Ermənistan ordusunda zabitlərin özbaşınalığı və “dedovşina” bu ölkədə artıq əsgər valideynlərinin qorxulu kabusuna çevrilib. Ermənistan mediası yazır ki, bu gün övladını hərbi xidmətə yola salan analar oğullarının döyüş tapşırığını yerinə yetirərkən ölməsindən daha çox, orduda hökm sürən yerlibazlıq, əyyaşlıq, nizamnamədənkənar münasibətlər və zabitlərin özbaşınalığının qurbanı olmasından qorxur. Ermənistan ordusunun şəxsi heyəti arasında geniş vüsət almış spirtli içkilərə meyllilik halları və bu səbəbdən baş verən cinayətlər artmaqda davam edir.
Hələ il başa çatmayıb, amma Ermənistan ordusunda 11 ayda qeyri-döyüş və “dedovşina” üzünndən 60 əsgər ölüb. Bu da əvvəlki illərlə müqayisədə xayli çoxdur. Belə ki, 2018-ci ildə düşmən ordusu 38 hərbi qulluqçusunu itirib. 2019-cu ildə itki sayı 20, 2020-ci ildə isə 57 nəfər olub. Erməni mətbuatı yazır ki, II Qarabağ müharibəsindən sonra orduda intihar, yol qəzaları, xəstəlik və "dedovşina" üzündən bir-birinə atəş açması halları kəskin artıb. Erməni hüquq müdafiəçiləri hesab edir ki, orduya münasibət dəyişmədikcə, belə neqativ halların sayı azalmayacaq. Əksinə, daha da artacaq. Bu baxımdan hesab edirlər ki, orduda baş verən pozuntularla bağlı qəti addımlar atılmalıdır.
Ancaq müşahidələr göstərir ki, Ermənistan ordusunda tuğyan edən başıpozuqluğun yaxın perspektivdə aradan qalxacağı real deyil.
“Artıq orduda neqativ halları gizlədə bilmirlər”
Sözügedən məsələ ilə bağlı fikirlərini “Bakı-Xəbər”lə bölüşən hərbi ekspert Ramil Məmmədlinin fikrincə, Ermənistan ordusunda “dedovşina” və bu səbəbdən ölüm halları hər zaman yüksək olub: “Sadəcə, ərazilərimiz işğal ediləndən sonra erməni ordusu barəsində yalançı “məğlubediməz ordu” mifi uyduruldu. Bir müddət bu səbəbdən ordudakı neqativ halları gizlədə bilirdilər. 44 günlük İkinci Qarabağ müharibəsi, işğal altında olan Azərbaycan torpaqlarının azad olunması ilə yanaşı, ermənilərin otuz ildir öyündükləri “məğlubedilməz ordu” mifini də alt-üst etmiş oldu. Cəmi 44 gün ərzində Azərbaycan Ordusu bu mifi dağıtmağa müvəffəq oldu. Bütün bunlar nəticəsində həm də o məlum oldu ki, erməni ordusunda ciddi başıpozuqluq, nizamnamədənkənar hadisələr baş verir. Düzdür, zaman-zaman erməni mediasında “dedovşina” və qeyri-döyüş üzündən baş verən əsgər ölümlərindən yazılıb. Ancaq reallıqda bu kimi hadisələr deyilən rəqəmlərdən daha çox olub. Qarabağda uğradıqları məğlubiyytdən sonra orduda “dedovşina”, zorakılıq, fərarilik halları artır. Hərbi məğlubiyyətdən sonra yaşadığı fiaskonun qisasını erməni əsgərləri sanki bir-birindən almağa başlayıb. Vəziyyət o həddə gəlib çatıb ki, hətta Ermənistan İstintaq Komitəsi artıq ordudakı “dedovşina”, zorakılıqla bağlı faktların çoxluğu qarşısında aciz qalıb. Bütün bunlar erməni ordusunun necə bir rəzil durumda olduğunu göstərir. Çox güman ki, qeyri-döyüş şəraitində ölən erməni əsgərlərinin sayı 60 nəfərdən çoxdur. Sadəcə, Paşinyan hakimiyyəti ölkədəki sosial çaxnaşmadan çəkindiyi üçün real rəqəmləri gizlədir”.
Hərbi ekspert hesab edir ki, Ermənistan ordusunda mövcud olan bu cür neqativ halların yaxın perspektivdə öz həllini tapacağı real görünmür.
Vidadi ORDAHALLI
