkib elementi kimi qiymətləndirməliyik. Bir anlıq təsəvvür edək ki, deyilən trayektoriyada uçuş olub. İş burasındadır ki, Rusiya bundan əvvəl də bəyan edib ki, ABŞ-ın hərbi-kəşfiyyat və radioelektron təhqiqat təyyarələri Qara dəniz üzərində uçuşlar həyata keçirir. Müasir dönəmdə hansısa ölkənin hava məkanını icazəsiz pozmaq mümkün deyil. Yəni Azərbaycanın texniki imkanları həmin təyyarəni fiksə etməyə tam çatır. Deməli, belə uçuşlar yalnız tərəflərin və ya hava məkanı pozulan ölkənin icazəsi ilə həyata keçirilə bilər. Ukrayna üzərində təyyarənin görünməsi təbiidir. Çünki orada gərginlik var. Rusiyanın həmin əraziyə qoşun topladığı deyilir. Son vaxtlar Rusiya bizim bölgədə də fəallaşıb. Son dönəmdə Rusiya və İranın bölgədə hərbi aktivliyinin artması, Azərbaycan sərhədləri yaxınlığında hərbi təlimlərin və manevrlərin keçirilməsi Vaşinqtonu narahat etməyə bilməz. Bununla yanaşı, Azərbaycanla Ermənistan sərhədi hələ dəqiqləşməyib. Ola bilər ki, ABŞ oradakı vəziyyət barədə dəqiq bilgilər əldə etməyə çalışır. Eyni zamanda, Vaşinqton rusiyalı sülşməramlıların müvəqqəti yerləşdiyi Azərbaycan ərazisindəki situasiyanı da təhlil etmək niyyətindədir. Təbiidir ki, bütün bunlar bizim tərəfdən səslənən versiyalardı. Ancaq mövzunu bir qədər inandırıcı edən amil uçuşun Rusiyanın hərbi güc nümayiş etdirdiyi ərazilərdə keçməsidir. Region olduqca cəlbedicidir. Bu baxımdan da, böyük güclərin hər biri maksimum dərəcədə vəziyyətlə bağlı daha çox məlumat əldə etməyə çalışır”.
Məhəmmədəli QƏRİBLİ
