Erməni KİV-i Azərbaycanın xarici işlər nazirinin Stokholmdakı görüşdən imtina etməsini tərəfimizdən atılan qeyri-konstruktiv addım kimi qiymətləndirir. Ancaq Azərbaycan Xarici İşlər Nazirliyinin Mətbuat xidməti idarəsinin rəisi Leyla Abdullayeva Stokholmda Azərbaycan-Ermənistan xarici işlər nazirləri arasında görüşün baş tutmamasının səbəbini tam əsaslandırıb:
“Bildiyiniz kimi, 2-3 dekabr tarixlərində Stokholm şəhərində ATƏT-in Nazirlər Şurasının 28-ci iclası keçirildi və Azərbaycan xarici işlər naziri bu iclasda iştirak etdi. İclasdan öncə Minsk Qrupunun həmsədrləri Azərbaycan və Ermənistan nazirlərinin növbəti görüşünün Stokholmda keçirilməsi təklifi ilə çıxış etmişdi. Bəllidir ki, Azərbaycan hər zaman dialoqun tərəfdarıdır və bundan öncə keçirilmiş Nyu-York, Minsk və Paris görüşlərində Azərbaycan xarici işlər naziri postmünaqişə dövründə Ermənistan-Azərbaycan münasibətlərinin normallaşdırılması istiqamətində məsələlərlə bağlı ölkəmizin mövqeyini qarşı tərəfin diqqətinə çatdırıb. Lakin 3 dekabr tarixində nəzərdə tutulan görüşdən bir neçə saat öncə Ermənistan tərəfinin təxribatı baş verdi. Belə ki, Ermənistan parlamentarilərinin Azərbaycan Respublikası ərazilərinə qanunsuz səfər etməsi ilə bağlı məlumat yayıldı. Beləliklə də, Azərbaycan tərəfi Ermənistanın bu təxribatına cavab olaraq Stokholmda iki ölkə nazirinin görüşünün keçirilməsini məqsədəuyğun hesab etmədi.
Göründüyü kimi, iki ölkə arasında münasibətlərin normallaşdırılması istiqamətində Azərbaycan tərəfindən addımların atılmasına baxmayaraq, Ermənistan hərbi-siyasi təxribatlarını davam etdirir. Ermənistanın bu mövqeyi bölgədə sülh quruculuğu səylərinə xələl gətirir”.
Azərbaycan diplomatiyasının atdığı bu addımı əsaslı edən daha hansı səbəblər var?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Azərbaycanın Stokholmda xarici işlər nazirlərinin görüşündən imtina etməsi çox doğru addımdır: “Ermənistan özünün təxribatçı istəklərindən və addımlarından əl çəkmək istəmirsə, dünyanın diqqətini məhz bu məqama yönəltmək lazımdır. Çox təəssüf ki, Laçın dəhlizi ilə bağlı məsələ hələ tam müəyyənləşməyib. Ermənistanda yaşayan istənilən şəxs və rəsmi Qarabağa gəlir, oradan da sərbəst şəkildə Ermənistana gedir. Dəhliz funksiyalarından istifadə edən ermənilər təxribat törətməklə məşğul olurlar. Azərbaycan bu vəziyyətlə bağlı dəfələrlə etirazını bildirsə də, nəticə yoxdur. Erməni rəsmiləri və ya deputatları gedib orada vəziyyəti qızışdırırlar. Onların təsirinə düşən terrora meylli insanlar lazımsız addımlar atır. Belə vəziyyəti bir neçə dəfə görmüşük. Bununla dünyanın diqqətini yönəldirik ki, Ermənistan təxribatçılıqdan əl çəkməsə, gələcəkdə daha da sərt etirazımızla qarşılaşa bilərlər. Ceyhun Bayramovun mövqeyi çox doğrudur. Üstəlik də, həmin görüşün heç bir faydası da olmayacaqdı. Azərbaycan rəsmilərinin onlarla birbaşa görüşlərinin heç bir nəticəsi ola bilməz. Əksinə, münasibətləri bir az da kəskinləşdirə bilər. Ermənistanın tutduğu mövqe görüşlərin nəticəli olmasına imkan vermir. Ordusu məhv, iqtisadiyyatı çökən, ciddi demoqrafik fəlakətlə üzləşən bir dövlət reallıqla hesablaşmaq istəmir. Hətta belə vəziyyətində belə deyir ki, Qarabağ Azərbaycanın tərkibində ola bilməz. Bu cür bəyanat verən dövlətin rəsmiləri ilə nə danışmaq olar? Müharibədən əvvəl də beləydilər. İndi də eyni xətti davam etdirirlər. Onlar qərəzli mövqelərindən çəkilmirsə, danışığın da heç bir anlamı yoxdur. Qoy dünya müzakirə edib, onlara həqiqətin nə olduğunu başa salsın”.
Məhəmmədəli QƏRİBLİ
