Beynəlxalq məsələləri araşdıran erməni ekspert Suren Sarkisyan artıq Ermənistanın xarici ölkələrdəki bəzi səfirlərinin təhlükəli addımlar atmağa başladığını deyib: “İkinci Qarabağ müharibəsindən sonra Azərbaycanın Ermənistana təklif etdiyi sülh müqaviləsi hələ də cavabsız qalıb. İrəvanda radikal düşüncəli siyasətçilər, politoloqlar bunu özləri üçün arzuolunmaz hal saysalar da, yerli media dəfələrlə ölkə rəhbərliyinin sülhdə maraqlı olmasını gizlətmədiyini yazıb”.
Onun sözlərinə görə, Ermənistanın xarici ölkələrdəki bəzi səfirləri çox təhlükəli tezislər irəli sürürlər: “Xüsusilə də, fəaliyyət göstərdikləri ölkələrin hakimiyyət orqanları ilə görüşərkən onlardan sülh dövrünün açılması üçün kömək istəyirlər. Yəni deyirlər ki, "Dağlıq Qarabağ problemi" başqa cür həll olunub, "Artsax" artıq Ermənistanın prioritet məsələsi deyil. Gördüyünüz kimi, bu elə rəsmi Bakının da tezisidir. Həmin ölkələrdə bu, İrəvanın Qarabağdan tamamilə imtina etməsi mövqeyi kimi qəbul edilir. Onlar səfirlərimizin məlum mövqeyinə reaksiya kimi adətən belə cavab verirlər: “Yaxşı, artıq Qarabağa ehtiyacınız yoxdursa, diqqətinizi başqa məsələlərə yönəldək”.
O bu cavabı belə qiymətləndirib ki, həmin xarici ölkələr heç olmasa Qarabağda ermənilərin hazırda yaşadığı hissələrin qorunub saxlanmalı olduğunu açıq şəkildə bildirirlər. Ermənistan diplomatiyasında yaşanan bu tendensiya nədən xəbər verir?
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistan və onun havadarları qəbul etsə də, etməsə də, Qarabağ konflikti artıq həll olunub: “Bəzi məsələlərin isə həlli yolları qalıb. Bu mövzuda üstünlük Azərbaycan tərəfindədir. Müharibənin qalibi kimi, həm də hüquqi amil bizim tərəfdədir. Konfliktlərin həlli beynəlxalq hüquqa və bir də güc amilinə əsaslanır. Ermənistan bəzi narahatlıqları yaradır ki, prosesi uzatsın. Cənubi Qafqaz strateji bölgədir. Burada stabilliyin olması bütün dünya gücləri üçün çox vacibdir. Burada təhlükəsizliyə hədə olan bütün risqlər aradan qaldırılmalıdır. Ermənistan bilir ki, onun gələcək mövcudluğu bir sıra məsələlərdə geriyə addım atmaqdan keçir. Bunun kökündə həm də beynəlxalq hüquqa hörmət durur. Onlar bilir ki, olmayan “Artsax”ı qabartmaqla yalnız vaxt itirmiş olacaqlar. Bu həm də Ermənistanın bəzi ölkələrlə ikili münasibətlərinin prioritetlərinin formalaşmasına ciddi əngəllər yaradır. Çünki sübut olunub ki, Qarabağ Azərbaycanın hüquqla tanınan ərazisidir. Reallıq bundan ibarətdir ki, Ermənistan xarici siyasət kursunda Qarabağla bağlı iddialarını araxa plana keçirir. Düzdür, tam imtina etməsə də, prioriteti sırasından çıxarır. Elə tarix də həmin ərazilərin Ermənistana aid olmadığını sübut edir. Bütün istiqamətlər üzrə uduzduqlarını dərk edən ermənilər belə qərar qəbul edirlər. Bunu həm də Azərbaycan diplomatiyasının parlaq qələbəsi saya bilərik. Azərbaycan Prezidenti dünyanın nüfuzlu KİV-lərinə verdiyi tutarlı müsahibələrin və Ordumuzun yaratdığı reallıqların bu stereotipin formalaşmasında ciddi rolu olub. Bütün dünya heç də erməni diasporunun təsiri altına düşən 3-4 korrupsioner lobbi qrupundan ibarət deyil. Dünyada obyektiv mərkəzlər, ölkələr də az deyil. Onlar həm də dünyadakı ictimai rəyin formalaşmasında önəmli rol oynayır. Azərbaycan öz tutduğu yola davam etməlidir. Ermənilər anlayacaq ki, xırda təxribatlarla nəyəsə nail olmaq mümkün deyil. Yavaş-yavaş bütün reallıqları öz xoşları ilə qəbul edəcəklər”.
Məhəmmədəli QƏRİBLİ
