Xocavənd rayonu ərazisində Azərbaycan Ordusunun mövqelərindən birində döyüş növbətçiliyi aparan hərbi qulluqçumuz dekabrın 3-ü saat 13.00 radələrində erməni əsilli şəxs tərəfindən hücuma məruz qalıb. Müdafiə Nazirliyindən verilən xəbərə görə, həmin şəxs silahı ələ keçirməyə cəhd göstərib:
“Hərbi qulluqçumuz havaya atəş açdıqdan sonra özünü müdafiə etmək məqsədilə ona hücum edən təxribatçını zərərsizləşdirib. Hadisə barədə Rusiya sülhməramlı kontingentinin komandanlığına və Rusiya-Türkiyə Birgə Monitorinq Mərkəzinə məlumat verilib. Faktla bağlı araşdırma aparılır”.
Təbiidir ki, erməni mediası məsələyə bir qədər fərqli don geyindirməyə çalışır. Hətta öz təbliğat maşınları ilə öz iddialarını ifşa edirlər. Güya atəşin qoyun otaran çobana açıldığını deyirlər və əllərində kamera görüntülərinin olduğunu bildirirlər. Kamera görüntülərinin nümayişi zamanı isə ortaya deyilən mənzərə çıxmır. Ola bilərmi ki, ermənilər bütün bu təxribatı 15 dekabr Brüssel görüşünə kölgə salmaq üçün edirlər?
“Ermənistanda revanşist qüvvələr vəziyyəti gərginləşdirməyə çalışırlar ki, ölkələri güzəştə getməsin”
Təhlükəsizlik məsələləri üzrə ekspert Elşən Həsənov “Bakı-Xəbər”ə bildirdi ki, ermənilər artıq bütün istiqamətlər üzrə bu təxribatlara başlayıblar: ”2-3 dekabr tarixlərində Stokholm şəhərində ATƏT-in Nazirlər Şurasının 28-ci iclası keçirildi və Azərbaycan xarici işlər naziri bu iclasda iştirak etdi. İclasdan öncə Minsk Qrupunun həmsədrləri Azərbaycan və Ermənistan nazirlərinin növbəti görüşünün Stokholmda keçirilməsi təklifi ilə çıxış etmişdi. Lakin 3 dekabr tarixində nəzərdə tutulan görüşdən bir neçə saat öncə Ermənistan tərəfinin təxribatı baş verdi. Belə ki, Ermənistan parlamentarlarının Azərbaycan Respublikası ərazilərinə qanunsuz səfər etməsi ilə bağlı məlumat yayıldı. Beləliklə də Azərbaycan tərəfi Ermənistanın bu təxribatına cavab olaraq, Stokholmda iki ölkə nazirinin görüşünün keçirilməsini məqsədəuyğun hesab etmədi".
Ekspertin sözlərinə görə, noyabrın 26-da Rusiya, Ermənistan və Azərbaycan liderlərinin Soçi görüşü keçirildi: “Lakin Soçi görüşündən öncə Brüsseldə Azərbaycan və Ermənistanın siyasi liderlərinin görüşünün keçiriləcəyi bəlli idi. Brüssel görüşündə Soçidə əldə edilən razılaşmaların, xüsusilə sərhədlərin delimitasiya və demarkasiyası məsələsi, həmçinin kommunikasiya xətlərinin bərpası ilə bağlı razılaşmalar ətrafında müzakirələrin bir qədər də dərinləşməsi proqnoz edilir. Görüşdə minalanmış ərazilərin xəritəsinin Azərbaycana təqdim edilməsi, etimad mühitinin yaradılması, ayrı-ayrı dövlət qurumları arasında birbaşa təmasların qurulması kimi məqamların da müzakirə ediləcəyi gözlənilir. Bu mənada, Brüssel görüşü Soçi görüşünün məntiqi sonluğu sayıla bilər. Ermənistanda revanşist qüvvələr vəziyyəti gərginləşdirməyə çalışırlar ki, ölkələri güzəştə getməsin. Onlar bunun üçün ənənəvi üsullardan istifadə edirlər. Atəşkəsin pozulması, hərbi təxribatlar və avantüraların dəfələrlə şahidi olmuşuq. Belə təxribatların sonuncusu Xocavənddə baş verdi”.
Məhəmmədəli QƏRİBLİ
