Ermənistan tərəfi Azərbaycanın işğaldan azad olunan digər ərazilərinin mina xəritələrini Azərbaycan tərəfinə təqdim edib. Mina xəritələrinin əvəzində isə Azərbaycan Respublikası humanizm prinsiplərini əsas tutaraq 4 dekabr 2021-ci il tarixdə 10 nəfər erməni əsilli hərbi qulluqçunu Ermənistan tərəfinə təhvil verib.
Bu barədə Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasından məlumat verilib.
Təhvil verilmiş şəxslər 16 noyabr 2021-ci il tarixində Ermənistan silahli qüvvələri tərəfindən dövlət sərhədinin Kəlbəcər istiqamətində törədilən təxribatın qarşısı alınarkən saxlanmışdılar.
Ermənistan tərəfi, həmişə olduğu kimi, yenə də təmənnasız addım atmayıb, minalanmış ərazilərin xəritələrini əvəzsiz verməyib. Rusiyanın vasitəçiliyi ilə xəritələri Azərbaycana verən Ermənistan bunun əvəzində isə 10 erməni əsilli şəxsi geri təhvil alıb.
“...Hər şeydən öz məqsədləri üçün istifadə etmək, “bazarlıq” ermənilərin xislətindən irəli gəlir...”
Tanınmış hərbi ekspert Tərlan Eyvazov “Bakı-Xəbər”ə bildirdi ki, Ermənistan indiyə qədər heç vaxt minalanmış ərazilərin xəritələrini əvəzsiz verməyib, bu dəfə də eyni davranış sərgilədi. Ermənistanın hər zaman “bazarlığa” meyl göstərdiyini deyən ekspert hesab edir ki, bu, ermənilərin xislətindən irəli gəlir. “Mina xəritələrinin Azərbaycana verilməsi halları əvvəllər də olub. Yəni Azərbaycana xəritələr verilmişdi və əvəzində də burada saxlanılan erməni əsilli şəxslər Ermənistana təhvil verilmişdi. Bəzən də Ermənistan tərəfin verdiyi mina xəritələrinin tam təfsilatı ilə olmadığı barədə Azərbaycan tərəfin bəyanatları olub. Bu da, öz növbəsində, vasitəçilik missiyasını yerinə yetirən Rusiya sülhməramlılarının hərbi komandanlığına çatdırılmışdı. Onlar da söz vermişdilər ki, bundan sonra mina xəritələri daha təfsilatlı olacaq. Burada erməni hiyləgərliyi ilə yanaşı, bir qarşılıqlıq məsələsi də var. Belə ki, keçən əsrin 90-cı illərində hələ bir qədər xidmətlər formalaşmadığı üçün həm o tərəfdən, həm də bu tərəfdən qarşlıqlı şəkildə müəyyən yerlərdə minalar basdırılıb, amma bunların xəritələri tam olaraq işlənməyib. İndiki kimi baş qərərgaha təqdim edilməyib. Ona görə də, oradan xəritələrdə olmayan minaların da üzə çıxmasına təsadüf olunur. Amma hər bir halda, bu mina xəritələrinin verilməsi bizə imkan verir ki, azad olunmuş ərazilərdə minalardan təmizləmə işini sürətləndirək. Çünki bu çox vacibdir. Bizim ümdə vəzifəmiz ərazini minalardan təmizləyib orada şərait yaratmaq, sonra da vətəndaşlarımızı öz yurd-yuvalarına qaytarmaqdır. Bu işdə hər hansı bir addım atılırsa, bunu yalnız alqışlamaq lazımdır. Çünki mina təmizləyənlər çox geniş əhatəli, gecə saatlarlarında da işlər görürlər. Biçənəkləri, əkin sahələrini, küçələri təmizləmək çox ağır işdir. Hər halda bu bir ipucudur, xəritənin verilməsi, həmin yerlərdən yüzlərlə, minlərlə minanın tapılması gələcəkdə bizim vətəndaşların sağlığı, sağlamlığı üçün olduqca böyük önəm daşıyır. Əgər o mina xəritələrinin verilməsi ən azından bir vətəndaşımızın həyatını xilas edirsə, bunun özü də çox böyük addımdır. Mənə belə gəlir ki, belə işlər bundan sonra da aparılmalıdır”.
Xəritələrin dəqiqliyinə, səhihliyinə gəlincə, T.Eyvazov hesab edir ki, erməni hiyləgərliyi, məkri hər zaman özünü göstərir. T.Eyvazov deyir ki, mina xəritələrinin Azərbaycana verilməsi məsələsində dünya Ermənistana heç bir təzyiq göstərməyib. 30 il bizə sülh nağılı danışan beynəlxalq təşkilatlar qətiyyən təcavüzkarla işğala məruz qalan arasında fərq qoymayıblar. “Bu gün də, baxmayaraq ki, Ermənistanın ərazilərimizi dağıtdığı, milyardlarla ölkəmizə ziyan vurduğu, insanların öz ev-eşiklərinə qayıda bilmədiklərini biz sübutla, faktla beynəlxalq birliyə təqdim edirik. Beynəlxalq təşkilatlara onu da çatdırmışıq ki, azad olunmuş ərazilərimizdə ermənilər saysız minalar basdırıb. Minalanmış ərazilərin xəritələrini qeyd-şərtsiz olaraq məğlub olan tərəf bizə verməli olduğu halda bunu əvəzsiz etmir. Hər şeydən öz məqsədləri üçün istifadə etmək, “bazarlıq” ermənilərin xislətindən irəli gəlir. Halbuki, beynəlxalq təşkilatlar onlara təzyiq göstərməlidir ki, minalanmış ərazilərin xəritəsini qarşılıqsız olaraq Azərbaycana verin, amma elə etmir. Üstəlik, bəzi beynəlxalq təşkilatlar 10 noyabr sazişindən təxminən 20 gün sonra ərazilərimizə daxil olan terrorçuların “hərbi əsir” kimi tanınması məsələsini qoyub. Bizə təzyqiq göstərilir ki, “hərbi əsirlər”i qaytarın. Amma qarşı tərəfə hər hansı bir təzyiqin göstərilməsinin şahidi olmuruq. Təbii ki, Azərbaycan tərəfi də belə bir şəraitdə mütləq gediş etməlidir. Çünki bir tərəfdən, bizim konstitusiyamızda güllələnmə, ölüm cəzası yoxdur, ən böyük cəza ömürlükdür. Biz də bu terrorçu erməniləri daim qorumalıyıq ki, dünya ictimaiyyəti onları nəzarətdə saxlayır. Hesab edirəm ki, terrorçuların geri qaytarılması və onun əvəzində də xəritələrin alınması lazımlı məsələdir. Azərbaycan hər zaman humanizm prinsiplərini üstün tutur və buna sadiqdir”-deyə T.Eyvazov qeyd etdi.
İradə SARIYEVA
